Statystyka: siemji radziej raspadajucca ŭ tych parach, jakija da šlubu nie žyli razam

U apošni čas uzrost ustupleńnia ŭ šlub usio raście. Mnohija kirujucca takoj łohikaj, što spačatku treba rabić karjeru, a hadoŭ u 30 ci paźniej možna dumać i pra siamju. Naprykład, u ZŠA ciapier siaredni ŭzrost pieršaha šlubu dla žančyny — prykładna 29 hadoŭ, dla mužčyn — kala 30.

 U Biełarusi taksama hety ŭzrost apošnija 40 hadoŭ uvieś čas ros. Ciapier jon składaje 28,3 hady dla mužčyn i 26,1 hod dla žančyn.

Na karyść poźniaha šlubu doŭhi čas havaryła i statystyka razvodaŭ. Rannija šluby čaściej raspadajucca. 

Ale statystyka daje i adno cikavaje vyklučeńnie, piša Wall Street Journal. Amierykanski ŭrad apublikavaŭ statystyčnuju spravazdaču pra šluby i razvody bolš čym 50 tysiač žančyn. Zhodna z dakumientam,

jość katehoryja rańnich šlubaŭ, jakija redka skančajucca razvodam. Heta žančyny, jakija vychodzili zamuž, nie majučy pierad hetym vopytu sumiesnaha žyćcia z partnioram. Hetaja katehoryja žančyn mieła adny z samych nizkich pakazčykaŭ razvodaŭ u spravazdačy.

Jak možna heta patłumačyć? 

Zdajecca, nibyta sumiesnaje žyćcio z partnioram — dobraja mahčymaść pravieryć jakaść vašych adnosin, acanić čałavieka, a zaadno i pavialičyć šaniec na ščaślivy šlub u dalejšym. Ale ž navuka ŭsio čaściej śviedčyć pra inšaje —

sumiesnaje žyćcio pierad šlubam pavyšaje vierahodnaść razvodu.

Psichołah Halena Roŭds z amierykanskaha Univiersiteta Denviera tłumačyć, z čym heta moža być źviazanaje. Adna z mahčymych pryčyn — toje, što kali suženiec raniej užo žyŭ z partnioram, to jon maje vopyt razryvu takoha typu adnosin. Značyć, kali ŭ šlubie pačnucca prablemy, čałaviek z takim dośviedam, imavierna, vybiare skančeńnie adnosin.

Inšaja mahčymaja pryčyna — schilnaść paraŭnoŭvać svajho muža ci žonku z byłymi partniorami, pryčym paraŭnoŭvać nie na karyść ciapierašniaha partniora. Naprykład, muž moža być nadziejnym i adkaznym čałaviekam, ale jon moža žartavać horš, čym minuły partnior. Takija paraŭnańni, kali ich trymać u hałavie, rujnujuć šlub.

Jość i inšaja teoryja. Dobraja ilustracyja dla jaje — maładyja muž i žonka z ZŠA Džoŭi i Samanta Perysy, jakija ažanilisia ŭ 24 hady i pry hetym ni dnia nie žyli razam da taho. Perysy ličać, što kali ludzi prosta žyvuć razam, jany atrymlivajuć usie plusy šlubu bieź jaho rehistracyi, i tamu paśla nie schilnyja jaho canić. Šlub dla takich par nie daje takoj radaści, jak dla tych, dla kaho jon — vialiki rubiež.

• 7
• 0
• 0
• 2
• 0
• 1
• 1
• 0