Rasija straciła ŭžo čaćviorty najnoŭšy źniščalnik Su-57 z pačatku 2026 hoda. Samalot zhareŭ 29 kastryčnika na vajskovym aeradromie Achtubinsk u Astrachanskaj vobłaści. Pra heta paviedamiŭ ukrainski OSINT-prajekt «Absolutno nadijnie džierieło», spasłaŭšysia na spadarožnikavyja zdymki, piša The Moscow Times.
Pavodle jaho źviestak, pažar adbyŭsia padčas zapusku ruchavikoŭ u vyniku niaštatnaj situacyi. U prajekcie adznačyli, što z ulikam vytvorčaści nie bolš za čatyry takija samaloty na hod Rasija ŭžo straciła kolkaść Su-57, supastaŭnuju z hadavym abjomam ich vypusku.
Jašče dva Su-57 byli paškodžanyja viasnoj na aeradromie Šahoł u Čalabinskaj vobłaści. Pra heta paviedamlaŭ Hienieralny štab Uzbrojenych sił Ukrainy. Treci źniščalnik raźbiŭsia 23 lipienia ŭ rajonie Źvianiharada pad Maskvoj. Ministerstva abarony Rasii tady paviedamiła, što paciarpieŭ avijacyjny vučebna-bajavy samalot, a pryčynaj nazvała techničnuju niaspraŭnaść.
Pavodle infarmacyi adnaho z rasijskich Z-telehram-kanałaŭ, paśla ŭźlotu ŭ samalota spačatku admoviŭ levy, a zatym pravy ruchavik. Błohier Uładzimir Ramanaŭ vykazvaŭ inšuju viersiju: źniščalnik moh być źbity rasijskim raźlikam supraćpavietranaj abarony z farmiravańnia «BARS-Maskva». Padobnuju viersiju vykazvaŭ i ŭkrainski prajekt InformNapalm, śćviardžajučy, što ŭdałosia paŭpłyvać na pracu adnaho z rasijskich padraździaleńniaŭ SPA i vykarystać jaho sistemu suprać rasijskaha samalota.
Su-57 — najnoŭšy rasijski šmatcelny źniščalnik piataha pakaleńnia, jaki pastupiŭ na ŭzbrajeńnie Pavietrana-kaśmičnych sił Rasii ŭ kancy 2020 hoda. Da 2024 hoda było vypuščana 22 takija mašyny.
Hienieralny dyrektar Abjadnanaj avijabudaŭničaj karparacyi «Rastecha» Vadzim Badecha zajaŭlaŭ, što Su-57 — adziny samalot piataha pakaleńnia, jaki ŭdzielničaje ŭ realnych bajavych dziejańniach, majučy na ŭvazie vajnu va Ukrainie. Uładzimir Pucin nazyvaŭ hety źniščalnik samym efiektyŭnym u śviecie.
Su-57 zdolny raźvivać chutkaść da 2600 kiłamietraŭ za hadzinu i nieści da 7,4 tony bajavoj nahruzki, u tym liku rakiety kłasaŭ «pavietra — pavietra», «pavietra — ziamla» i supraćkarabielnyja rakiety. Pavodle amierykanskaha vydańnia National Interest, adnoj z klučavych asablivaściaŭ samalota źjaŭlajecca mahčymaść uzajemadziejańnia ź bieśpiłotnikami i zapusku hipierhukavoj zbroi.
Košt adnaho Su-57 aceńvajecca ŭ 35—40 miljonaŭ dalaraŭ, abo prykładna 2,8—3,2 miljarda rasijskich rubloŭ. Adna hadzina jaho palotu, pavodle pryviedzienych u artykule acenak, kaštuje kala 25 tysiač dalaraŭ.
Ciapier čytajuć
Cichanoŭski: Cichanoŭskaj možna było ŭ 2020‑m nie pabajacca turmy. I, moža, u biełarusaŭ byŭ by šaniec131
Kamientary