Na dzień narodzinaŭ dački Nasty i Źmitra Daškievičaŭ Uładzimir Niaklajeŭ napisaŭ u jaje honar vierš. Baćka Mahdaleny ciapier u SIZA, suprać jaho raspačali kryminalnuju spravu. Maci zrabili padazravanaj pavodle artykuła 342 č. 1 Kryminalnaha kodeksa Biełarusi (arhanizacyja i padrychtoŭka dziejańniaŭ, jakija hruba parušajuć hramadski paradak, abo aktyŭny ŭdzieł u ich). Nasta Daškievič čakaje čaćviortaje dzicia.
«12 traŭnia — dzień narodzinaŭ Mahdaleny. Dziaŭčynki, baćka jakoj u turmie. Užo nie ŭpieršyniu. A maci, jakaja taksama pabyvała za kratami, pałochajuć turmoj. Choć jana čakaje čaćviortaje dzicia.
Užo kolki hadoŭ tvoryć ździek nad imi ŭłada! Ale nasupierak usiamu jany stvaryli SIAMJU! Adnu z samych pryhožych, kali nie najpryhažejšuju ŭ Biełarusi…» ‒ napisaŭ paet u Facebook.
Mahdalena
Mahdalenie Daškievič
U kožny mih skančajecca daroha —
I tut ža pačynajecca nanoŭ,
I doŭžycca daroha z łaski Boha,
I atulaje nas Jaho luboŭ,
I naša da Jaho luboŭ śviataja,
Jak łastaŭka, krylaje i ŭźlataje
Da jasnych i zasmučanych niobios,
Tudy, dzie krosna Božyja, dzie los
Žyvoju nitkaj tkuć dla nas anioły,
Kamu samotny, a kamu viasioły,
Dy ŭsim taki napiaty — až źvinić!..
I kali raptam abarviecca nić,
Spahada
Upadzie
Ślazoju
Božaj
Na skryžavańni ŭsio i razdarožžy —
I ružaj praraście asot suchi,
I ŭsio, što adžyło, paŭstanie z tlenu,
I zbaŭca pacałuje Mahdalenu,
I hrešnikam daruje ŭsie hrachi.
Kamientary