Inžynier Google śćviardžaje, što ŭ štučnaha intelektu źjaviłasia duša i śviadomaść. Za heta jaho adchilili ad pracy

Błejk Lemuan, staršy inžynier-prahramist u adkaznaj arhanizacyi Google pa štučnym intelekcie, skazaŭ u intervju, što ŭ paniadziełak jaho adpravili ŭ adpačynak i adchilili ad pasady. Adździeł kadraŭ kampanii zajaviŭ, što jon parušyŭ palityku pryvatnaści Google. Sa słoŭ spadara Lemuana, za dzień da svajho adchileńnia ad pasady jon pieradaŭ dakumienty ŭ ofis sienatara ZŠA, u jakich, jak jon śćviardžaje, jość dokazy taho, što Google i jaje technałohii zajmajucca relihijnaj dyskryminacyjaj.

Google zajaviła, što jaje sistemy mohuć hutaryć na roznyja temy, ale nie vałodajuć śviadomaściu.

«Naša kamanda, uklučajučy śpiecyjalistaŭ pa etycy i technołahaŭ, razhledzieła skarhi Błejka ŭ adpaviednaści z našymi pryncypami štučnaha intelektu i paviedamiła, što dokazy nie paćviardžajuć jaho abvinavačvańniaŭ» — havorycca ŭ zajavie Brajana Hebryjeła, pradstaŭnika Google.

Na praciahu niekalkich miesiacaŭ Lemuan spračaŭsia ź mieniedžarami, kiraŭnikami i piersanałam Google praz svaju niečakanuju zajavu pra toje, što moŭnaja madel dyjałohavych prahram (LaMDA), nad jakoje pracuje Google, vałodaje śviadomaściu i dušoj.

Ale Google kaža, što sotni jaje daśledčykaŭ i inžynieraŭ mieli znosiny z LaMDA i pryjšli da inšaj vysnovy. Bolšaść ekśpiertaŭ pa štučnym intelekcie ličać, što halina jašče vielmi dalokaja ad kampjutarnaha rozumu.

Niekatoryja daśledčyki štučnaha intelektu ŭžo daŭno robiać aptymistyčnyja zajavy ab tym, što hetyja technałohii chutka stanuć razumnymi, ale mnohija inšyja chutka adprečvajuć hetyja śćviardžeńni. «Kali b vy vykarystoŭvali hetyja sistemy, vy nikoli b nie kazali takija rečy», — skazaŭ Emaad Chvadža, daśledčyk Kalifarnijskaha ŭniviersiteta ŭ Bierkli i Kalifarnijskaha ŭniviersiteta ŭ San-Francyska, jaki vyvučaje hetyja technałohii.

Spadar Lemuan, vajenny vieteran, jaki nazvaŭ siabie śviatarom, byłym źniavolenym i daśledčykam štučnaha intelektu, skazaŭ kiraŭnikam Google, što, na jaho dumku, LaMDA źjaŭlajecca dziciem siami abo vaśmi hadoŭ.

Jon chacieŭ, kab kampanija zaručyłasia zhodaj kampjutarnaj prahramy, pierš čym pravodzić ź joj ekśpierymienty. Jaho pretenzii byli zasnavanyja na jaho relihijnych pierakanańniach, jakija, pavodle jaho słoŭ, dyskryminavaŭ adździeł kadraŭ kampanii.

«Jany staviać pad sumnieŭ majo zdarovaje, — kaža Lemuan, — Jany spytali: «Vy daŭno praviaralisia ŭ psichijatra?»». Za niekalki miesiacaŭ da taho, jak jaho vysłali ŭ adpačynak, kampanija prapanavała jamu ŭziać adpačynak pa stanie psichičnaha zdaroŭja.

Technałohija Google — heta niejronavaja sietka, jakaja źjaŭlajecca matematyčnaj sistemaj, što navučajecca šlacham analizu vialikich abjomaŭ danych. Naprykład, dakładna vyznačajučy zakanamiernaści na tysiačach fotazdymkaŭ kotak, jana moža navučycca raspaznavać kotku.

Za apošnija niekalki hadoŭ Google i inšyja viadučyja kampanii raspracavali niejronavyja sietki, jakija analizavali ahromnistuju kolkaść tekstaŭ, uklučna ź nieapublikavanymi tvorami i tysiačami artykułaŭ u Vikipiedyi.

Hetyja «vialikija moŭnyja madeli» mohuć być užytyja da mnohich zadačaŭ. Jany mohuć abahulniać artykuły, adkazvać na pytańni, stvarać tvity i navat pisać paviedamleńni ŭ błohu.

Ale jany vielmi niedaskanałyja. Časam jany stvarajuć idealny tekst. Časam jany vydajuć biazhłuździcu. Sistemy vielmi dobra adnaŭlajuć madeli, jakija jany bačyli ŭ minułym, ale nie mohuć razvažać jak ludzi.

• 15
• 0
• 11
• 8
• 5
• 2
• 2
• 0