Vieniesuełka, jakaja bolš za 10 hadoŭ žyvie ŭ Biełarusi, nazvała piać rečaŭ, jakija jaje dahetul ździŭlajuć

Kajła Pinieda žyvie ŭ Biełarusi bolš za dziesiać hadoŭ i zamužam za biełarusam. Na svaim jutub-kanale ConKay, jaki maje kala 6,3 tysiačy padpisčykaŭ, jana znajomić zamiežnikaŭ z paŭsiadzionnym žyćciom biełarusaŭ — ad cen u kramach da taho, jak vyhladajuć kvatery ŭ spalnych rajonach. Novaje videa jana pryśviaciła apoviedu pra piać rečaŭ, źviazanych ź Biełaruśsiu, jakija jaje dahetul ździŭlajuć.

1. Praciahłyja tosty

Pieršaje, što Kajłu dahetul zachaplaje, — biełaruskija dni naradžeńnia.

«U Biełarusi, kali ŭ kahości dzień naradžeńnia, zvyčajna źbirajuć siabroŭ ci siamju — doma abo ŭ restaranie. Ale samaje cikavaje pačynajecca tady, kali hučać tosty. I sprava nie tolki ŭ tym, kab padniać kielich sa słovami: «Za tvajo zdaroŭje, siabar!» — nie, kožny hość kaža sapraŭdy pryhožyja i hłybokija słovy, zhadvaje cikavyja historyi, adznačaje vašy asabistyja jakaści i navat toje, čaho vy sami ŭ sabie možacie nie zaŭvažać».

«Kali za stałom 20 čałaviek — rychtujsia, pramovaŭ budzie šmat», — śmiajecca błohierka.

Kajła pryhadvaje, što adna ź jaje siabrovak pryśviaciła joj svoj vierš, jaki jaje vielmi rasčuliŭ. Mienavita ŭ takija momanty, kaža jana, bačna, jakija biełarusy ramantyčnyja i ŭvažlivyja da detalaŭ, i razburajecca stereatyp pra chałodnych i strymanych ludziej.

Pa słovach žančyny, u Vieniesuele taksama lubiać śviatkavać i nie škadujuć ciopłych słoŭ, ale tak hłyboka i asabista pierad usimi haściami tam zvyčajna nie havorać.

2. Pracoŭnaja subota

Druhi punkt vyklikaje ŭ błohierki našmat mienš entuzijazmu — heta pieranosy pracoŭnych dzion. Kajła tłumačyć, što kali śviata vypadaje, naprykład, na aŭtorak, to paniadziełak mohuć zrabić vychadnym. Ale potym daviadziecca adpracavać u subotu.

Ździŭlaje jaje i toje, što kalandar pieranosaŭ na nastupny hod možna znajści ŭ internecie jašče da zakančeńnia hetaha hoda.

«Darečy, mnohija kampanii płanujuć svaje mierapryjemstvy ŭ kancy hoda z ulikam hetych asablivaściej. U čaćvier jany śviatkujuć, u piatnicu adpačyvajuć paśla viečaryny, a ŭ subotu — čas pracavać. Dumaju, u Łacinskaj Amierycy takaja sistema doŭha nie pratrymałasia b. Prynamsi ŭ Vieniesuele — dakładna», — kaža błohierka.

3. Hryby — sprava adkaznaja

Treciaja reč, na jakuju źviartaje ŭvahu aŭtarka, — heta pachody ŭ les u hryby.

Kajła pryznajecca, što sama pakul nie advažvajecca dałučycca da tradycyi. Nie z bajaźlivaści, padkreślivaje jana, a z adkaznaści: hryboŭ vielmi šmat, i častka ź ich atrutnyja. Błohierka žartuje, što baicca napoŭnić košyk jak napałovu halucynahiennymi hrybami abo takimi, paśla ŭžyvańnia jakich nie vyžyvie.

«Całkam mahčyma, što ničoha drennaha i nie zdarycca, ale ja sapraŭdy staŭlusia da hetaha z pavahaj i zachapleńniem, bo baču, jak ludzi adpraŭlajucca na pošuki navat u chałodnaje nadvorje. Jany ciopła apranajucca i mohuć hadzinami chadzić pa lesie — i ŭsio dziela taho, kab napoŭnić svaje košyki hrybami. I bolš za ŭsio mianie zabaŭlaje i navat kranaje toje, jak babuli hadzinami chodziać sahnuŭšysia, źbirajučy hryby, pakul ad pastajannych nachiłaŭ u ich nie pačynajuć baleć ściohny.

Ale jany całkam zadavolenyja svaimi hrybočkami, napaŭniajuć imi košyki, kab potym pryhatavać supy ci marynady», — raskazvaje žančyna i pakazvaje słoiki z marynavanymi hrybami, jakija joj padaryła babula muža.

Najbližejšy vieniesuelski anałah pachodaŭ biełarusaŭ u hryby, jaki jana znajšła, — zbor dzikaj jahady mai, ź jakoj hatujuć desiert macamoru.

4. Šmat sałodkaha

Čaćviortaja reč, da jakoj nie moža pryzvyčaicca vieniesuełka, — heta kolkaść sałodkaha.

«Ujavicie: vośmaja hadzina ranicy, a niečy śniadanak składajecca vyklučna z kavałka torta, jaki zastaŭsia z učorašniaha dnia naradžeńnia. Heta pra majho muža», — raskazvaje z humaram Kajła.

Pa nazirańniach błohierki, u Biełarusi na praciahu dnia časta pjuć harbatu, da jakoj abaviazkova padajuć piačeńnie, šakaład, pončyk ci desiert, nabyty ŭ kramie ci pryhatavany doma.

«U pieravažnaj bolšaści biełaruskich siemjaŭ zaŭsiody jość jomistaść, poŭnaja prysmakaŭ, desiertaŭ i šakaładu, jakimi možna čas ad času pierakusić na praciahu dnia. Da taho ž typovyja śniadanki ŭ hetaj krainie taksama zvyčajna sałodkija», — śćviardžaje błohierka.

U Vieniesuele, kaža Kajła, sałodkaje taksama lubiać, ale pakidajuć jaho chutčej dla śviataŭ. U Biełarusi ž, zdajecca, lubaja sustreča — nahoda dla desiertu. Jak dokaz jana pakazvaje piasočny piroh, jaki susiedka pryniesła joj napiaredadni a pałovie na adzinaccatuju viečara.

5. «Dzie moj piarścionak?»

Apošni punkt Kajła nazyvaje samym dalikatnym. Heta kolkaść adzinokich žančyn siarod jejnych znajomych.

«Viadoma, u kožnaj svaja ŭnikalnaja historyja. Prosta časam čakańni nie supadajuć, bo hetyja žančyny šukajuć stabilnych adnosin, u toj čas jak niekatoryja mužčyny nie hatovyja da takich abaviazacielstvaŭ», — davodzić błohierka i pryhadvaje Arynu Sabalenku:

«Nie viedaju, ci zaŭvažali vy, jak biełaruskaja tenisistka Aryna Sabalenka časta žartavała, prosta na korcie źviartajučysia da svajho brazilskaha chłopca z pytańniem: «Nu i dzie moj piarścionak?»

Paśla 30 hadoŭ, kaža błohierka, na žančyn pačynaje cisnuć uzrost i čakańni svajakoŭ. Adna jaje siabroŭka niadaŭna pieražyła depresiju i źviartałasia z hetaj pryčyny da psichołaha.

• 1
• 0
• 1
• 1
• 0
• 0
• 0
• 1