Hihin prapanavaŭ zapatrabavać u Polščy reparacyj za 1920-1930-ja hady
Pra heta ŭ efiry «Alfa Radyjo» zajaviŭ staršynia tavarystva «Viedy», eks-dekan fiłasofskaha fakulteta BDU Vadzim Hihin, kamientujučy navinu pra toje, što Polšča zapatrabavała ad Niamieččyny vialikich reparacyj, kala 1,3 trłn jeŭra, za Druhuju suśvietnuju vajnu, piša «SB — Biełaruś siońnia».
Hihin adznačyŭ, što patrabujučy reparacyj ad Niamieččyny, Polšča, pa sutnaści, pryznaje vyniki Druhoj suśvietnaj vajny. U suviazi z hetym jon ličyć, što «svoj rachunak Polščy vystavić možam i my».
«Hiermanija, prynamsi ciapierašni ŭrad, pakajałasia ŭ złačynstvach nacystaŭ. A kirujučyja koły Polščy, niezaležna ad taho, kansiervatary jany ci libierały, pakajalisia ŭ złačynstvach Piłsudskaha? Dy jany jamu staviać pomniki, jon u ich nacyjanalny hieroj», — adznačyŭ prapahnandyst.
«Ja liču, što całkam razumna nam — historykam i palitykam — pačać praces, prynamsi na ŭzroŭni hramadskich słuchańniaŭ (my budziem źviartacca i ŭ naš parłamient), kab my padličyli, jakaja škoda była naniesienaja Biełarusi polskim panavańniem».
Na dumku Hihina škoda zaklučałasia ŭ štučnym zatarmožvańni raźvićcia hetaj terytoryi, u pryvatnaści, pramysłovaści. U vypampoŭvańni z zachodnich abłaściej sielskahaspadarčych resursaŭ, u zanižanaj apłacie rabotnikam, škoda była naniesienaja ŭ kulturnaj palitycy.
«Ci možam my hety rachunak pradjavić palakam? Viadoma ž, možam. Jość i pravavaja pierśpiektyva dla padobnaha razboru. Polski ŭrad tady, asabliva paśla majskaha pieravarotu 1926 hoda, faktyčna nie vykonvaŭ mnohija pałažeńni Ryžskaha dahavora, jaki nie prosta padzialaŭ terytoryju, a harantavaŭ nacyjanalnym mienšaściam u ramkach Rečy Paspalitaj pravy i svabody», — miarkuje Hihin
Kamientary