Kab raspłacicca z doŭham, Šry-Łanka pieradaść Kitaju 100 tysiač makak. Ale dla čaho?
Hetaja historyja, mahčyma, nie takaja śmiešnaja, jak moža padacca ŭ pačatku.
Ułady Šry-Łanki płanujuć adpravić 100 tysiač cejłonskich makak — hetyja samyja maleńkija siarod małpaŭ žyvuć tolki na hetym vostravie — Kitaju ŭ jakaści vypłaty zamiežnaha doŭhu pierad hetaj krainaj. Pra heta 18 krasavika paviedamiła vydańnie The Times.
Jak stała viadoma, na takich umovach ździełki nastajaŭ sam Kitaj.
Kitajskija čynoŭniki śćviardžajuć, što źviarkoŭ raźmieściać u zaaparkach, adnak tavarystvaŭ pa abaronie žyvioł i pravaabarončyja arhanizacyi sumniajucca ŭ praŭdzivaści takoj zajavy. U Kitai jość tolki 18 zaaparkaŭ z mahčymaściu raźmiaščać taki typ žyviołaŭ, i va ŭsich ich razam moža źmiaścicca tolki 5 tysiač małpaŭ.
«Spačatku my dumali, što ich chočuć zarezać na miasa, ale potym my atrymali inšuju infarmacyju. Ciapier my całkam pierakananyja, što makaki trapiać u łabaratoryi na bijałahičnyja ekśpierymienty, bo isnuje vialiki popyt, asabliva paśla Covid, na takich maleńkich łabaratornych žyvioł. Adnak jak ich buduć vyłoŭlivać. A pieravozić? Ciažka sabie ŭjavić», — skazaŭ Chiemanta Uitanadž z Centra ekałahičnaj spraviadlivaści ŭ Kałomba.
Pavodle jaho słoŭ, u Šry-Łanki pa stanie na siaredzinu 1970-ch žyło kala 600 tysiač cejłonskich makak, paśla hetaha pierapisy papulacyi nie pravodzilisia. U kožnym razu, pahašeńnia doŭhu pierad Kitajem makakami — heta, na jahonuju dumku, «žudasny los dla hetych žyvioł».
A mižnarodnaja niekamiercyjnaja arhanizacyja PETA (People for the Ethical Treatment of Animals — Ludzi za etyčnyja adnosiny da žyvioł) taksama naŭprost zajaŭlaje, što makak u kitajskich łabaratoryjach buduć «źmiaščać u kletki, atručvać, rezać i zabivać» i što heta pastavić ich vid na miažu źniknieńnia.
Što padviało Šry-Łanku da takoha stanovišča i takoj ździełki?
Jak my pisali raniej, u Šry-Łancy letaś prajšli biesprecedentna masavyja akcyi pratestu z pryčyny surjoznaha ekanamičnaha kryzisu. Kavid padsiok hałoŭny korań ekanomiki krainy — śfieru turyzmu. Na heta nakłalisia nastupstvy nieefiektyŭnaha kiravańnia krainaj — krainu ŭznačalvaŭ prakitajski ŭrad, jaki rabiŭ staŭku na kitajskija inviestycyi i kredyty.
Šry-Łanka vymušanaja była aficyjna abviaścić defołt. U vyniku akcyi pratestu pryviali da ŭciokaŭ prezidenta Šry-Łanki Hatabai Radžapaksy i jaho siamji za miažu i źmieny ŭłady ŭ krainie. Adnak heta nie vyrašyła ekanamičnych prablem i pytańniaŭ vypłaty źniešnich daŭhoŭ — pierad Kitajem pierš za ŭsio.
Jak adznačaje The Times, Kitaj u ramkach inicyjatyvy «Adzin pojas — adzin šlach» inviestavaŭ vializnyja hrošy ŭ infrastrukturu Šry-Łanki, i asabliva u jaje stratehičny marski port Chambantota, jaki byŭ całkam pabudavany za košt kitajskaha kredytu.
I zaraz koštam losu 100 tysiač cejłonskich makak Šry-Łanka sprabuje vypłacić 7 miljardaŭ dalaraŭ doŭhu Kitaju za jaho inviestycyi.
Darečy, źniešni doŭh Biełarusi pierad adnym ź jaje hałoŭnych inviestaraŭ, Rasijaj, na dadzieny momant składaje zvyš 8,5 miljarda dalaraŭ.
Ciapier čytajuć
Stała viadoma, dzie pracuje favarytka Łukašenki Uładlena Zajcava9
Kamientary