U Polščy buduć sudzić bandu, jakaja rabavała hruzaviki. Z 13‑ci padsudnych piaciora biełarusy

Jak paviedamili Nacyjanalnaja prakuratura Polščy i Centralnaje śledčaje biuro palicyi, złačyncy padčas napadaŭ apranali formu z emblemami palicyi. Heta dazvalała im zaśpieć achviar źnianacku: kiroŭcy nie adrazu razumieli, što majuć spravu z rabaŭnikami. Paśla hetaha napadniki źbivali ludziej i pazbaŭlali ich svabody. Kab uskładnić vyjaŭleńnie aŭtamabilaŭ, jakimi karystalisia bandyty, niepasredna pierad napadami jany stavili na ich padroblenyja numarnyja znaki.

Złačynnuju hrupu cikavili nie tolki cyharety, ale i inšyja nielehalnyja tavary. Napadniki raźličvali na toje, što paciarpiełyja nie buduć źviartacca ŭ palicyju, bo sami pieravozili niezakonny hruz i ŭ vypadku zvarotu mahli b taksama trapić pad sud.

Pierałom u rasśledavańni nastupiŭ u mai 2025 hoda, kali paśla šerahu nieraskrytych napadaŭ palicyja zatrymała siem čałaviek — dvuch hramadzian Polščy i piaciarych biełarusaŭ. Zatrymańni adbylisia pieravažna ŭ Varšavie i vioscy Viališaŭ Mazavieckaha vajavodstva. Padčas pieratrusaŭ u padazravanych znajšli značny arsienał zbroi: karotka– i daŭhastvolnuju ahniastrelnuju zbroju, bolš za 1200 patronaŭ roznych kalibraŭ, śvietłašumavyja i dymavyja hranaty, 2,4 kiłahrama vybuchovych rečyvaŭ i roznyja pryłady.

Dalejšaje rasśledavańnie, pieratrusy i dopyty dapamahli vyjści na inšych udzielnikaŭ bandy. U Ispanii zatrymali jašče dvuch hramadzian Polščy, u tym liku mierkavanaha kiraŭnika hrupoŭki. Na padstavie jeŭrapiejskich ordaraŭ na aryšt ich dastavili ŭ Polšču.

Pavodle infarmacyi haziety Rzeczpospolita, zatrymanyja biełarusy žyli ŭ Polščy. U adnaho ź ich u miežach kryminalnaj spravy zabrali pašpart. Aficyjna jon nie pracuje, jašče adzin zatrymany zaniaty ŭ handli.

Heta nie pieršaja viadomaja historyja napadaŭ na hruzaviki z udziełam biełarusaŭ. U kastryčniku 2019 hoda ŭ Hiermanii palicyja zatrymała piaciarych hramadzian Biełarusi, usie jany byli z Oršy. Ich hrupoŭka na praciahu niekalkich hadoŭ ździejśniła bolš za 60 napadaŭ na fury, pieravažna ŭ rajonie Hanoviera. Banda, jakoj, pavodle paviedamleńniaŭ ŚMI, kiravaŭ aršanski kryminalny aŭtarytet, žyła ŭ Oršy, ale rehularna vyjazdžała za miažu dla ździajśnieńnia złačynstvaŭ.

U supracoŭnictvie ź Jeŭrapałam śledčyja vyśvietlili, što hrupoŭka dziejničała nie tolki ŭ Hiermanii, ale i ŭ Francyi. U jaje rasparadžeńni byli niekalki hruzavikoŭ i lehkavych aŭtamabilaŭ, jakija dazvalali pierahružać skradzienyja tavary i ŭciakać ad palicyi. Dla suviazi i načnych apieracyj złačyncy vykarystoŭvali racyi i ciepłavizary.

Jak paviedamlaŭ telekanał ANT, bandu vykryli vypadkova — padčas rasśledavańnia inšaha złačynstva. Mierkavany kiraŭnik hrupoŭki, viadomy ŭ Oršy i Biełarusi jašče z 1990‑ch hadoŭ, nibyta paraniŭ padčas svarki byłoha ŭdzielnika bandy. Palicyja pačała raźbiracca ŭ abstavinach i ŭ vyniku znajšła hruzavik złačyncaŭ, u jakim znachodzilisia skradzienyja televizary. Pra prysudy ŭdzielnikam toj hrupoŭki ŚMI nie paviedamlali.

U 2024 hodzie MUS Biełarusi paviedamiła pra zatrymańnie ŭdzielnikaŭ jašče adnoj bandy, jakaja napadała na hruzaviki, ale ŭžo na terytoryi Biełarusi. Jaje ŭdzielnikami taksama byli žychary Oršy va ŭzroście ad 34 da 51 hoda. Narabavanyja tavary jany zbyvali pieravažna ŭ susiedniaj Rasii.

• 4
• 0
• 0
• 1
• 0
• 0
• 0
• 0