Sankcyi ES mohuć pašyrycca na kitajskija kampanii za pastaŭki ŭ Rasiju. Kitaj papiaredžvaje pra nastupstvy
Jeŭrapiejski sajuz moža ŭvieści sankcyi ŭ dačynieńni da niekalkich kitajskich kampanij za pastaŭki elektroniki ŭ Rasiju. U Brusieli ličać, što pradukcyja hetych firmaŭ moža vykarystoŭvacca ŭ vytvorčaści zbroi. Pra heta paviedamlaje Financial Times.
U 11-y pakiet sankcyj suprać Rasii mohuć być dadadzienyja siem kampanij z Kitaja. 3HC Semiconductors i King-Pai Technology z macierykovaj častki krainy, a taksama piać z Hankonha: Alpha Trading Investments, Sinno Electronics, Sigma Technology, Asia Pacific Links i Tordan Industry.
Kampanii zajmajucca vytvorčaściu mikračypaŭ, paŭpravadnikoŭ i inšaj elektroniki. Taksama pad sankcyi mohuć trapić dva vytvorcy z AAE i adzin z Armienii. Adznačajecca, što pad abmiežavańni mohuć patrapić i iranskija kampanii.
Niekatoryja ź pieraličanych kitajskich kampanij užo znachodziacca pad sankcyjami z boku ZŠA.
Kali novyja abmiežavańni buduć pryniatyja, to heta stanie pieršym vypadkam ich prymianieńnia z boku Jeŭrasajuza ŭ dačynieńni da kampanij z Kitaja ŭ ramkach sankcyjnaj palityki suprać Rasii.
U adkaz na pašyreńnie infarmacyi pra mahčymyja sankcyi Kitaj zaklikaŭ Jeŭrasajuz «nie rabić pamyłku».
«Kali paviedamleńni ŚMI akažucca praŭdaj, padobnyja dziejańni jeŭrapiejskaha boku surjozna padarvuć uzajemny davier i supracoŭnictva pamiž JEZ i Kitajem. Jeŭrapiejskamu boku nie varta rabić pamyłku, u advarotnym vypadku Piekin budzie vymušany rašuča abaranić svaje racyjanalna abhruntavanyja zakonnyja pravy», — zajaviŭ aficyjny pradstaŭnik MZS KNR Van Veńbiń.
Kamientary
https://www.unian.ua/economics/transport/antirosiyski-sankciji-g7-vdarit-po-tinovomu-flotu-kremlya-12249042.html