«Žurnalistyka — heta nie złačynstva». Arhanizacyja «Reparciory bieź miežaŭ» dałučyłasia da maštabnaj akcyi salidarnaści z zatrymanymi biełaruskimi žurnalistami
Da marafonu, jaki ładzić Biełaruskaja asacyjacyja žurnalistaŭ, dałučyłasia štab-kvatera arhanizacyi «Reparciory bieź miežaŭ» u Paryžy, a taksama jaje ofisy ŭ 12-ci krainach śvietu.
Mižnarodnaja arhanizacyja «Reparciory bieź miežaŭ» (RSF) dałučyłasia da akcyi salidarnaści ź biełaruskimi palitviaźniami-žurnalistami ŭ 12-ci krainach śvietu. Pra heta 31 lipienia arhanizacyja paviedamiła na svaim aficyjnym sajcie.
Akcyja ŭjaŭlała saboj raźmiaščeńnie partretaŭ dziasiatkaŭ zatrymanych režymam Łukašenki žurnalistaŭ kala ofisaŭ arhanizacyi. Jak adznačaje RSF, vykazvańnie salidarnaści prymierkavana da razhladu Viarchoŭnym sudom Biełarusi apielacyi fihurantaŭ pa «spravie Tut.by» Ludmiły Čekinaj i Maryny Zołatavaj.
U akcyi paŭdzielničali štab-kvatera RSF u Paryžy, a taksama ofisy ŭ Bierlinie, Brusieli, Ženievie, Łondanie, Stakholmie, Vienie, Vašynhtonie, Tunisie, Dakary, Tajbei i Rya-de-Žaniejra.
«Žurnalistyka — heta nie złačynstva, złačynstvam jość pieraśled žurnalistaŭ. Machavik represij u dačynieńni da niezaležnych miedyja Biełarusi navat praz try hady paśla padziej 2020 hoda tolki nabiraje abaroty, a žurnalistaŭ asudžajuć na žachlivyja terminy. RSF padtrymlivaje našych partnioraŭ z Biełaruskaj asacyjacyi žurnalistaŭ i zaklikaje da nieadkładnaha vyzvaleńnia dziasiatkaŭ žurnalistaŭ u Biełarusi», — zajaviła arhanizacyja «Reparciory bieź miežaŭ».
Nahadajem, što ŭ hety momant u biełaruskich turmach znachodzicca 36 supracoŭnikaŭ miedyja, aryštavanych za vykanańnie svaich prafiesijnych abaviazkaŭ, a taksama za niazhodu sa sfalsifikavanymi prezidenckimi vybarami, hvałtam i represijami ŭ krainie.
U ich lik uvachodziać i redaktary «Našaj Nivy» Jahor Marcinovič i Andrej Skurko, jakija ŭtrymlivajucca za kratami z 8 lipienia 2021 hoda.
Śpiavak Dźmitryj Kałdun pakazaŭ svaju minskuju kvateru niedaloka ad Drazdoŭ ŠMAT FOTA16
Kamientary