Ci viedajecie vy, što z vami budzie, kali vam padaduć niedastatkova pravaranyja hryby šyitakie?

U tematyčnym daśledavańni, apublikavanym u kastryčniku ŭ New England Journal of Medicine, daktary apisvajuć, jak u niebaraki raźviłasia redkaje zachvorvańnie skury z-za ŭžyvańnia niedastatkova apracavanych hryboŭ šyitakie. 72-hadovy mužčyna naviedaŭ miascovaje adździaleńnie nieadkładnaj dapamohi ŭ Ženievie praz dva dni paśla taho, jak u jaho absypała śpinu i vierch siadališča, dyj śviarbieła. Śviarbieła tak mocna, što čałaviek nie moh zasnuć.

Vyhladała vysypka dziŭna — čyrvonyja pałosy, nibyta čałavieka bizunom bili. Daktary pastavili dyjahnaz: žhucikavaja erytema. Takuju vyklikajuć niekalki tryhieraŭ: naprykład, uździejańnie supraćrakavaha preparatu bleamicynu, piša Gizmodo. Ale kali mužčyna raskazaŭ, što za dva dni da hetaha jon hatavaŭ hryby šyitakie, lekary vykazali zdahadku, što jaho prablema — heta tak zvany «dermatyt šyitakie».

Hetaje zachvorvańnie skury zvyčajna ŭźnikaje praź dzień-dva paśla ŭžyvańnia niedastatkova apracavanych abo syrych šyitakie (Lentinula edodes). Nie zusim zrazumieła, čamu heta adbyvajecca, ale asnoŭnaja na siońnia teoryja palahaje ŭ tym, što heta taksičnaja reakcyja abo reakcyja hipieradčuvalnaści na lentynan (lentinan), składany vuhlavod, jaki ŭ vialikaj kolkaści ŭtrymlivajecca ŭ šyitakie. Lentynan raspadajecca pry dastatkovaj tempieratury, tamu spažyvańnie dobra apracavanych hryboŭ nie vyklikaje vysypki. Ličycca, što heta niezvyčajnaje ŭskładnieńnie navat dla amataraŭ syrych abo niedavaranych šyitakie; jano raźvivajecca prykładna tolki ŭ 2% ludziej, jakija spažyvajuć hetyja papularnyja ŭ Japonii hryby.

Pavialičyć

Niahledziačy na ​​rezki vyhlad vysypki, dermatyt šyitakie, padobna, nie vyklikaje bolš surjoznaj abo niebiaśpiečnaj dla žyćcia alerhičnaj reakcyi, viadomaj jak anafiłaksija (ci anafiłaktyčny šok). Stan prachodzić samastojna praź niekatory čas. U apisanym vypadku mužčynu rekamiendavali z hetaha momantu ŭvažliva i ŭ poŭnaj miery hatavać hryby; jamu taksama davali steroidy miascovaha dziejańnia i pieraralnyja antyhistaminnyja preparaty, kab palehčyć simptomy. Padčas nastupnaha ahladu praz dva tydni na jaho skury ŭsio jašče zastavalisia niekatoryja reštkavyja ŭčastki z hipierpihmientacyjaj, ale śvierb źnik.

Dermatyt šyitakie redka sustrakajecca pa-za miežami azijackich krain, dzie hetyja hryby čaściej za ŭsio ŭžyvajuć u ježu. Ale rost papularnaści šyitakie va ŭsim śviecie prymusiŭ niekatorych lekaraŭ papiaredzić, što apisany vypadak vierahodna stanie bolš rehularnaj źjavaj i ŭ inšych miescach.

• 1
• 0
• 1
• 1
• 13
• 2
• 1
• 0