U vojsku Izraila patłumačyli seksizmam pravał u adbićci ataki CHAMAS: nazirańni za Paleścinaj u Izraili viaduć žančyny

Padraździaleńnie izrailskaha vojska, jakoje zajmałasia nazirańniem za miažoj ź siektaram Haza, papiaredžvała kamandavańnie ab padazronaj aktyŭnaści bajevikoŭ, ale hetyja paviedamleńni ihnaravalisia. 

Pa słovach vajskoŭcaŭ, kamandavańnie nie nadavała ŭvahi hetym paviedamleńniami z-za sieksizmu i ejdžyzmu.

«Heta atrad, jaki składajecca vyklučna z maładych dziaŭčat i maładych žančyn-kamandziraŭ. Niama sumnievaŭ, što kali b la hetych ekranaŭ siadzieli mužčyny, usio było b pa-inšamu», — raspavioŭ adzin z sałdat. 

U spravazdačach źmiaščałasia infarmacyja ab padrychtoŭcy bajcoŭ hrupoŭki CHAMAS pa pieraadoleńni zaharod, aktyŭnym vykarystańni transpartnych srodkaŭ, abstalavańni dla adklučeńnia kamier, jakoje raptam źjaviłasia. 

Hrupy žančyn-naziralnic uvachodziać u Korpus pamiežnaj abarony i dziejničajuć uzdoŭž miežaŭ krainy. Ich nazyvajuć «vačami armii» za pradastaŭleńnie CACHAŁ raźvieddanych u režymie 24/7. Słužačyja źbirajuć infarmacyju z dapamohaj kamier i datčykaŭ, paśla čaho pieradajuć paviedamleńni słužbie raźviedki. Nazirańniem zajmajucca tolki žančyny, adznačała Haaretz u 2022-m. U tym hodzie niekalki vajskoŭcaŭ žanočaha połu paskardzilisia haziecie na hrebavańnie z boku kamandavańnia i nievynosnyja ŭmovy słužby. 

Vajskovaja pa imieni Iłana raspaviała vydańniu, što bajeviki za dva miesiacy pierad atakaj pačali zapuskać bieśpiłotniki štodnia, aparaty blizka padlatali da aharodžy. Za paŭtara miesiaca da ataki vajskoŭcy zaŭvažyli, jak na adnym z trenirovačnych łahieraŭ CHAMAS pabudavali dakładnuju kopiju nahladalnaha punkta CACHAŁ, bajeviki pačali adpracoŭvać napad na hety abjekt. 

Pavodle jaje słoŭ, papiaredžańnie ab hetym było praihnaravana. Inšy nienazvany sałdat raspavioŭ, što bačyŭ, jak u Hazie pabudavali dakładnuju kopiju tanka «Mierkava Mark 4» i adpracoŭvali jaho źniščeńnie.

Akramia taho, poźniaj nočču 7 kastryčnika, u dzień napadu, kamandavańnie vojska ŭsio ž padniało tryvohu paśla napadaŭ na nasielenyja punkty, adnak padraździaleńni naziralnikaŭ ab hetym nie papiaredzili.

«CACHAŁ pakinuła nas lohkaj zdabyčaj. Bajcy prynamsi mieli zbroju i byli zabityja jak hieroi. Žančyny-raźviedčyki byli kinutyja vojskam i prosta zabityja, nie majučy mahčymaści abaranicca», — skazała słužačaja pa imieni Jara.

Krynicy Reuters u izrailskich śpiecsłužbach pryznavali, što padrychtoŭki CHAMAS byli zaŭvažanyja, adnak bajevikam udałosia pierakanać Tel-Aviŭ u niežadańni vajny i zasiarodžvańni na ekanamičnych pytańniach. Hrupoŭka naraŭnie z kanałami suviazi, što prasłuchoŭvalisia Izrailem, vykarystoŭvała tyja, pra jakija ŭ CACHAŁ nie viedali. «Jany stvarali alternatyŭnuju realnaść», — skazaŭ były namieśnik kiraŭnika izrailskaj Rady nacyjanalnaj biaśpieki Eran Ecyjon.

• 2
• 0
• 0
• 33
• 2
• 6
• 20
• 0