U Połacku kanduktarka vysadziła piacikłaśnika z aŭtobusa — dziciaci pryjšłosia iści 5 kiłamietraŭ u zaviruchu
Dziesiacihadovy školnik u Połacku nie zmoh dabracca dadomu na aŭtobusie: jaho vysadziła kanduktarka. «U mianie ŭsio trasiecca — za niejkija kapiejki», — dzielicca ŭ sacsietkach maci.
Sumnuju historyju pra svajho syna raspaviała ŭ tyktoku błohierka pad nikam @ksuartravel. U toj dzień chłopčyk zabyŭsia ŭziać najaŭnyja hrošy i ŭmudryŭsia zhubić niedzie ŭ škole daviedku navučenca.
Spačatku heta nie stvaryła dla jaho asablivych prablem, bo była karta navučenca ad Biełarusbanka — heta i propusk u navučalnuju ŭstanovu, i bankaŭskaja kartka, pryviazanaja da baćkoŭskaha rachunku. Na sajcie Biełarusbanka paznačana, što heta, u tym liku, «elektronny identyfikacyjny dakumient». Darečy, na im jość i fota ŭładalnika.
U kramie chłopčyk zmoh raźličycca za pakupki z dapamohaj kartki. A voś u aŭtobusie zdaryłasia niepryjemnaja situacyja.
«Kanduktarka kaža: «Hetyja kartki nie pracujuć». Tam napisana, što heta vučań, što jon vučycca ŭ škole. Syn dumaŭ tady raźličycca kartkaj, ale apłata nie prajšła. Dla školnikaŭ uvohule prajezd biaspłatny. Kanduktarka skazała pakazać daviedku ci apłacić prajezd. A hrošaj u dziciaci niama, kartaj nie atrymałasia raźličycca, daviedki ŭ jaho niama. I ŭjavicie voś ciapier, kali była hetaja zavirucha, jaho vysadzili z aŭtobusa i jon išoŭ pieššu. Jon nie moh nam patelefanavać, tamu što ŭ jaho jašče i telefon razradziŭsia», — kažučy heta, žančyna ledź strymlivaje ślozy.
«Ja prosta ŭ šoku. Ja ščyra kažu, što ja za čužoje dzicia zapłaciła b. Tym bolš tut bačna, što heta školnik. Jon pryjšoŭ uvieś mokry, źmiorzły. Jak možna vysadzić dzicia. U mianie ŭsio trasiecca — za niejkija kapiejki. Navošta my rabili hetyja kartki, kali jany nie pracujuć? Ja nie viedaju, jak možna być takimi biesčałaviečnymi. Treba ŭ kožnaj situacyi zastavacca ludźmi».
Videa nabrała amal paŭmiljona prahladaŭ, 24,5 tysiačy łajkaŭ i šmat aburanych kamientaryjaŭ. Bolšaść ludziej pahadziłasia z tym, što ŭ lubym vypadku nielha vysadžvać dzicia z aŭtobusa, asabliva zimoj, kali i ciamnieje rana, i na vulicy choładna.
Byli i tyja baćki, čyje dzieci sutykalisia z anałahičnaj prablemaj.
Miž inšym, Viciebskaja abłasnaja rada deputataŭ naprykancy minułaha hoda ŭniesła źmieny ŭ rašeńnie, jakoje rehuluje praviły prajezdu navučencaŭ u hramadskim transparcie: z 29 śniežnia 2023 hoda školniki majuć prava pradjaŭlać kanduktaram u tym liku i kartu navučenca.
Pra hety fakt u kamientaryjach taksama napisali. «Našamu aŭtaparku heta nie ŭkaz, jak akazałasia. U Połacku karty navučenca stali dziejničać u aŭtobusach tolki ad siońnia — paśla našaha videa i razmovy z dyrektaram», — adkazała błohierka.
Žančyna raspaviała, što napisała dźvie skarhi: adnu ŭ vykankam, druhuju ŭ aŭtapark. Jana taksama sustrełasia z dyrektaram aŭtaparka.
Telefanavała žančynie i namieśnica dyrektara aŭtaparka, sprabavała pierakanać u tym, što dzicia pavinna było samo adstojvać svajo prava jechać biaspłatna ŭ aŭtobusie, pakazać dziońnik.
«Darosły nie kožny saryjentujecca ŭ takoj situacyi, — paryravała błohierka. — Dzicia prosta pakazvała kartu, sprabavała apłacić joj prajezd. A što synu było rabić? Jon ža nie budzie biehać pa aŭtobusie ad kanduktarki, bicca ci jašče niešta. Jamu pryjšłosia vyjści».
Skončyłasia historyja tym, što baćki nabyli novy telefon, batareja ŭ jakim budzie trymać zarad daŭžej, čym u starym.
Ciapier čytajuć
Adstaŭny ministr-karupcyjanier pradaje reśpiektabielny katedž kala Drazdoŭ. Prosić $2 miljony2
Kamientary