Biełarusy zamiežža mohuć padtrymać biełaruskija inicyjatyvy, nie patraciŭšy svaich hrošaj. Jak heta zrabić
U Polščy i Litvie pražyvaje bolš za 200 tysiač biełarusaŭ. Tyja, chto pracujuć aficyjna, pry padačy padatkovaj dekłaracyi za minuły hod mohuć nakiravać 1,2—1,5% padachodnaha padatku na dziejnaść hramadskich arhanizacyj. Ničoha lišniaha vy nie patracicie — vy prosta majecie prava metava skiravać častku ŭžo spłačanaha vami padachodnaha na tyja ci inšyja hramadskija mety na vaš vybar. Voś jak heta robicca.
Polšča
U Polščy hramadskim arhanizacyjam, jakija majuć prava na atrymańnie achviaravańniaŭ, fizičnyja asoby mohuć pieravieści 1,5% padachodnaha padatku. Zrabić heta možna padčas padačy PIT-dekłaracyi.
Daviedacca, ci možna pieraličyć 1,5% padatku na rachunak abranaj vami arhanizacyi, možna pa spasyłcy. Dla hetaha treba ŭvieści NIP (anałah biełaruskaha UNP) arhanizacyi, nazvu abo KRS-numar (numar z nacyjanalnaha sudovaha rejestra).
Važna, što pry hetym vy ničoha nie hublajecie, bo hetyja 1,5% buduć vyličanyja ŭ lubym vypadku. Kali vy samastojna nie abiarecie arhanizacyju, jakuju chočacie padtrymać, polskaja dziaržava vyrašyć heta za vas i pieraliča hrošy ŭ arhanizacyi, jakija paličyć patrebnymi.
Litva
Padobnaja sistema isnuje i ŭ Litvie. Hałoŭnaje adroźnieńnie — što zamiest 1,5% možna pieraličyć 1,2%. Pry hetym možna nie abmiažoŭvacca adnoj arhanizacyjaj, a pieraličyć pa 0,6% adrazu dźvium. Vybrać možna lubuju hramadskuju arhanizacyju, jakaja maje status atrymalnika dabračynnaści.
Zrabić heta mahčyma padčas padačy hadavoj dekłaracyi, kali vy dojdziecie da punkta, na jakim vam prapanujuć achviaravać hetyja 1,2%. Pravieryć, ci možna padtrymać abranuju vami arhanizacyi, možna, uvioŭšy Imones kodas (anałah našaha UNP) arhanizacyi abo nazvu ŭ radok pošuku. Kali abranaja vami kampanija maje prava na atrymańnie achviaravańniaŭ, jana źjavicca ŭ hetym radku.
Kali vy nie vybierycie dla sabie, jakuju arhanizacyju chočacie padtrymać, jak i ŭ vypadku z Polščaj, za vas heta zrobić litoŭskaja dziaržava.
Čytajcie taksama:
Što pytalisia ŭ svajakoŭ palitviaźniaŭ, jakich masava zatrymlivali ŭčora? I pry čym tut «Jedastaŭka»
Aleś Alachnovič: Z 2012 hoda ekanomika Biełarusi vyrasła na 5%, a ekanomika Polščy, Litvy, Łatvii — na 40-45%
Kamientary