Lidar prarasijskaj ultrapravaj Słavackaj nacyjanalnaj partyi (SNS) i vice-śpikier słavackaha parłamienta Andrej Danka prapanavaŭ adnavić deputackija hrupy siabroŭstva z Rasijaj i Biełaruśsiu. Ab hetym jon napisaŭ u fejsbuk, zaŭvažyŭ reform.by.
«Nacyjanalnaja rada Słavakii śćviardžaje hrupy siabroŭstva ŭ kožny vybarčy pieryjad. Słavackaja nacyjanalnaja partyja choča, kab Nacyjanalnaja Rada Słavackaj Respubliki mieła dobryja adnosiny z usimi dziaržavami», — patłumačyŭ jon.
Danka ŭpeŭnieny, što «ŭzajemnaja kamunikacyja na parłamienckim uzroŭni zjaŭlajecca važnaj umovaj razumieńnia i supracoŭnictva» i takoje supracoŭnictva nielha abmiažoŭvać.
Jon spadziajecca na padtrymku takoha rašeńnia z boku partnioraŭ pa ŭradavaj kaalicyi partyi Smer-SD Robierta Fica i partyi «Hołas — sacyjalnaja demakratyja».
Słavacki palityk nahadaŭ ab admienie z 15 studzienia zabarony na kulturnaje supracoŭnictva z Rasijaj i Biełaruśsiu, jakuju inicyjavała novaja ministr kultury Słavakii i člen SNS Marcina Šymkoviča. Zabarona dziejničała z sakavika 2022 hoda i była ŭviedziena paśla maštabnaj ahresii Rasii suprać Ukrainy.
8 lutaha vice-śpikier parłamienta Słavakii Andrej Danka i jaho kaleha Lubaš Błaha sustrelisia ŭ Bracisłavie z Andrejem Dapkiunasam, pasłom Biełarusi ŭ Aŭstryi i Słavienii pa sumiaščalnictvie, pastajannym pradstaŭnikom Biełarusi pry ABSIE.
«Zaŭsiody rady pacisnuć ruku i abmianiacca dumkami sa ščyrymi siabrami Biełarusi, jakija zaŭsiody vystupajuć u intaresach sapraŭdnaha siabroŭstva pamiž narodami i abaraniajuć nacyjanalnyja intaresy svaich krain», — apisaŭ sustreču Dapkiunas.
Z 1996 hoda ES, ABSIE i ZŠA nie pryznali demakratyčnaj nivodnaj vybarčaj kampanii ŭ Biełarusi. Ciapier u Biełarusi idzie čarhovaja kampanija pa farmiravańni novaha składu dźviuch pałat Nacyjanalnaha schodu. Jana prachodzić na fonie masavych represij, tatalnaha padaŭleńnia svabody słova, pahromu hramadzianskaj supolnaści i zakryćcia ŭsich apazicyjnych palityčnych partyj.
Ciapier čytajuć
U Minsku budujuć novaje «Akreścina» ŭ hłuchoj pramzonie. A što budzie sa starym?8
Kamientary
Ale jana hetaha nie zrabiła za 4 hady. U vyniku siabroŭstva Słavakii z režymam Łukašenki adnovicca, a palitviaźni zastanucca hnić u turmie.