«Nacyjanalnaja śviadomaść — heta našaja zbroja i naš ščyt», — zajaviŭ namieśnik kiraŭnika Abjadnanaha pierachodnaha kabinieta, kiraŭnik Narodnaha antykryzisnaha ŭpraŭleńnia Pavieł Łatuška 24 sakavika ŭ Varšavie na akcyi da 106-j hadaviny abviaščeńnia niezaležnaści Biełaruskaj Narodnaj Respubliki, piša «Pozirk».
«Heta toje, dziakujučy čamu my, biełarusy, adnosna nievialikaja pa kolkaści nacyja, paraŭnoŭvajučy z uschodniaj impieryjaj, pa susiedstvu ź jakoj nam «paščaściła» isnavać, — zdoleła zachavacca, zdoleła vyžyć, niahledziačy na stahodździ rasijska-impierskaj i rasijska-savieckaj akupacyi. Niahledziačy na hvałtoŭnuju rusifikacyju, niahledziačy na teror, niahledziačy ni na što», — dadaŭ jon.
Łatuška ŭzhadaŭ padziei 1917—18 hadoŭ, balšavicki teror, stalinskija represii i «dziesiacihodździ SSSR».
«Praŭda pra Kurapaty, pieršy Čarnobylski šlach, nacyjanalny ŭzdym i ruch kanca 80-ch — pačatku 90-ch, abviaščeńnie Respubliki Biełaruś. I tak, na žal, prychod da ŭłady Łukašenki pry padtrymcy, znoŭ ža, Rasii. Źbićcio deputataŭ Viarchoŭnaha Savieta, haniebnyje refierendumy, zabojstvy palityčnych apanientaŭ, intehracyja z Rasijaj, utvareńnie Sajuznaj dziaržavy. Ale supraciŭ biełarusaŭ praciahvaŭsia», — skazaŭ eks-dypłamat.
Jon nahadaŭ pra pratesty 2006, 2010, 2017 hadoŭ, «revalucyjnyja padziei 2020 hoda, jakija, nasupierak isnavaŭšym na toj momant dumkam pra druhasnaść nacyjanalnaha składniku pratestu, prachodzili pad nacyjanalnym bieł-čyrvona-biełym ściaham».
Siońnia, padkreśliŭ palityk, u Biełarusi adbyvajecca «reakcyja i masavy teror».
«Majem tysiačy palitviaźniaŭ. Majem bolš za 136 tys. achviar złačynstvaŭ režymu Łukašenki suprać čałaviečnaści. Majem vajnu suprać Ukrainy, u jakoj režym Łukašenki ŭdzielničaje na baku Rasii suprać voli biełaruskaha naroda. Majem novuju pahrozu niezaležnaści i samomu isnavańniu našaj dziaržaŭnaści z boku Rasii praź dziejnaść prakramloŭskaha łukašenkaŭskaha režymu», — pieraličyŭ Łatuška.
«Našaja kraina i našaja nacyja bačyli bieźlič składanych časoŭ. Ale ž my žyviem», — dadaŭ kiraŭnik NAU.
Ciapier čytajuć
Kaśpiarovič pamior try dni tamu, ale cieła znajšli tolki ciapier1
Kamientary