19 lipienia z žanočaj kałonii na amierykanskim Siarednim Zachadzie vyjšła na volu Sandra Chiemie, jakaja adsiadzieła pierad hetym 43 hady. Tolki ciapier vyśvietliłasia, što asudzili na pažyćciovaje źniavoleńnie jaje praz pamyłku, piša Ruskaja słužba Bi-bi-si.
Niepadalok u parku haradka Čylikoci ŭ štacie Misury 64-hadovuju amierykanku čakali siastra, dačka i ŭnučka, raskazała ahienctva AR. Jany abnialisia i pierakinulisia paraj słoŭ, paśla čaho vyzvalenaja Chiemie adpraviłasia naviedać śmiarotna chvoraha baćku, admoviŭšysia havaryć z reparciorami.
Prakuror štata da apošniaha nie chacieŭ adpuskać žančynu, jakaja, jak akazałasia, była asudžanaja bieź viny 43 hady tamu. Jon zaciahvaŭ spravu niahledziačy na rašeńnie troch sudoŭ Misury: nižejšaj instancyi, apielacyjnaha, a paśla i Viarchoŭnaha.
Dźviery turmy adčynilisia dla Chiemie tolki paśla taho, jak sudździa pryhraziŭ pryciahnuć prakurora da kryminalnaj adkaznaści za niepavahu da sudu.
Sandru Chiemie asudzili da pažyćciovaha źniavoleńnia za zabojstva biblijatekarki nažom u 1980 hodzie. Adzinym dokazam tady było čystasardečnaje pryznańnie asudžanaj. Ale praz čatyry dziesiacihodździ spravu pierahledzieli i sud pryjšoŭ da vysnovy, što nasamreč Chiemie nie vinavataja.
U červieńskim rašeńni suda havorycca, što pryznańnie, atrymanaje ŭ psichijatryčnaj balnicy ŭ nakačanaj trankvilizatarami padazravanaj, składałasia ŭ asnoŭnym z adnaskładovych adkazaŭ na pytańni śledčych.
U toj ža čas palicyja praihnaravała inšyja dokazy, jakija śviedčać pra mahčymaje dačynieńnie da zabojstva adnaho ź jaje supracoŭnikaŭ (jaho ŭžo niama siarod žyvych, jon pamior u 2015 hodzie). Mašynu hetaha palicejskaha bačyli kala doma biblijatekarki ŭ dzień zabojstva, jon sprabavaŭ zapłacić jaje kredytnaj kartaj, a doma ŭ jaho znajšli zavušnicy zabitaj.
Paśla apraŭdańnia prakuror štata admaŭlaŭsia vypuskać Chiemie, telefanavaŭ načalniku turmy i asabista zabaraniaŭ jamu vykonvać rašeńnie suda. Jon da apošniaha sprabavaŭ asprečyć samy doŭhi niespraviadlivy prysud u historyi žanočych turmaŭ ZŠA i patrabavaŭ pakinuć Chiemmie za kratami kali nie za toje zabojstva, to choć by za praviny, učynienyja ŭ turmie, dzie jana adnojčy parezała brytvaj nahladčyka.
«Asudzić nievinavataha čałavieka akazałasia vielmi lohka, a voś vyzvalić — značna ciažej, — cytuje AR jaje advakata Šona O'Brajena. — Tak być nie pavinna».
Ciapier čytajuć
Raptoŭna pamior Uładzimir Usier — niemałady aktyvist, jaki ŭlapaŭsia ŭ film BT i špijanaž u Polščy19
Kamientary
psichatropy nasamreč strašennaja reč
u nas, na žal, z hetym horš navat, čym u rasiei