Pa śviecie raspaŭsiudžvajecca novy varyjant kavidu CHIES. Čym jon adroźnivajecca ad papiarednich

Upieršyniu hety varyjant byŭ znojdzieny ŭ Hiermanii ŭ červieni hetaha hoda, i z tych časoŭ vypadki XEC fiksavalisia ŭ Vialikabrytanii, ZŠA, Danii i niekalkich inšych krainach, źviartaje ŭvahu amierykanski navukoviec, dyrektar Instytuta Scripps Research Eryk Topał.

Jon piša, što raspaŭsiudžvańnie XEC «tolki pačynajecca». «Dla hetaha spatrebicca šmat tydniaŭ, para miesiacaŭ, a potym jon sapraŭdy ŭmacujecca i vykliča ŭłasnuju chvalu», — skazaŭ Topał haziecie LA Times.

«Całkam vidavočna, što XEC stanovicca asnoŭnym. Padobna na toje, što jon stanie nastupnym varyjantam. Ale da momantu, kali jaho raspaŭsiudžvańnie dasiahnie vysokich uzroŭniaŭ, projdzie niekalki miesiacaŭ», — ličyć jon.

XEC adroźnivajecca ad svaich papiarednikaŭ niekatorymi mutacyjami, jakija mohuć dapamahčy jaho bolš chutkamu raspaŭsiudžvańniu, adznačajuć navukoŭcy. Adnak jany ličać, što isnujučyja vakcyny pavinny dapamahčy praduchileńniu najbolš surjoznych nastupstvaŭ dla zdaroŭja čałavieka.

Farmaceŭtyčnaja industryja pastajanna abnaŭlaje vakcyny suprać karanavirusa i pakul jana nie adaptavała ich da novaha varyjantu. Ale heta nie aznačaje, što ciapierašnija vakcyny suprać jaho nie pracujuć.

Prafiesar Fransua Bału, kiraŭnik Instytuta hienietyki ŭ univiersiteckim kaledžy Łondana, skazaŭ Bi-bi-si, što ŭ XEC jość «nievialikaja pieravaha z punktu hledžańnia raspaŭsiudžvańnia» ŭ paraŭnańni z papiarednimi varyjantami,

adnak isnujučyja vakcyny pa-raniejšamu słužać ad jaho dobraj abaronaj.

Pa prahnozach Bału, całkam vierahodna, što XEC moža stać asnoŭnym varyjantam Covid-19 padčas nastupnaj zimy.

Simptomy

Simptomy novaha varyjantu kavidu nie adroźnivajucca ad tych, što fiksujucca pry ŭžo viadomych raznavidnaściach. Jany ŭklučajuć vysokuju tempieraturu, boli ŭ roznych častkach cieła, stomlenaść, kašal abo bol u horle.

Bolšaść ludziej zdaraviejuć paśla kavidu na praciahu niekalkich tydniaŭ, adnak u niekatorych chvaroba praciakaje daŭžej.

Suśvietnaja arhanizacyja achovy zdaroŭja, jakaja adsočvaje statystyku zachvorvańnia karanavirusam va ŭsich krainach śvietu, abviaściła, što pandemija kavidu skončyłasia ŭ 2022 hodzie.

Z momantu jaje pačatku da kanca červienia 2024 hoda było paćvierdžana bolš za 775 młn vypadkaŭ zachvorvańnia i bolš za 7 młn śmierciaŭ, skazana na sajcie SAAZ.

Pa danych SAAZ, z kanca maja pa kaniec červienia było zafiksavana 135 tys. novych vypadkaŭ kavidu, što amal nie adroźnivajecca ad papiaredniaha miesiaca. Pry hetym kolkaść pamierłych skłała za hety čas bolš za 2 tys., što na 3% mienš u paraŭnańni z papiarednim pieryjadam.

Zrešty, paśla zakančeńnia pandemii i rezkaha padzieńnia śmiarotnaści testy na kavid robiać našmat mienš ludziej. Tamu ciapierašnija maštaby raspaŭsiudžvańnia karanavirusa adsačyć składaniej.

• 0
• 2
• 2
• 2
• 2
• 11
• 1
• 0