Litva pabačyła ŭ zaklikach Ryžankova rekłamny chod, a to i pravakacyju
Zakliki ministra zamiežnych spraŭ Biełarusi da adnaŭleńnia adnosin ź Litvoj mohuć być źviazanyja z vybarami ŭ Siejm, ličyć śpikier litoŭskaha parłamienta Viktoryja Čmilicie-Nilsen, paviedamlaje LRT.
«My hatovyja da adnaŭleńnia kantaktaŭ pa linii pahraničnych i śpiecyjalnych słužbaŭ, ministerstvaŭ i inšych viedamstvaŭ. Možna pačać pracu z parłamientaryjami abo inšymi ŭpaŭnavažanymi litoŭskimi delehacyjami. My hatovyja raspracoŭvać darožnuju kartu pa razbłakavańni supracoŭnictva, viadoma, na asnovie pavahi suvierenitetu i prava Biełarusi na svoj šlach raźvićcia», — zajaviŭ ministr zamiežnych spraŭ Biełarusi Maksim Ryžankoŭ.
U adkaz na heta Viktoryja Čmilicie-Nilsen zajaviła BNS, što takija zajavy ź Minska ŭžo hučali raniej i zaŭsiody supravadžalisia adstupleńniem ad dyjałohu.
«Na hety momant u nas niama pryčyn mierkavać, što režym Łukašenki spyniŭ padtrymku Rasii. Akramia taho, my viedajem, što ŭ biełaruskich turmach zastajucca źniavolenymi žurnalisty i apazicyjaniery. Pazicyja Litvy zastajecca jasnaj: my padtrymlivajem biełaruskuju apazicyju», — skazała jana, dadaŭšy, što nie bačyć ščyraści ŭ zajavach Ryžankova.
Čmilicie-Nilsen taksama adznačyła, što publikacyja hetaha kamientara za dziesiać dzion da vybaraŭ u Siejm moža być nie vypadkovaj.
«Nie chaciełasia stroić zdahadki, ale možna mierkavać, što heta źviazana ź pieradvybarnaj kampanijaj. Adnak takija zajavy hučali i raniej, nie tolki ŭ pieryjad vybaraŭ», — padkreśliła śpikier parłamienta.
Staršynia Kamiteta Siejma pa jeŭrapiejskich spravach i časovaj hrupy «Za demakratyčnuju Biełaruś» Žyhimantas Pavilonis nazvaŭ zajavu mahčymaj pravakacyjaj.
«Pasłuchajcie rytoryku prarasijskich sił nakštałt Tamašeŭskaha abo Žamajtajcisa, jakija zajaŭlajuć ab nieabchodnaści znosin ź biełaruskim režymam. Heta ŭsio davoli šyzafrenična, nie ŭsie ź ich aśmielvajucca zajaŭlać, što nie padtrymlivajuć Ukrainu, ale pry hetym nastojvajuć na dyjałohu ź Mienskam», — skazaŭ Pavilonis.
Staršynia Kamiteta Siejma pa zamiežnych spravach Emanuelis Zinhierys padtrymaŭ Pavilonisa, adznačyŭšy, što takija zajavy mohuć być nacelenyja na litoŭskich vybarščykaŭ.
«Heta sproba viarnuć stračany ŭpłyŭ siarod hramadzian Litvy», — skazaŭ Zinhierys.
U svaim kamientary kiraŭnik biełaruskaj dypłamatyi taksama adznačyŭ, što, na dumku Mienska, nieabchodna «viarnucca da kanstruktyŭnaha supracoŭnictva, pakul nie pozna», i papiaredziŭ, što biez hetaha možna dasiahnuć «punktu niezvarotu».
Zinhierys, adnak, zajaviŭ, što dziejańni Minska kažuć pra jahonaje niežadańnie adnaŭlać stasunki.
«Chaj dakažuć, što jany niezaležnyja ad Maskvy», — zajaviŭ Zinhierys.
Litoŭski Siejm apošnim časam usio bližej da denansacyi niekalkich damovaŭ ź Biełaruśsiu i abmiažoŭvaje ŭdzieł biełaruskaha biznesu ŭ stratehičnych zakupkach. Palityki Litvy taksama nie raz zaklikali da mižnarodnaj izalacyi Biełarusi, abvinavačvajučy jaje ŭ padtrymcy Rasiei ŭ vajnie suprać Ukrainy i ŭ arhanizacyi mihracyjnaha kryzisu na miažy ES u 2021 hodzie.
Kamientary