Jaho možna budzie nabyć na aŭtazapravačnych stancyjach, a taksama ŭ aptekach.
Na minskim pradpryjemstvie «Kryon» raspracavali novy pradukt — dychalnuju sumieś pad brendam «Dychaj lohka».
Zajaŭlajecca, što aerazol pryznačany dla «aktyvizacyi razumovaj dziejnaści i źnižeńnia stamlalnaści». Onliner.by zapytaŭ mierkavańnie miedykaŭ adnosna hetaha praduktu.
Preparat budzie pradstaŭleny ŭ indyvidualnaj upakoŭcy i, jak abiacaje vytvorca, stanie dastupnym dla šyrokaj aŭdytoryi. Vytvorca adznačaje, što sumieś, uzbahačanaja kisłarodam, pavysić pracazdolnaść i palehčyć kancentracyju, naprykład, u momant, kali kiroŭcu ciahnie ŭ son.
Dakładnyja terminy vypusku pakul nie raskryvajucca. Miarkujecca, što pradukt možna budzie nabyć na aŭtazapravačnych stancyjach, a taksama ŭ handlovych kropkach i aptekach.
Žurnalisty źviarnulisia za kamientaryjem da doktara adnoj sa staličnych paliklinik, jaki paćvierdziŭ patencyjnuju karyść ad vynachodnictva i pradstaviŭ spasyłki na mižnarodnyja daśledavańni pa hetaj temie:
— Heta sapraŭdy moža dapamahčy «zasynajučym» kiroŭcam krychu adnavić formu. U daśledavańni «Upłyŭ kancentracyi kisłarodu na stamlalnaść kiroŭcy pry madelavańni kiravańnia» było pakazana, što padčas kiravańnia aŭtamabilem pry panižeńni kancentracyi kisłarodu mocna adčuvajecca stamlalnaść. Było vykazana mierkavańnie, što stamlalnaść možna pamienšyć za košt padačy kisłarodu. Heta sapraŭdy adčuvajecca fizična: paśla ŭdychańnia vysokaj kancentracyi kisłarodu źnižajecca ahulnaja stamlalnaść i paskarajecca chutkaść reakcyi.
Taksama, pavodle inšych mižnarodnych daśledavańniaŭ, pry ŭdychańni sumiesi z pavyšanym utrymańniem kisłarodu časova ŭzmacnialisia kahnityŭnyja funkcyi ŭ ludziej roznych uzrostavych hrup. Adnak treba razumieć, što, jak i luboje chimična i bijałahična aktyŭnaje rečyva, kisłarod maje šerah pakazańniaŭ i supraćpakazańniaŭ, asabliva ŭ vysokich kancentracyjach, — tłumačyć doktar.
Kamientary