Mnohija robiać toje, što i Tramp. Tolki cichieńka i biez ekstravahancyi

Prosta fienamienalna, jakaja kolkaść ludziej (razumnych, ščyrych, sumlennych, adukavanych) u našyja składanyja časy paddajucca emocyjam, i zamiest chałodnaha ćviarozaha analizu sami kidajucca ŭ vir palityčnych i kulturnych razborak inšaj krainy.

Nie tak daŭno stała viadoma pra pierafarmatavańnie amierykanskaj źniešniaj dapamohi. Ad hetaha pierafarmatavańnia paciarpieli mnohija važnyja i sumlennyja inicyjatyvy i ludzi. Asablivym udaram stała niavyznačanaść vakoł amierykanskich słužbaŭ zamiežnaha viaščańnia («Radyjo Svaboda» i «Hołas Amieryki»). Škada ludziej, jakija zastalisia biez srodkaŭ da isnavańnia, u čužoj krainie. 

Va ŭsim hetym vinavaciać Trampa. 

Składvajecca ŭražańnie, što ŭvieś zachodni demakratyčny śviet haroju staić za zmaharoŭ za demakratyju i baraćbitoŭ z rasijskim impieryjalizmam z Uschodniaj Jeŭropy, i tolki kiepski Tramp robić usio naadvarot, i tamu abarvaŭ finansavańnie.

Banalnaja pravierka faktaŭ pakazvaje, što takaja karcina śvietu nie adpaviadaje realnaści.

Praŭda zaklučajecca ŭ tym, što pierafarmatavańnie i źmianšeńnie źniešniaj dapamohi zachodnimi krainami — trend, jaki pačaŭsia nie ŭ Amierycy, i pačaŭsia da prychoda Trampa da ŭłady. I robiać heta z adnolkavaj intensiŭnaściu i levyja, i pravyja ŭrady, bo napad Rasii na Ukrainu źmianiŭ śviet tak, što jon nikoli nie stanie raniejšy.

Voś tolki niekalki faktaŭ.

Niderłandy, adzin z najbolšych donaraŭ dapamohi i dla biełaruskaha niezaležnaha hramadstva, skaracili biudžet zamiežnaj dapamohi na 30%, pieranakiravaŭšy srodki na prajekty, jakija «niepasredna spryjajuć niderłandskim intaresam». 

Brytanija (a ja nahadaju, u Brytanii ŭrad nie Faradža, navat nie kansiervataraŭ, a ŭrad lejbarystaŭ) skaračaje biudžet zamiežnaj dapamohi amal u 2 razy. Značnaja častka skaračeńnia prychodzicca na słužbu zamiežnaha viaščańnia BBC. «Składanaje i balučaje rašeńnie», — kamientuje brytanski premjer, lejbaryst Starmier. Aščadžanyja hrošy pojduć na abaronu.

U płanach pierafarmatavać pamier i pryjarytety zamiežnaj dapamohi i ŭ novaha ŭrada ŭ Niamieččynie.

Šviejcaryja admoviłasia finansavać niekalki ahienctvaŭ AAN ( u tym liku takija krytyčnyja, jak prahramma AAN pa VIČ/ŚNID).

Bielhija skaraciła dapamohu na 25%, a Francyja skaraciła svoj biudžet na 37%.

Prosta na našych vačach Jeŭropa pierahladaje ŭsiu stratehiju źniešniaj dapamohi. I heta nie tolki skaračeńnie, heta pieranos fokusu z hrantavych prahram na prajekty, aryjentavanyja na inviestycyi. Heta źmiena pryjarytetaŭ z fokusam na biaśpieku i kankurentazdolnaść ekanomiki.

«Toje, što adbudziecca ciapier, prosta adpaviadaje tamu, čym staŭ śviet, i nam patrebna novaja architektura [źniešniaj dapamohi]», — kamientuje Remi Ryu, kiraŭnik Francuzskaha Ahienctva Raźvićcia (Agence française de développement).

Źmianiajucca fokusy ŭ zamiežnaj dapamozie i pa linii ES. Letaś italjaniec Maryjo Drahi vypuściŭ spravazdaču pra kankurentazdolnaść (ci, dakładniej, niekankurentazdolnaść ES), jakaja ŭskałychnuła ŭvieś jeŭrapiejski isteblišment. Drahi, prafiesijanał i technakrat, padrabiazna raśpisaŭ usie asnoŭnyja prablemy jeŭrapiejskaj ekanomiki i častkova biaśpieki, i ciapier hranty pa linii ES raźmiarkoŭvajucca i vydajucca z ulikam rekamiendacyj z toj našumiełaj spravazdačy Drahi.

Tolki ślapy nie pabačyć, što toje, što zaraz adbyvajecca — hłabalny trend, a nie niejki adzinkavy vybryk trampizmu.

Ale my čamuści nie čujem praklonaŭ u bok Starmiera, u bok Makrona, u bok Drahi, chacia pa sutnaści jany robiać usio toje, što robić Tramp (tolki cichieńka, biez ekstravahantnaj fanaberyi).

Padabajecca vam heta ci nie padabajecca — śviet źmianiŭsia karenna, pryjarytety krain źmianilisia. Pieršaja opcyja pavodzinaŭ u takoj situacyi — jenčyć, źvinavačvać Trampa, zvužać i prymityzavać pytańnie, uklučacca ŭ amierykanskija ŭnutrypalityčnyja razborki. Nakolki heta efiektyŭna? Dumaju, nie vielmi. Druhaja opcyja — adaptavać svajo žyćcio, svaju dziejnaść, svaje pryjarytety da hetych źmien. I tady, moža być, hetaja chvala vas nie źmiacie z noh i vy zastanieciesia žyvym.

• 18
• 3
• 1
• 3
• 0
• 3
• 0
• 1