Rasija zhodnaja abmiarkoŭvać pytańnie pieradačy ZŠA kantrolu nad Zaparožskaj AES
Rasijski bok adkryty dla abmierkavańnia prysutnaści pradstaŭnikoŭ ZŠA na Zaparožskaj AES na pieramovach ab Ukrainie. Pra heta zajaviŭ kiraŭnik «Rasatama» Alaksiej Lichačoŭ, pišuć «Važnyje istorii».
Upieršyniu pra toje, što padčas pieramoŭ abmiarkoŭvajecca prablema akupacyi Zaparožskaj AES Rasijaj, u siaredzinie sakavika zajaviŭ prezident ZŠA Donald Tramp. Hazieta Financial Times sa spasyłkaj na krynicy paviedamlała, što Tramp choča ŭklučyć pytańnie pieradačy kantrolu nad ZAES amierykanskamu boku ŭ ździełku pa karysnych vykapniach z Ukrainaj.
Padpisańnie ździełki čakajecca ŭžo ŭ najbližejšyja sutki, zajaviŭ premjer Ukrainy Dzianis Šmyhal. «RBK-Ukraina» i Bloomberg pišuć, što ciapier uzhadniajuć apošnija techničnyja detali pa ździełcy, a ŭ Vašynhton užo jedzie kiraŭnik Minekanomiki Ukrainy Julija Śvirydzienka.
Pieradača Zaparožskaj AES pad kantrol ZŠA była ŭmovaj miru z boku administracyi Trampa ŭ apošnim apublikavanym tekście prapanoŭ da Rasii. Ukraina ŭ svaim tekście prapanoŭ vykazała žadańnie viarnuć sabie kantrol nad Zaparožskaj AES pry ŭdziele ZŠA, a taksama nad Kachoŭskaj HES i Kinburnskaj kasoj, a taksama atrymać harantyi bieśpieraškodnaha prachodu pa Dniapry.
Jašče ŭ minułyja vychadnyja kiraŭnik MZS RF Siarhiej Łaŭroŭ kateharyčna adprečvaŭ lubuju mahčymaść deakupacyi Zaparožskaj AES. Jon zajaviŭ, što Maskva nie atrymlivała takoj prapanovy ad ZŠA.
«Ale kali atrymajem, to patłumačym, što Zaparožskaja AES znachodzicca ŭ padparadkavańni rasijskaj dziaržaŭnaj karparacyi «Rasatam», pad nahladam piersanału MAHATE, jaki ŭvieś čas prysutničaje na placoŭcy», — skazaŭ Łaŭroŭ.
Ukraina biez Kryma, ale z Zaparožskaj AES. Reuters apublikavała poŭny śpis mirnych prapanoŭ Trampa
ZŠA prapanavali Kijevu pryznać Krym rasijskim i admovicca ad ustupleńnia ŭ NATA — WSJ
Tramp: Na pieramovach u Er-Ryjadzie abmiarkoŭvajucca terytaryjalnyja pytańni i vałodańnie AES
Zialenski: Z Trampam abmiarkoŭvali pieradaču ZŠA Zaparožskaj AES
Kamientary