Bury adkazaŭ Azaravu pra ahienta Miščuka: Jon nikoli nie pracavaŭ u AVVA i ni da jakoj sakretnaj infarmacyi dostupu nie mieŭ

«Miščuk nikoli nie pracavaŭ u AVVA. Jon rabiŭ zdymki pa roznych asobnych damovach i tolki pad kankretnyja padziei. Hety fatohraf adzin ź dziasiatkaŭ, ź jakimi my pracavali. Nijakich niepubličnych udzielnikaŭ na našych forumach nie było — usie ŭdzielniki papiaredžvalisia pra toje, što na iviencie buduć zdymka i žurnalisty.

Ni na jakich nieaficyjnych sustrečach AVVA hetaha fatohrafa nie było. Nam ničoha nie viadoma pra zatrymańnie kahości na padstavie jaho zdymkaŭ. Toje, što «viedaje» Azaraŭ pra niejkija abmierkavańni ŭ asiarodździ AVVA i niejkija kanflikty — nie bolš čym insinuacyi i pletki. Azarava ŭ hetym asiarodździ nikoli nie było.

Tezis pra toje, što «Miščuk, dziakujučy pracy ŭ ABBA, mieŭ dostup da kołaŭ mnohich aktyvistaŭ» — heta taksama čarhovaje ničym nie padćvieržanaje manipulatyŭnaje śćviardžeńnie Azarava. 

Kali Miščuk, jak śćviaržaje Azaraŭ, fatahrafavaŭ praces padpisańnia pahadnieńnia ab supracoŭnictvie pamiž ABBA i «Bajpołam», to čamu tady Azaraŭ nie pravioŭ vieryfikacyju fatohrafa? U Azarava i Bajpoła, u adroźnieńnie ad mianie i AVVA, byŭ dostup da baz danych i mahčymaści vieryfikacyi čałavieka.

A voś što sapraŭdy varta ŭvahi ŭ hetaj situacyi — dyk heta toje, jak Azaraŭ «pieradavaŭ» hetuju infarmacyju. 

Dakładnaja zapiska na imia Śviatłany Cichanoŭskaj ad 1 kastryčnika 2023 hoda trapiła da mianie ŭ telehram-čat z Azaravym nočču 9 kastryčnika 2023-ha. Ja jaje pabačyŭ i spampavaŭ. Ale ranicaj jaje ŭžo nie było ŭ čacie. Nie viedaju, čamu Azaraŭ jaje vydaliŭ. Moža, dasłaŭ mnie jaje pamyłkova, ci pierabłytaŭ adrasata. Bolš ničoha i nikoli pra hetaha fatohrafa Azaraŭ mnie nie kazaŭ i nie pisaŭ.

Pakolki na toj momant u mianie ŭžo nie było nijakaha davieru da Azarava i jon šmat razoŭ sabie dyskredytavaŭ, my praviarali infarmacyju praz našych inšych partnioraŭ, jakim daviarali i daviarajem. Jany paćvierdzili, što hety fatohraf sapraŭdy maje dva pašparty. Jak tolki my atrymali hetuju infarmacyju — adrazu zrabili ŭsio nieabchodnaje i ad nas zaležnaje, kab paviedamić pra mahčymyja ryzyki biaśpieki ŭ miežach zakanadaŭstva. 

Varta taksama adznačyć, što ja nie atrymlivaŭ nijakich zapytaŭ i ad Ofisu Śviatłany Cichanoŭskaj pra situacyju z hetym fatohrafam. Ale infarmacyja pra jaho ŭ Ofisie dakładna była.

Tak, na čarhovaj anłajn-sustrečy pa biznesie, jakuju pravodziŭ Ofis 11 kastryčnika 2023 hoda, było ŭźniata pytańnie pryznačeńnia Alaksandra Masłava pradstaŭnikom pa biznesie i ekanomicy ŭ APK. Ja tady vykazaŭsia rezka suprać, bo vałodaŭ niekatoraj infarmacyjaj, u tym liku pra toje što jahonaja žonka/partniorka viadzie i raźvivaje biznes u Biełarusi i što jaho pryznačeńnie moža być niebiaśpiečnym i nanosić reputacyjnyja straty ŭsiamu demakratyčnamu ruchu.

U adkaz ja pačuŭ ad Franaka Viačorki što ŭ takim vypadku naša vieryfikacyja «ničoha nie vartaja», bo ŭ nas samich byccam by pracuje fatohraf z dvuma pašpartami.

Śviedkami hetaha kanfliktu było šmat ludziej, jakija prysutničali na hetaj sustrečy. Uvohule ŭ mianie skłałasia ŭražańnie, što hetuju infarmacyju pra fatohrafa admysłova trymali da peŭnaha momantu.

Jašče raz chaču padkreślić, što AVVA nie źjaŭlajecca niejkaj rasśledavalnickaj strukturaj, nie maje dostupu da baz danych, dzie mohuć znachodzicca takija źviestki. My možam pracavać pa hetym kirunku tolki praz našych partnioraŭ. Hety fatohraf nie źjaŭlaŭsia siabram asacyjacyi, u adnosinach da jakich pravodzicca biezumoŭnaja vieryfikacyja i jakija dajuć svaju zhodu na jaje praviadzieńnie. My pracujem vyklučna ŭ miežach zakanadaŭstva Polščy i prytrymlivajemsia ŭsich nieabchodnych pracedur i patrabavańniaŭ».

• 4
• 0
• 0
• 7
• 0
• 1
• 0
• 1