Śpiecsłužby vychodziać na kantakt z aktyvistami praz fejsbuk: što viadoma i jak siabie abaranić

Pravaabaroncam viadoma nie mieniej za piać takich vypadkaŭ. Usie paviedamleńni zafiksavanyja z adnaho akaŭnta — Maria Pulkovskay. Niekatorym abiacajuć biaśpieku ich rodnych u Biełarusi ŭ abmien na supracu ź biełaruskimi śpiecsłužbami.

U fejsbuku Maria Pulkovskay u siabrach ličycca 371 akaŭnt, siarod jakich — byłyja palitźniavolenyja, žurnalisty i aktyvisty, a taksama «Haradzienskaja pravaabarona». Akaŭnt maje «ekstremisckija» padpiski, naprykład, «Miedia-Poleśje», «Moładź «Ruchu «Za Svabodu». U akaŭncie dva fotazdymki dziaŭčyny, na jakich nie bačna tvaru. Napisana, što jana žyvie ŭ Prazie. Ale nasamreč za hetym chavajecca supracoŭnik minskaha KDB, paviedamlajuć tyja, kamu jon pisaŭ. Hety profil praciahvaje dadavać sabie ŭ siabry hramadskich aktyvistaŭ.

«Viasna» parazmaŭlała z adnoj z aktyvistak, ź jakoj źviazvaŭsia supracoŭnik KDB. Jana miarkuje, što jon źviazvajecca z publičnymi ludźmi, jakija byli aktyŭnyja ŭ palityčnych ci kalapalityčnych strukturach:

«Kali jon piša, to adrazu nazyvaje ludziej pa poŭnym imieni i imieni pa baćku, to bok heta ŭžo infarmacyja, jakaja nie va ŭsich źmiaščajecca ŭ sacsietkach. Jon skazaŭ, što jahonaja meta — daviedacca mierkavańnie pra struktury i niejkija padziei. Supracoŭnika cikavić takaja infarmacyja.

Jon piša pra niejki kampramis, supracoŭnictva, sprabuje naładzić uzajemnavyhadnyja kamunikacyi. Jon choča daviedacca bolš infarmacyi pra niejkich ludziej z demakratyčnaj supolnaści. Jamu cikavy palityčny bekhraŭnd, a taksama Kaardynacyjnaja Rada. Viadoma, što jon pisaŭ jašče niekatorym publičnym ludziam».

Pravaabaroncy «Viasny» zaklikajuć pakłapacicca pra svaju ličbavuju biaśpieku:

1. Pierahledźcie śpis siabroŭ u sacsietkach — vydalicie nieviadomych abo padazronych asob, asabliva tych, chto nie maje realnaha fota, infarmacyi abo sumnieŭna pavodzić siabie.
2. Abmiažujcie bačnaść asabistaj infarmacyi — schavajcie abo vydalicie danyja pra miesca žycharstva, pracu, kantakty, siamju i h. d.
3. Vydalicie abo schavajcie staryja pasty i kamientary, jakija mohuć źmiaščać uraźlivuju infarmacyju.
4. Budźcie pilnyja da novych kantaktaŭ — nie adkazvajcie na paviedamleńni ad nieviadomych asob, asabliva kali jany zadajuć asabistyja abo palityčnyja pytańni.
5. Uklučycie dvuchfaktarnuju aŭtentyfikacyju na ŭsich akaŭntach, dzie heta mahčyma.
6. Zachoŭvajcie ŭzajemadziejańnie z padobnymi paviedamleńniami (jak ad Maria Pulkovskay) — zrabicie skrynšoty, nie adkazvajcie, paviedamicie pravaabaroncam.
7. Vyklučycie funkcyju «chto moža znajści vas pa numary telefona» ŭ naładach Facebook i inšych płatformaŭ.
8. Karystajciesia VPN i šyfravanymi miesiendžarami (naprykład, Signal).

• 3
• 0
• 2
• 5
• 1
• 0
• 7
• 0