CRU: Jadziernaj prahramie Irana naniesiena surjoznaja škoda

Abjekty jadziernaj prahramy Irana ŭ vyniku amierykanskich udaraŭ atrymali surjoznyja paškodžańni, zajaviŭ dyrektar CRU Džon Retklif, spasyłajučysia na novyja dadzienyja raźviedki.

«CRU moža paćvierdzić, što sukupnaść dakładnych raźvieddanych pakazvaje na toje, što jadziernaj prahramie Irana naniesiena surjoznaja škoda ŭ vyniku niadaŭnich metavych udaraŭ», — havorycca ŭ zajavie na sajcie ŭpraŭleńnia.

Pavodle słoŭ kiraŭnika CRU, byli atrymanyja novyja raźvieddanyja z nadziejnych krynic pra toje, što niekalki klučavych iranskich jadziernych abjektaŭ byli źniščanyja i ich daviadziecca adnaŭlać hadami.

Retklif dadaŭ, što CRU praciahvaje źbirać dadatkovuju infarmacyju i budzie infarmavać pra jaje aficyjnych asob i hramadskaść. Raniej u Biełym domie adchilili pieršapačatkovyja acenki raźviedki, što prasačylisia ŭ presu, pra toje, što asnoŭnyja kampanienty iranskaj jadziernaj prahramy nie byli źniščanyja i mohuć być adnoŭleny na praciahu niekalkich miesiacaŭ.

Prezident ZŠA Donald Tramp zajaviŭ, što iranskaja jadziernaja prahrama całkam źniščana ŭ vyniku udaraŭ, a materyjały teleradyjokampanii CNN i haziety New York Times sa spasyłkaj na dakład raźviedki nazvaŭ «fejkavymi navinami».

U noč na čaćvier Tramp taksama zajaviŭ, što ministr abarony Pit Chehsiet praviadzie pres-kanfierencyju a 8-j ranicy pa Vašynhtonie ŭ Pientahonie, «kab abaranić honar vialikich amierykanskich lotčykaŭ».

Ź jaho pasta ŭ Truth Social vynikaje, što na joj mohuć być pradstaŭleny novyja dadzienyja pra ŭdary pa Iranie.

Vydańnie Axios paviedamlaje, što amierykanskaja administracyja maje namier abmiežavać abmien sakretnaj infarmacyjaj z Kanhresam paśla ŭciečki raźvieddanych u ŚMI.

Krynicy vydańnia zajavili, što FBR pačało rasśledavańnie.

Pavialičyć

Surazmoŭcy Axios u administracyi kažuć, što płanujecca abmiežavać danyja ŭ sistemie CAPNET, jakuju Bieły dom vykarystoŭvaje dla abmienu sakretnaj infarmacyjaj z kanhresmienami.

Acenka Raźviedvalnaha ŭpraŭleńnia Ministerstva abarony ZŠA (Defense Intelligence Agency, DIA) była raźmieščana ŭ sistemie ŭ paniadziełak uviečary, a na nastupny dzień vytrymki ź jaje źjavilisia ŭ ŚMI, piša Axios.

Spravazdača, jak paviedamlajecca, była składziena na praciahu pieršych 24 hadzin paśla udaraŭ i zasnoŭvałasia na analizie spadarožnikavych zdymkaŭ, a nie na śviedčańniach vidavočcaŭ na miescach. U joj pryznavałasia «nizkaja dakładnaść» acenak.

• 1
• 0
• 0
• 0
• 0
• 0
• 0
• 0