Premjer Słavakii abiacaje błakavać 18-y pakiet sankcyj suprać Rasii, pakul nie atrymaje harantyj
«Prašu vas vykarystać najbližejšyja hadziny i dni, kab praciahnuć dyjałoh ES z uradam Słavakii», — napisaŭ Robiert Fica Ursule fon der Lajen.
Premjer-ministr Słavakii Robiert Fica ŭ sieradu nakiravaŭ list staršyni Jeŭrakamisii Ursule fon der Lajen, u jakim paabiacaŭ praciahvać błakiravać uchvaleńnie 18-ha pakieta sankcyj u dačynieńni da Maskvy, pakul nie atrymaje bolš kankretnych harantyj u suviazi z płanam ES admovicca ad rasijskaha hazu paśla 2028 hoda, piša Bi-bi-si.
«Prašu vas vykarystać najbližejšyja hadziny i dni, kab praciahnuć dyjałoh ES z uradam Słavakii […]. I pakul pytańnie nie budzie vyrašana, Słavakija prosić pieranieści hałasavańnie pa 18-m pakiecie sankcyj», — havorycca ŭ liście, tekst jakoha Fica apublikavaŭ u X.
«Słavackaja Respublika nikoli nie padtrymaje [stratehiju ES] REPowerEU u pastaŭkach hazu, bo heta naniasie škodu słavackim damašnim haspadarkam i ekanomicy, a taksama jašče bolš źnizić kankurentazdolnaść usiaho Jeŭrapiejskaha sajuza, — piša Fico. — Unosiačy hetaje prapanavańnie, Jeŭrakamisija hruba ihnaruje palityčny mandat, zaćvierdžany Jeŭrapiejskaj radaj. Maja pazicyja jak premjer-ministra Słavackaj Respubliki pa hetym pytańni paśladoŭnaja i nie pavinna nikoha ździŭlać».
Pa słovach Ficy, Słavakija ličyć niedastatkovymi prapanavanyja Jeŭrakamisijaj harantyi. «Najlepšym varyjantam było b pradastaŭleńnie Słavakii prava, u vyhladzie vyklučeńnia, vykonvać kantrakt z «Hazpramam» da zaviaršeńnia jaho terminu dziejańnia ŭ 2034 hodzie. Takuju ideju Jeŭrakamisija adchilaje, bo ličyć, što dadzieny varyjant padarvaŭ by sutnaść antyrasijskich sankcyj», — padkreślivaje Fica.
Płan ES pa admovie ad rasijskaha hazu nie praduhledžvaje adnahałosnaha ŭchvaleńnia, tamu Słavakija nie moža zabłakiravać jaho adnaasobna.
Adnak dla pryniaćcia 18-ha pakieta sankcyj suprać Maskvy patrabujecca zhoda ŭsich krain-členaŭ ES, i z-za pazicyi Słavakii, a taksama Malty, na siońniašnim pasiadžeńni pasłoŭ Jeŭrasajuza ŭchvalić novy pakiet nie ŭdałosia. Abmierkavańnie pieraniesiena na 18 lipienia.
Kamientary
Lubicie lapić cetliki "krajniepravy", "ultrapravy" ci "papulist" (vielmi časta zusim nieadekvatna), a tut pry Fica čarhovy raz nie dadali pra jaho partyjnuju i idejnuju prynaležnaść, jakoje supadzieńnie.