Tajamničaja i ŭpłyvovaja Miełanija. Novy padychod žonki prezidenta Trampa da roli pieršaj łedzi
Robaty ŭžo tryvała zaniali miesca ŭ žyćci čałavieka, i abaviazak amierykancaŭ — rychtavać svaich dziaciej da suisnavańnia sa štučnym intelektam. Z takoj dumkaj źviarnułasia ŭ čaćvier da ŭdzielnikaŭ pracoŭnaj hrupy pa ŠI i adukacyi pieršaja łedzi Amieryki, Miełanija Tramp, paviedamlaje Bi-bi-si.
«Naša budučynia — heta ŭžo bolš nie navukovaja fantastyka, — praciahnuła Miełanija Tramp. — Na hetaj, prymityŭnaj stadyi, naš abaviazak — stavicca da ŠI jak da našych dziaciej: padtrymlivać, ale pry hetym uvažliva sačyć i nakiroŭvać».
Hetaje pasiadžeńnie pracoŭnaj hrupy ŭ Biełym domie stała adnym z usiaho niekalkich publičnych mierapryjemstvaŭ, u jakich udzielničała pieršaja łedzi. Z momantu viartańnia muža ŭ Bieły dom Miełanija Tramp demanstruje, što jana adnačasova i tajamničaja, i ŭpłyvovaja.
Byłaja madel Miełanija Knaus, ciapier žonka prezidenta ZŠA Miełanija Tramp, naradziłasia ŭ Słavienii 55 hadoŭ tamu. Raniej jaje časta nazyvali zahadkavaj. Jana radziej za svaich papiarednic — žonak prezidentaŭ — źjaŭlałasia na publicy, vystupała z pramovami i ŭdzielničała ŭ roznych mierapryjemstvach.
Padčas pieradvybarčaj kampanii muža ŭ 2024 hodzie jana nie raz nadoŭha źnikała z pola zroku, i haziety vydavali adzin artykuł za druhim ad zahałoŭkami nakštałt «Dzie Miełanija?».
Jaje i ciapier nie časta bačać u Biełym domie: jana, kažuć, bolšuju častku času pravodzić u Ńju-Jorku i Fłarydzie.
U toj ža čas z momantu viartańnia Donalda Trampa na pasadu prezidenta ŭ hetym studzieni misis Tramp, na dumku niekatorych kamientataraŭ, stała pa-inšamu — bolš aktyŭna i adkazna — padychodzić da abaviazkaŭ pieršaj łedzi. Hetyja abaviazki ŭvohule razmytyja i źmianiajucca z kožnym novym prezidentam i jaho žonkaj.
Dzieci, ŠI i «pornapomsta»
Ciapier Miełanija šmat uvahi nadaje temie dziaciej, praciahvajučy pracu, jakuju jana viała ŭ ramkach inicyjatyvy «Budź lepšym» časoŭ pieršaha terminu Donalda Trampa. Heta była prahrama baraćby z bulinham u internecie i narkamanijaj.
Akramia hetaha, jana zajmajecca temaj štučnaha intelektu, a taksama adyhrała važnuju rolu ŭ pryniaćci zakona pad nazvaj Take It Down Act, zhodna ź jakim uviedziena kryminalnaja adkaznaść za publikacyju ŭ internecie realnych abo zhienieravanych ŠI intymnych vyjaŭ biez zhody adlustravanaj asoby.
Hety zakon padtrymali kanhresmieny ad abiedźviuch partyj, a heta — redkaść u siońniašniaj situacyi padziełu ŭ amierykanskaj palitycy.
Hety zakon Miełanija Tramp upieršyniu ŭ historyi siarod pieršych łedzi ZŠA publična padpisała razam z mužam. Prafiesarka Ejnau Rabinovič-Foks, śpiecyjalistka pa historyi pieršych łedzi ZŠA, adznačaje, što žonki prezidentaŭ niaredka zajmalisia temaj dziaciej i moładzi, ale misis Tramp vybrała niekalki inšy padychod.
«Pieršyja łedzi časta zasiarodžvalisia na temach, jakija ličacca bolš žanočymi — naprykład, na dziciačaj adukacyi», — skazała prafiesarka Rabinovič-Foks Bi-bi-si.
«U vypadku ź Miełanijaj, napeŭna, niezvyčajny jaje padychod. Jana padychodzić nie z maciarynskaha, žanočaha boku — chutčej, ź dziełavoha boku», — praciahnuła prafiesarka.
U zakonie Take It Down Act, naprykład, jak adznačaje jana, akcent zrobleny na sankcyjach u dačynieńni da płatformaŭ, dzie raźmiaščajuć «porna ŭ pomstu»: ciapier jany abaviazany ciaham 48 hadzin vydalać taki kantent, inakš buduć pakaranyja.
Mierapryjemstva ŭ hety čaćvier u Biełym domie było pryśviečana adukacyi — ale pry hetym Miełaniju akružali nie dzieci, a členy ŭrada, čynoŭniki administracyi i pradstaŭniki vialikaha biznesu — naprykład, kampanij IBM i Google.
Na dumku dyrektarki Prahramy pieršych łedzi ŭ Amierykanskim univiersitecie, byłoj kiraŭnicy aparata pieršaj łedzi Łory Buš Anity Makbrajd, na padobnych mierapryjemstvach bačna pieramiena ŭ staŭleńni da Miełanii Tramp u paraŭnańni ź pieršym terminam.
«Źniešnija hulcy, jakija, mahčyma, raniej nie chacieli ź joj pracavać, ciapier hatovyja ź joj pracavać. Na pieršym terminie ź joj sustrakalisia nieachvotna. Joj było ciažka źbirać kruhłyja stały. U jaje nie było mocnaj struktury vakoł jaje», — ličyć Makbrajd.
Na dumku Anity Makbrajd, zasiarodžvajučysia na technałahičnych, kamiercyjnych i zakanadaŭčych aśpiektach adukacyi i abarony dziaciej, Miełanija Tramp «nadaje adčuvańnie terminovaści» prablemam novych technałohij.
«Ciapier jana vykarystoŭvaje svajo stanovišča efiektyŭna, z karyściu i źmiastoŭna. Jana stanovicca hulcom, jaki nasamreč moža dapamahčy z pryniaćciem zakonaŭ», — ličyć Makbrajd.
List Pucinu
U lipieni Donald Tramp miž inšym skazaŭ žurnalistam, što abmiarkoŭvaje svaje razmovy z Pucinym z žonkaj, i jana — zhodna ź jaho słovami — skieptyčna stavicca da sprob damaŭlacca z Pucinym ab miry. U žniŭni Miełanija Tramp praz muža pieradała prezidentu Rasii Uładzimiru Pucinu list, u jakim zaklikała jaho abaranić dziaciej u zonie bajavych dziejańniaŭ.
Heta sproba pieršaj łedzi ŭziać udzieł u źniešniaj palitycy — i zrabić pry hetym akcent na losie dziaciej — nie zastałasia niezaŭvažanaj. Paźniej joj napisali žonki prezidentaŭ Ukrainy i Turcyi, Alena Zialenskaja i Eminie Erdahan.
Byłyja pieršyja łedzi taksama ŭdzielničali ŭ farmiravańni źniešniaj palityki ZŠA. Nensi Rejhan, naprykład, pierapisvałasia z Raisaj Harbačovaj, a Pet Niksan i Razalin Karter jeździli pa śviecie z humanitarnymi misijami i zajmalisia «čaŭnočnaj dypłamatyjaj».
Na dumku Anity Makbrajd, toje, što misis Tramp napisała Pucinu, pakazvaje, što, choć jana i radziej źjaŭlajecca na publicy, čym jaje papiarednicy, jana ŭsio ž taki choča ŭdzielničać u spravach, jakija jaje cikaviać.
«Jana naradziłasia ŭ krainie, jakaja była pad savieckim upłyvam, — miarkuje Anita Makbrajd [heta nie zusim tak, Juhasłavija pry Iosipie Broz Cita nie była poŭnym satelitam SSSR — Bi-bi-si], — i adčuvaje niejkija rečy, jakich inšyja, mahčyma, nie adčuvajuć. Joj nie treba ŭdzielničać va ŭsich pytańniach, ale jana choča ŭdzielničać u tych, što joj bolš cikavyja i na jakija jana moža paŭpłyvać.
Na dumku Makbrajd, u astatnija try hady ŭ Biełym domie Miełanija Tramp hetak ža budzie nadzvyčaj vybaračna padychodzić da taho, u čym udzielničać u jakaści pieršaj łedzi.
«Jana robić heta na svaich umovach. Jana — za jakaść, a nie kolkaść, — ličyć Makbrajd. — Jana nie źbirajecca aziracca na toje, jak inšyja pavodzili siabie na jaje miescy ŭ minułym».
Ciapier čytajuć
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich1919
«Dzima, moj mikraskop za paŭmiljona jeŭra staić u tvajoj klinicy. Abstalavańnie skraŭ ty». Zasnavalnik «Novaha zroku» raskazaŭ pra adnosiny ź siamjoj Abielskich19
«Da lejtenanta pryjechała maładaja žonka, pabačyła, što adbyvajecca ŭ zonie, i zastreliłasia». Vyjšła zaklučnaja častka ŭspaminaŭ Ryhora Biarozkina pra HUŁAH i saviecki Minsk1818
Kamientary