«Admienim roŭminh, kazali jany. U vyniku admianili internet». Biełarusy raskazali, što ŭ Rasii nie pracuje roŭminh ni A1, ni MTS
Mierkavałasia, što biełarusy nie zmohuć karystacca internetam pry pajezdkach u Rasiju pieršyja sutki. Adnak, jak vynikaje z kamientaryjaŭ, na praktycy ŭsio vyjšła jak pa čarnamyrdzinskim zaŭsiody.
Biełarusy paćviardžajuć, što ŭ Rasii turystam ci kamandzirovačnym ciapier davodzicca žyć bieź internetu. Niekatorym šancuje, ale heta chutčej vyklučeńnie z praviłaŭ. Adzin z karystalnikaŭ apieratara A1 dzielicca svaim nieadnaznačnym dośviedam:
«U hetyja vychadnyja byŭ u Piciery i paśla sutak zapracavaŭ internet. A ŭ siabra — nie, choć u abodvuch A1».
Inšyja abanienty taho ž apieratara taksama byli vymušanyja abmiažoŭvacca zvankami:
«Na minułym tydni internet A1 nie pracavaŭ, tolki zvanki (była ŭ Piciery)».
U abanienta MTS situacyja taksama była składanaj.
«Była 5 dzion u Rasii, u aŭtorak viarnułasia. Internet tam tak i nie źjaviŭsia, tolki zvanki. U mianie MTS», — piša adna z čytačak.
Jaje słovy paćviardžajuć i inšyja karystalniki:
«MTS nie pracavaŭ 1,5 sutak».
«MTS nie pracuje navat praz sutki… Tolki ź Piciera pryjechaŭ».
Nie lepšyja spravy i ŭ abanientaŭ life:). Kamientar adnaho ź biełarusaŭ łakaničny i adnaznačny:
«Łajf nie pracuje ŭ Rasii, pravierana asabista».
Prablema zakranaje ŭsich biełaruskich apierataraŭ biez vyklučeńnia:
«Usie apieratary nie pracujuć, niadaŭna sama sutyknułasia z hetaj prablemaj, na dzień pryjechała ŭ Maskvu pa spravach!»
Sutyknuŭšysia z takoj nienadziejnaściu, biełarusy pačali šukać alternatyŭnyja rašeńni. Samaje papularnaje — nabyć rasijskuju SIM-kartu. Śćviardžajuć, što zrabić heta nie tak užo i składana: «Bijamietryju zrabić, i kupiŭ rasijskuju simku — usio».
Inšy kamientatar navat prapanuje pakrokavuju instrukcyju, jak spraścić praces i paźbiehnuć pachodaŭ u Šmatfunkcyjanalny centr nadańnia dziaržaŭnych i municypalny pasłuh (MFC):
«U banku «Śbierbank» možna zrabić usio pad kluč) i nie treba ŭ MFC jeździć i h.d. Ja pazaŭčora rabiŭ, u «Śbierbanku» i SNIŁS («Strachovoj nomier individualnoho licievoho sčiota» — NN) dali, i bijamietryju, usio tam, tolki potym pajechaŭ simku za 5 chvilin zrabiŭ».
Jašče adzin prapanuje nabyć na «Azonie» sim-kartu rasijskaha MTS i aktyvavać praz asabisty kabiniet biełaruskaha apieratara.
Na fonie praktyčnych parad čytačy nie zabyvajuć i pra ironiju, pryhadvajučy hučnyja abiacańni pra adzinuju prastoru suviazi. Adzin z kamientaroŭ trapna padsumoŭvaje ŭsiu situacyju:
«Admienim roŭminh, kazali jany z kožnaha prasa. U vyniku admianili internet))))»
Nahadajem, što na pačatku kastryčnika 2025 hoda rasijskija mabilnyja apieratary pačali ŭvodzić tak zvany pieryjad astudžeńnia dla ŭsich uładalnikaŭ zamiežnych sim-kartaŭ.
Mierkavałasia, što heta budzie dziejničać tolki pieršyja 24 hadziny paśla pierasiačeńnia miažy Rasii. Abmiežavańnie pavinna było dapamahčy ŭ baraćbie z dronami, jakija bjuć pa rasijskich zavodach i vajskovych bazach.
Ale da siaredziny kastryčnika vyśvietliłasia, što sistema nie pracuje. Bolšaści apierataraŭ prosta nie ŭdajecca źniać błakiroŭku.
Abmiežavańni tyčacca nie tolki mabilnaha internetu, ale i SMS-paviedamleńniaŭ.
Niamała ludziej u kamientarach u sacyjalnych sietkach prosta zaścierahajuć ad pajezdak u Rasiju: «Niama čaho biełarusam naohuł tudy jeździć ciapier».
Ciapier čytajuć
Źnikłuju ŭ Mjanmie Vieru Kraŭcovu znajšli miortvaj8
Kamientary