Biełaruski čynoŭnik zahavaryŭ pa-biełarusku, čym vielmi ździviŭ i paradavaŭ ludziej
Čynoŭnik ź Minskaha rajvykankama źjaviŭsia ŭ repartažy na dziaržaŭnym telebačańni i niečakana zahavaryŭ pa-biełarusku. Pryčym razmova išła nie pra historyju ci kulturu, a pra zvyčajnuju haspadarčuju prablemu — asfaltavańnie daroh u pryharadnaj vioscy. My daviedalisia, chto hety čałaviek, jakoha ŭ internecie prapanujuć zanieści ŭ Čyrvonuju knihu i zakidać listami padziaki.
Videa z uryŭkam siužeta źjaviłasia ŭ sacyjalnaj sietcy Threads. Karystalnik sutonnie apublikavaŭ frahmient z podpisam: «Čynoŭnik adkazvaje pa-biełarusku. Chto heta, adkul, što da čaho — nie pytajciesia, nie viedaju. Siabar dasłaŭ. Mnie prosta spadabałasia».
Što za siužet?
Frahmient pachodzić z vypusku pieradačy «Biełorusskoje vriemiečko. Kommunalnyj čietvierh», jaki vyjšaŭ u efir 4 śniežnia 2025 hoda na telekanale «Biełaruś 1». U repartažy razhladałasia skarha žycharoŭ vulicy Śvietłaj u vioscy Ščytomiryčy Sienickaha sielsavieta, što na poŭdzień ad Minska. Ludzi aburalisia tym, što na susiedniaj vulicy Pryvietlivaj pakłali novy asfalt, a ichniuju darohu pakinuli hravijnaj, z-za čaho ŭ mižsiezońnie jana pieratvarajecca ŭ bałota.
Adkazvać na pretenzii žycharoŭ daviałosia Siarhieju Alejčyku, namieśniku načalnika ŭpraŭleńnia architektury i budaŭnictva Minskaha rajvykankama.
Da ździŭleńnia hledačoŭ, čynoŭnik kamientavaŭ situacyju na dobraj biełaruskaj movie:
«Praciahłaść usich daroh składaje 3242 kiłamietry… Tamu ŭ raźlik biarecca šmat faktaraŭ. U pieršuju čarhu heta centralnyja siadziby… Zatym inšyja nasielenyja punkty, dzie ŭličvajecca intensiŭnaść darožnaha ruchu… Ja dumaju, na 2026‑27 hod, u bližejšy čas, budzie razhledžana ŭstrojstva asfaltabietonnych słajoŭ i pa susiedniaj vulicy».
Chto taki Siarhiej Alejčyk?
Siarhiej Vasilevič Alejčyk naradziŭsia 10 lutaha 1973 hoda ŭ vioscy Urviedź Kleckaha rajona Minskaj vobłaści. Jon žanaty, maje traich dziaciej.
Jaho karjera, pa źviestkach «Biełpoł», pačałasia na małoj radzimie. Z 2003 pa 2009 hod jon pracavaŭ u Klecku: spačatku ŭ miascovym dziciačym domie, a paśla — u adździele pa fizičnaj kultury, sporcie i turyźmie Kleckaha rajvykankama.
U 2009—2011 hadach Alejčyk pracavaŭ u Dziciačaj vioscy «Vytoki», viadomym centry dla dziaciej-sirot, pabudavanym pa siamiejnym typie ŭ pasiołku Vopytny Baraŭlanskaha sielsavieta.
U 2011 hodzie Siarhiej Alejčyk pierajšoŭ na pracu ŭ adździeł adukacyi, sportu i turyzmu Minskaha rajvykankama, zajmaŭ pasadu namieśnika načalnika adździeła. U 2019 hodzie staŭ namieśnikam načalnika ŭpraŭleńnia spravami, a ciapier kuryruje pytańni architektury i budaŭnictva ŭ prystaličnym rehijonie.
Ścipłyja bijahrafičnyja źviestki pra čynoŭnika, adnak, nie raskryvajuć hałoŭnaha — chto i kali pryščapiŭ jamu takuju prychilnaść da biełaruščyny.
U kamientarach pad videa adzin z karystalnikaŭ adznačyŭ, što viedaje Siarhieja Alejčyka asabista:
«Jon nie vydušyŭ ź siabie. Jon zaŭsiody razmaŭlaje na biełaruskaj movie stolki času, kolki ja jaho viedaju. A viedaju ja jaho hadoŭ 15».
Reakcyja ŭ sacsietkach
Kamientatary ŭ Threads uspryniali biełaruskamoŭnaha čynoŭnika z zachapleńniem i dolaj sumu ad taho, što heta stała redkaściu.
«Treba daviedacca, jak jaho zavuć, dy zakidać listami padziaki», — prapanuje aŭtar pasta.
«U Čyrvonuju knihu jaho! Raduje, što choć niechta razmaŭlaje na rodnaj biełaruskaj z čynoŭnikaŭ».
«Matka Boska! Dzie žyvie hety cud? Dziva dziŭnaje».
«A jakoje ŭ jaho «ś» miakkaje — miod dla vušej».
Ludzi adznačajuć, što sam fakt vykarystańnia biełaruskaj movy dziaržaŭnym słužboŭcam u haspadarčym pytańni vyklikaje pavahu i nadzieju: «Usio bolš ludziej na movu pierachodzić, nie ŭsio zhublena».
«Naša Niva» — bastyjon biełaruščyny
PADTRYMAĆCiapier čytajuć
Bietanavać hrošy — nacyjanalnaja ideja biełarusaŭ? Paraŭnali tempy budaŭnictva ŭ Biełarusi, Polščy, Litvie i Łatvii14
Kamientary