Prezident Ukrainy Uładzimir Zialenski zrabiŭ niečakanaje kadravaje pryznačeńnie. Novym ministram abarony krainy stanie 34‑hadovy Michaił Fiodaraŭ — vice-premjer i ministr ličbavaj transfarmacyi, viadomy jak stvaralnik sistemy dziaržaŭnych pasłuh «Dija» i inicyjatar prajekta «Armija dronaŭ».
Chto taki Michaił Fiodaraŭ?
Michaił Fiodaraŭ naradziŭsia ŭ 1991 hodzie ŭ horadzie Vasiljeŭka Zaparožskaj vobłaści. Jon skončyŭ fakultet sacyjałohii i kiravańnia Zaparožskaha nacyjanalnaha ŭniviersiteta, a taksama prajšoŭ navučańnie ŭ Jelskaj škole mieniedžmientu pa stratehii ličbavaj transfarmacyi.
Da prychodu ŭ palityku Fiodaraŭ zajmaŭsia biźniesam — zasnavaŭ kampaniju SMMSTUDIO, jakaja śpiecyjalizavałasia na rekłamie ŭ sacsietkach.
Jaho palityčnaja karjera pačałasia ŭ 2019 hodzie, kali jon uznačaliŭ digital-napramak u pieradvybarčaj kampanii Uładzimira Zialenskaha. Paśla pieramohi staŭ pazaštatnym daradcam prezidenta, a zatym — narodnym deputatam ad partyi «Słuha naroda».
«Dziaržava ŭ smartfonie» i «Armija dronaŭ»
Z 29 žniŭnia 2019 hoda Michaił Fiodaraŭ zajmaŭ pasadu vice-premjer-ministra i ministra ličbavaj transfarmacyi, staŭšy samym maładym ministram va ŭkrainskaj palitycy.
Za čas pracy jon inicyjavaŭ i realizavaŭ šerah prajektaŭ, jakija kardynalna źmianili ŭzajemadziejańnie hramadzian ź dziaržavaj:
- «Dija» — partał i mabilny dadatak, jaki abjadnaŭ pašpart, pravy kiroŭcy, COVID-siertyfikaty i dziasiatki inšych dziaržaŭnych pasłuh.
- «Dija.City» — śpiecyjalnaja padatkovaja i pravavaja prastora dla IT-kampanij.
- «Armija dronaŭ» — sumiesny prajekt z Hienštabam, jaki dazvoliŭ spraścić biurakratyju i daŭ mahutny šturšok raźvićciu ŭkrainskaj vytvorčaści BPŁA. Fiodaraŭ taksama pradstaviŭ płatformu Brave1 Market, jakuju acharaktaryzavaŭ jak «Amazon dla vojska».
Akramia taho, mienavita Fiodaraŭ praź niekalki dzion paśla pačatku poŭnamaštabnaha ŭvarvańnia źviarnuŭsia da Iłana Maska z prośbaj dać Ukrainie dostup da Starlink. U vyniku va Ukrainie zapracavali dziasiatki tysiač terminałaŭ.
Za svaju dziejnaść Fiodaraŭ atrymaŭ mnostva mižnarodnych uznaharod i ŭvachodziŭ u rejtynhi Forbes «30 da 30» i TIME100 Next. Z 2023 hoda jon źjaŭlajecca členam Staŭki Viarchoŭnaha Hałoŭnakamandujučaha Ukrainy.
Pryznačeńnie kiraŭnika Minličby na pasadu ministra abarony śviedčyć pra toje, što Uładzimir Zialenski robić staŭku na technałahičnaje raźvićcio vojska, u pryvatnaści, na masavaje ŭkaranieńnie bieśpiłotnych sistem i ličbavizacyju vajennych pracesaŭ.
Ciapier čytajuć
«Lena 20 rubloŭ» uziałasia za staroje: znakamitaja machlarka znoŭ razvodzić davierlivych biełarusaŭ9
Kamientary