U Japonii na pasadu načalnika čyhunačnaj stancyi aficyjna pryznačyli kotku
Trochkolernaja kotka pa mianušcy Jontama stała kiraŭnicaj stancyi Kisi, jakaja znachodzicca ŭ prefiektury Vakajama. Uračystaja cyrymonija adbyłasia 7 studzienia, paviedamlaje vydańnie Kyodo.
Padčas mierapryjemstva prezident Vakajamskaj elektryčnaj čyhunki Micunobu Kadzima asabista ŭručyŭ kotcy imianny miedal, jaki paćviardžaje jejny novy status i tytuł. Takim čynam Jontama aficyjna zastupiła na svaju «słužbu».
Novaja načalnica stała praciaham unikalnaj miascovaj tradycyi. Čyhunačnaja linija Kisihava viadomaja va ŭsioj Japonii tym, što z 2007 hoda na stancyjach pracujuć puchnatyja «supracoŭniki». Ich asnoŭnaja rola — sustrakać pasažyraŭ, stvarać utulnuju, dobrazyčlivuju atmaśfieru i pryciahvać uvahu da čyhunki. Kaścium načalnika stancyi z maleńkaj furažkaj užo daŭno staŭ admietnym simvałam hetaha rehijona. Pieršaj takoj «načalnicaj» stancyi ŭ 2007 hodzie stała kotka na mianušku Tama.
Na ŭračystaść sabralisia prychilniki z roznych kutkoŭ krainy. Adna z hościaŭ vykazała spadziavańnie, što kacinyja načalniki i nadalej buduć «achoŭvać» liniju Kisihava i prynosić joj pośpiech.
Padčas cyrymonii Micunobu Kadzima adznačyŭ, što raźličvaje na «lidarskija jakaści» novaj supracoŭnicy. Pavodle jahonych słoŭ, heta asabliva važna ciapier, kali miascovyja čyhunki pieražyvajuć pieryjad značnych źmien.
Hetaja tradycyja ŭžo pryniesła linii Kisihava suśvietnuju viadomaść. Turysty z roznych krain pryjazdžajuć u prefiekturu Vakajama admysłova dziela taho, kab ubačyć znakamitych puchnatych słužboŭcaŭ u ich uračystaj formie.
Kamientary