U Japonii zapłacili kala 3,2 miljona dalaraŭ za błakitnaha tunca. Heta rekord
Na pieršym aŭkcyjonie 2026 hoda, jaki adbyŭsia ranicaj 5 studzienia na rybnym rynku Tajosu ŭ tokijskim rajonie Kota, błakitny tuniec byŭ pradadzieny za rekordnyja 510,3 miljona ijen — heta prykładna 3,2 miljona dalaraŭ ZŠA.
Pa źviestkach uładaŭ Tokia, heta samaja vysokaja cana z 1999 hoda, kali pačali vieści supastaŭnuju statystyku. Novy pakazčyk značna pieraŭzyšoŭ papiaredni rekord — 333,6 miljona ijen, ustalavany ŭ pačatku 2019 hoda.
Dla paraŭnańnia: na aŭkcyjonie minułaha hoda błakitny tuniec vahoj 276 kh byŭ pradadzieny za 207 miljonaŭ ijen.
Sioletniaja rybina-rekardsmienka — błakitny tuniec vahoj 243 kh, — byŭ złoŭleny kala ŭźbiarežža horada Oma ŭ prefiektury Aamory na paŭnočnym uschodzie Japonii.
Pakupnikom stała kampanija Kiyomura, jakaja kiruje sietkaj restaranaŭ Sushizanmai. Staršynia praŭleńnia kampanii Kijosi Kimura paśla aŭkcyjonu adznačyŭ, što tuniec, nabyty na pačatku hoda, u Japonii ličycca simvałam udačy, i vykazaŭ nadzieju, što jak maha bolš naviedvalnikaŭ zmohuć adčuć navahodniuju atmaśfieru. U kampanii padkreślili, što, niahledziačy na vysoki košt zakupki, rybu buduć prapanoŭvać klijentam pa zvyčajnych cenach.
Zimovy siezon łovu tunca ličycca asabliva składanym, a vyniki pačatkovych aŭkcyjonaŭ hoda mocna zaležać ad jakaści ryby. Akramia taho, pakolki pasiaredniki časta zakuplajuć pradukcyju pad kankretnyja zakazy restaranaŭ i kramaŭ, takija aŭkcyjony razhladajucca jak svojeasablivy indykatar budučych spažyvieckich tendencyj u Japonii.
U toj ža čas pradstaŭnik mižnarodnaj rybałoŭnaj hrupy NDA Pew Charitable Trusts Dejv Hieršman adznačyŭ, što hety aŭkcyjon maje i pazityŭny sens: zapasy cichaakijanskaha błakitnaha tunca pastupova adnaŭlajucca paśla pieryjadu, kali jany ličylisia amal źniščanymi.
«Čamu my pavinny niejak uščemlivać siabie?». Dyrektarka RTBD patłumačyła, čamu pastaviła śpiektakl pavodle Puškina ŭ adnym z apošnich teatraŭ krainy, jaki pracavaŭ pa-biełarusku5757
Kamientary