Ci treba biełarusam rabić vybar pamiž Rasijaj i Jeŭropaj? Šrajbman i Lvoŭski spračajucca

Analityk Arciom Šrajbman i ekanamist Leŭ Lvoŭski ŭ novym vypusku jutub-pieradačy «Hadzińničak cikaje» dyskutavali, jaki vybar majuć biełarusy ŭ ciapierašnim hieapalityčnym raskładzie.

Šrajbman adznačaje: navat kali biełaruski narod palityzavaŭsia ŭ 2020-m, pytańnie hieapalityčnaha vybaru ŭsurjoz nie staviłasia.

«U cełym ja nie baču ŭ biełaruskim hramadstvie vostraj patreby: «A davajcie parefleksujem, my praź dziasiatki hadoŭ tudy ci tudy pojdziem». Mnie zdajecca, što daminujučym źjaŭlajecca, moža być, infantylnaje, moža być, vypakutavanaje stahodździami žadańnie siabravać z usimi, nie varahavać ni z kim, ničoha nie łamać z pracujučaha. Navat kali heta sajuz z Rasijaj. I nie rabić rezkich ekśpierymientaŭ i rezkich ruchaŭ».

Lvoŭski choć i pahadžajecca, što biełarusy chacieli b siabravać z usimi i žyć jak raniej, ale spračajecca:

«Prablema ŭ tym, što siabravać z usimi ciapier nielha. I ciapier, miarkujučy pa ŭsim, treba vybirać niejki z bakoŭ.

Tak, biełaruski narod nie choča vybirać baki, ale niavybar boku nie aznačaje, što my zastajemsia ŭ Šviejcaryi. Niavybar boku aznačaje, što my zastajemsia z Rasijaj.

Tamu bok vybirać pryjdziecca tak ci inakš. Nu, kali tolki biahučy śviet zusim nie razvalicca. Kali zusim razvalicca, to treba, viadoma, inviestavać u zołata, šakaład i niekudy ratavacca».

Šrajbman razvažaje: u ciapierašniaj realnaści, kali Jeŭropa i Rasija ŭ kanflikcie, vybaru ŭ Biełarusi nie budzie.

«Parłamient biełaruski nie budzie pry siońniašnich raskładach debatavać — vychad ci nie vychad z ADKB. My pry siońniašnich uvodnych vielmi žorstka pryviazanyja da Rasii.

Alternatyva aznačaje rasijski vajenny kantrol, jaki pryjdzie prosta na štykach. Pierad tym jak «vybirałka» pačnie funkcyjanavać, naša ŭnutranaja, unutrybiełaruskaja, užo bazavaj umovaj hetaha scenaryja źjaŭlajecca toje, što Rasija stała inšaj. I rasijska-zachodnija adnosiny stali inšymi.

I ŭzrovień varožaści źniziŭsia. (…) Voś tady dla Biełarusi, mahčyma, adkryjecca akno dla vybaru svajho hieapalityčnaha viektara.

I ci tam Finlandyja, ci nie Finlandyja, niavažna, Šviejcaryja ci nie Šviejcaryja. Ale prosta momant dla dyskusii źjavicca i dla mahčymaści realizacyi hetaha. I ŭ hetaj situacyi čamu nielha sumiaścić? Heta budzie inšy śviet, heta budzie inšaja Rasija, heta budzie inšy Zachad, heta budzie inšaja sistema kaardynat u rehijonie. Heta dakładna budzie paśla vajny Rasii i Ukrainy».

U takoj novaj realnaści, miarkuje Šrajbman, novaje pakaleńnie demakratyčnych sił moža prapanavać vobraz Biełarusi jak «siabra Rasii, jaki pry hetym nie źjaŭlajecca voraham Zachadu». Nie Finlandyja, jak ciapier prapanujuć Siarhiej Cichanoŭski i Vadzim Prakopjeŭ, a Kazachstan. 

«Kazachstanizacyja moža adbycca i źvierchu, z punktu hledžańnia Łukašenki i jaho adchileńnia ad ułady, kali jon nie pamre prosta na pasadzie.

Ale samaje hałoŭnaje, ja dumaju, što niešta padobnaje i budzie vobrazam nastupnaj biełaruskaj — nie viedaju, ci heta słova «apazicyja» — prahresiŭnaj častki palityčnaha śpiektra. Toje, što bližej budzie da mejnstrymu biełaruskaj hramadskaj dumki. Ideja ab tym, što my zastajomsia družalubnymi z Rasijaj, tamu što ekanomika, braterstva, mova i hetak dalej, ale pry hetym, pakolki my na skryžavańni, na handlovych šlachach, nam vyhadna być u kłasnych — nakolki heta mahčyma kłasnych — adnosinach z Zachadam».

• 5
• 3
• 3
• 6
• 0
• 0
• 0
• 0