Bieły dom vydaliŭ videa Trampa z Abamami ŭ vyhladzie małpaŭ, ale prezident ZŠA admoviŭsia vybačacca
Donald Tramp apynuŭsia ŭ centry skandału paśla publikacyi na svajoj staroncy ŭ Truth Social videa, na jakim Barak Abama i jaho žonka Mišel Abama pakazanyja ŭ vyhladzie małpaŭ-tancorak.
Videa vyklikała abvinavačańni ŭ rasiźmie. Niahledziačy na heta, Tramp zajaviŭ, što nie zrabiŭ nijakaj pamyłki, i admoviŭsia prynosić prabačeńni. Bieły dom spačatku nazvaŭ reakcyju «štučnym abureńniem», ale paźniej vydaliŭ publikacyju, rastłumačyŭšy heta «pamyłkaj supracoŭnika», piša Bild.
Administracyja śćviardžała, što rolik byŭ frahmientam staroha videa — parodyi na «Karala Lva», u jakoj Tramp pakazany jak «karol džunhlaŭ», a demakraty — u vobrazie inšych žyvioł. Adnak krytyka prahučała i z boku respublikancaŭ.
«Ja malusia, kab heta było padrobkaj, bo heta samaje rasisckaje, što ja kali-niebudź bačyŭ z boku Biełaha doma», — zajaviŭ adziny ciemnaskury sienatar-respublikaniec Cim Skot.
Ciapierašni skandał nahadaŭ pra daŭni kanflikt Trampa z Abamam. Paśla pieramohi demakrata na vybarach 2008 hoda Tramp staŭ adnoj z klučavych fihur ruchu, jaki śćviardžaŭ, što Abama nibyta naradziŭsia ŭ Kienii i nie mieŭ prava zajmać pasadu prezidenta ZŠA.
Kamientary