«Biełavija» pakazała jubilejnuju liŭreju na svaim samym vialikim samalocie
Avijakampanija «Biełavija» pradstaviła novuju jubilejnuju liŭreju na svaim samym vialikim samalocie — dalokamahistralnym Airbus A330-200. Abnaŭleńnie prymierkavana da 30‑hodździa pieravozčyka.
Na fiuzielažy źjavilisia vyjavy vaśmi słavutaściaŭ z haradoŭ, kudy vykonvajucca rejsy avijakampanii. Siarod ich — vieža «Burdž-al-Arab» u Dubai, frahmient kramloŭskaha ansambla ŭ Maskvie, «Pałajučyja viežy» ŭ Baku i inšyja abjekty. Pieršymi raźmieščany samyja paznavalnyja simvały Minska — «Varoty Minska».
Asnoŭnaj idejaj dyzajnu staŭ słohan kampanii «My złučajem», jaki naniesieny na ruchaviki samalota. U «Biełavija» padkreślili, što metaj było nie pakazać usie maršruty (ich značna bolš), a pieradać atmaśfieru padarožžaŭ i dadać vobrazu bolš emocyj.
Liŭreju stvaryli z dapamohaj mietadu abklejvańnia — heta dazvalaje chutka vykanać raboty biez doŭhaha vyvadu borta z ekspłuatacyi. Usie raboty pravodzilisia padčas płanavaha techničnaha absłuhoŭvańnia. Vykarystali lituju palimiernuju plonku z vysokaj adhiezijaj, a ahulnaja płošča materyjału pieravysiła 100 kvadratnych mietraŭ.
Heta ŭžo treci kreatyŭny prajekt kampanii za apošnija try hady. U sakaviku 2024 hoda samalot Embraer-175 atrymaŭ «kaśmičnuju» liŭreju ŭ honar palotu na MKS kaśmičnaj turystki Maryny Vasileŭskaj. U listapadzie 2024 hoda ŭ vyniku supracoŭnictva avijakampanii z chakiejnym kłubam «Dynama-Minsk» ekskluziŭnaje afarmleńnie źjaviłasia ŭ Embraer-195.
Kamientary