Naradžalnaść u Biełarusi źmienšyłasia za hod jašče na 10,7%. Novaja zakrytaja statystyka Minzdaroŭja
Pry hetym śmiarotnaść vyrasła na 1,6%. Vydańnie «Lusterka» pry dapamozie inicyjatyvy Belpol atrymała ŭnutrany dakład Ministerstva achovy zdaroŭja sa śviežymi danymi, jakija pakazvajuć situacyju z demahrafijaj u krainie.
Naradžalnaść
Pa danych Ministerstva achovy zdaroŭja, i biez taho nievysokaja naradžalnaść praciahnuła źnižacca. Pradstaŭnik viedamstva piša, što kolkaść narodžanych u pieršaj pałovie 2025 hoda akazałasia na 10,7% mienšaj, čym u anałahičnym pieryjadzie papiaredniaha hoda.
Aŭtar nie pryvodzić dakładnuju ličbu, adnak daje pakazčyk za pieršaje paŭhodździe 2024 hoda — tady naradzilisia 29 362 dziciaci. Kali adniać 10,7%, atrymajecca, što ŭ pieršaj pałovie 2025‑ha ŭ Biełarusi naradziłasia 26,2 tysiačy dziaciej.
Kali takaja ž tendencyja zachavałasia da kanca hoda, možna budzie kazać pra novy antyrekord. Heta budzie značyć, što za ŭvieś 2025 hod naradziłasia ŭsiaho 52,4 tysiačy dziaciej, a kaeficyjent naradžalnaści składzie 5,75‰.
Kolkaść naradžeńniaŭ (2012—2025)
Pa danych Ministerstva achovy zdaroŭja, niama rehijona, u jakim naradžalnaść vyrasła. Chutčej za ŭsio jana źnižałasia ŭ Viciebskaj vobłaści — adrazu na 15% u paraŭnańni z anałahičnym pieryjadam papiaredniaha hoda. U Bresckaj vobłaści pakazčyk pamienšyŭsia na 12,7%, u Minsku — na 10,7%, u astatnich abłaściach źnižeńnie skłała ad 9 da 10%.
Śmiarotnaść
Sychodzić z žyćcia biełarusy stali trochi čaściej, vynikaje z dakłada Ministerstva achovy zdaroŭja. U cełym pa krainie kolkaść pamierłych vyrasła na 1,6% u paraŭnańni z anałahičnym pieryjadam minułaha hoda.
Viedamstva znoŭ nie piša dakładnuju ličbu, ale jaje možna padličyć na asnovie raniej apublikavanych danych Biełstata. Pavodle raźlikaŭ «Lusterka», u pieršaj pałovie 2025‑ha pamierła kala 58,5 tysiačy čałaviek. Kali takaja ž tendencyja zachavałasia, to kolkaść śmierciaŭ za ŭvieś hod mahła dasiahnuć kala 117 tysiač čałaviek.
Kolkaść śmierciaŭ (2012—2024)
Pa infarmacyi Ministerstva achovy zdaroŭja, rost kolkaści pamierłych zafiksavali amal va ŭsich rehijonach respubliki. Zaŭvažniej za ŭsio hety pakazčyk pavialičyŭsia ŭ Minsku. Tam u pieršym paŭhodździ 2025 hoda pamierła na 6% abo na 544 čałavieki bolš, čym u anałahičny pieryjad papiaredniaha hoda — heta značyć kala 9,6 tysiačy čałaviek.
U Homielskaj i Mahiloŭskaj abłaściach usio naadvarot: kolkaść pamierłych tam trochi pamienšyłasia. Praŭda, źnižeńnie śmiarotnaści aŭtar dakłada nazyvaje niaznačnym — jano skłała 0,3% i 0,1% adpaviedna.
Jak chutka pamianšajecca nasielnictva Biełarusi
Kolkaść nasielnictva Biełarusi skaraciłasia na 30 612 čałaviek za pieršuju pałovu 2025 hoda, havorycca ŭ dakładzie Ministerstva achovy zdaroŭja sa spasyłkaj na aktualnyja danyja Nacyjanalnaha statystyčnaha kamiteta. Na 30 červienia 2025 hoda nasielnictva Biełarusi składała 9 078 668 čałaviek.
Hetyja ličby ŭličvajuć i «naturalnyja straty» — heta značyć roźnicu pamiž śmiarotnaściu i naradžalnaściu, — i «mihracyjny pryrost». Asobna čynoŭniki paznačajuć rehijony z samym zaŭvažnym skaračeńniem nasielnictva biez uliku mihracyi.
- U Minsku «naturalnyja straty» skłali 4959 čałaviek, hety pakazčyk vyras na 26% u paraŭnańni z anałahičnym pieryjadam minułaha hoda;
- u Bresckaj vobłaści — minus 4254 čałavieki za paŭhoda (+19,3%);
- u Viciebskaj vobłaści — minus 5674 čałavieki (+16,2%).
Adziny rehijon, jaki vyras
Demahrafičnuju jamu ŭ teoryi moža trochi zhładzić mihracyja. Naprykład, pavodle aficyjnaj statystyki, u 2024 hodzie žycharoŭ Minska stała bolš, choć novanarodžanych było mała, jak nikoli ŭ historyi. Tak atrymałasia z-za taho, što kolkaść tych, chto pryjechaŭ, pieravysiła kolkaść tych, chto vyrašyŭ źjechać.
Pa danych Ministerstva achovy zdaroŭja, u pieršaj pałovie 2025 hoda takim miescam stała Minskaja vobłaść.
«Admoŭnaja dynamika adznačajecca va ŭsich rehijonach respubliki, za vyklučeńniem Minskaj vobłaści, u jakoj kolkaść nasielnictva za 6 miesiacaŭ 2025 hoda pavialičyłasia na 1551 čałavieka», — piša aŭtar dakłada.
Chutčej za ŭsio, pryčyna hetaha rostu mienavita ŭ mihracyi, a nie ŭ demahrafičnym cudzie. Pavodle raźlikaŭ «Lusterka», biez uliku novych pasialencaŭ kolkaść žycharoŭ Minskaj vobłaści naadvarot, pamienšyłasia b prykładna na piać tysiač čałaviek.
Pradstaŭnik Ministerstva achovy zdaroŭja adznačaje, što ŭ cełym demahrafičnaja situacyja «pa-raniejšamu vyklikaje zakłapočanaść», a na jaje stabilizacyju «nakiravanyja ŭsie namahańni» viedamstva.
Piać šlachoŭ, jakimi demahrafija transfarmuje suśvietnuju ekanomiku
Piatkievič: Davajcie raskazvać, što paśla 30 hadoŭ naradžać składana
U Jeŭropie raście razryŭ u praciahłaści žyćcia pamiž rehijonami. U čym pryčyny?
Jak dehradujuć biełaruskija harady, jakija niadaŭna byli łakalnymi drajvierami
Piatkievič: Da 2030 hoda ŭ Biełarusi čakajecca ŭsplosk naradžalnaści
Ciapier čytajuć
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju3
Kamientary