«My sami prymiem heta rašeńnie». Pucin u Kramli pastaviŭ pierad Nikołam Pašynianam pytańnie rubam, toj trymaŭsia hodna

Padčas hetaj sustrečy Pucin faktyčna pastaviŭ pierad Armienijaj umovu: krainie pryjdziecca vybirać pamiž pahłybleńniem supracoŭnictva ź Jeŭrasajuzam i ŭdziełam u intehracyjnych strukturach, źviazanych z Rasijaj, takich jak Jeŭrazijski ekanamičny sajuz. Jon padkreśliŭ, što sumiaščeńnie hetych dvuch napramkaŭ, na jaho dumku, niemahčymaje.

Pry hetym rasijski palityk zajaviŭ, što Maskva nibyta «spakojna» stavicca da dyskusij u Armienii adnosna ES, ale faktyčna papiaredziŭ pra nastupstvy takoha zbližeńnia.

Asobna Pucin zakranuŭ temu pastavak hazu. Jon adznačyŭ, što Rasija pradaje Armienii haz značna tańniej, čym heta adbyvajecca na jeŭrapiejskim rynku, i faktyčna namiaknuŭ, što enierhietyčnaje supracoŭnictva taksama moža stać instrumientam upłyvu.

U adkaz Pašynian padkreśliŭ, što Armienija — demakratyčnaja kraina, dzie rašeńni prymajucca narodam:

«I kali pracesy dojduć da taho, što treba budzie pryniać rašeńnie, ja ŭpeŭnieny, što my, heta značyć hramadzianie Respubliki Armienija, prymiem hetaje rašeńnie».

Jon zajaviŭ, što pakul Jerevan moža sumiaščać udzieł u Jeŭrazijskim sajuzie z raźvićciom adnosin ź ES, kraina budzie praciahvać takuju palityku bałansu. A kali paŭstanie nieabchodnaść vybaru, heta rašeńnie prymuć sami hramadzianie Armienii bieź źniešniaha cisku.

«Dvojčy na hod u nas prachodziać municypalnyja vybary, jakija taksama vielmi palityzavanyja, tamu što ŭ vyniku našych palityčnych reformaŭ ludzi hałasujuć za abo suprać palityčnych partyj», — skazaŭ Pašynian.

Pucin taksama zakranuŭ unutrypalityčnyja pytańni Armienii, u pryvatnaści ŭdzieł prarasijskich sił u vybarach i zatrymańni asob z rasijskim hramadzianstvam, majučy na ŭvazie miljardera Samvieła Karapieciana. U adkaz Pašynian spasłaŭsia na armianskaje zakanadaŭstva, jakoje nie dapuskaje vyłučeńnia ŭ parłamient asob z padvojnym hramadzianstvam:

«Asoby z rasijskimi pašpartami, zhodna z Kanstytucyjaj Respubliki Armienija, nie mohuć być ni kandydatami ŭ deputaty, ni kandydatami ŭ premjer-ministry», — patłumačyŭ Pašynian Pucinu.

U chodzie razmovy jon padkreśliŭ, što ŭ Armienii svabodnaja palityčnaja sistema i niama palityčnych źniavolenych, a taksama adznačyŭ vysoki ŭzrovień svabody słova i internetu. Heta było padadziena jak adroźnieńnie ad situacyi ŭ Rasii.

«Našy sacyjalnyja sietki, naprykład, na 100% svabodnyja, bieź jakich-niebudź abmiežavańniaŭ», — skazaŭ Pašynian Pucinu, namiakajučy na apošnija sproby rasijskich uładaŭ błakavać papularnyja ŭ rasijan i nie padkantrolnyja Kramlu miesiendžary.

Taksama ŭ Armienii «niama ŭdzielnikaŭ palityčnych pracesaŭ u miescach pazbaŭleńnia voli», zatoje «jość hramadzianie, jakija ličać, što ŭ Armienii zanadta šmat demakratyi. Ale dla nas heta pryncypovaje pytańnie».

Asobna abmiarkoŭvaŭsia i hieapalityčny kantekst. Adnosiny pamiž krainami abvastrylisia paśla taho, jak Armienija pačała addalacca ad Rasii, asabliva paśla kanfliktu vakoł Nahornaha Karabacha i niedastatkovaj, na dumku Jerevana, padtrymki z boku Maskvy. Armienija navat prypyniła ŭdzieł u arhanizacyi, jakuju ličać prarasijskaj, što jašče bolš pahoršyła adnosiny.

• 81
• 0
• 1
• 0
• 0
• 0
• 0
• 0