Pašynian u mietro emacyjna paspračaŭsia z pasažyrkaj nakont Karabacha
Adna z pasažyrak abvinavaciła premjer-ministra Armienii ŭ zdačy rehijona. Toj u adkaz pierajšoŭ na kryk.
Emacyjnaja razmova trapiła ŭ tranślacyju špacyra palityka pa Jerevanie i jaho razmoŭ z žycharami stalicy Armienii.
Nikoł Pašynian razzłavaŭsia paśla pytańnia pra Karabach, i što miascovamu armianskamu nasielnictvu daviałosia ŭciakać adtul paśla viartańnia rehijona Azierbajdžanu. Armianski premjer zajaviŭ u adkaz, što ŭłady patracili miljardy biudžetnych hrošaj, kab žychary Karabacha mieli mahčymaść zastacca.
«My zrabili ŭsio, kab vy žyli ŭ Karabachu, i ŭ 2023 hodzie mienavita vy abvinavačvali mianie ŭ tym, što zakryli miežy, kab narod nie vyjazdžaŭ z Karabacha ŭ Armieniju. Ciapier vy pryjechali siudy i kažacie: oj, a my chacieli viarnucca», — skazaŭ jon.
Surazmoŭca Pašyniana prasiła nie pavyšać hołas, na što toj adkazaŭ: «Ja budu havaryć hučniej, nie treba vinavacić mianie ŭ tym, što zdaryłasia». Taksama premjer-ministr Armienii, na vopratcy jakoha byŭ značok z kartaj krainy, paprasiŭ žančynu «nie kazać pra hetuju kartu z takoj pahardaj».
«Nie sprabujcie vy, što ŭciakli, kazać, što ja zdaŭ Karabach», — dadaŭ jon.
Armienija straciła kantrol nad Karabacham u vyniku azierbajdžanskaj vajennaj apieracyi ŭ vieraśni 2023 hoda. Bolš za 100 tysiač armian pakinuli Karabach, a niepryznanaja Nahorna-Karabachskaja respublika spyniła isnavańnie z 1 studzienia 2024 hoda.
Ciapier čytajuć
Biełarus zrabiŭ prapanovu kachanaj kala znakamitaha fantana Trevi ŭ Rymie — pad apładysmienty dziasiatkaŭ turystaŭ1
Kamientary