«Žonka syšła — pierajšoŭ na piražki»: Pašynian paśla hučnaha razryvu ŭvarvaŭsia ŭ sacsietki z vuličnaj ježaj
Premjer-ministr Armienii Nikoł Pašynian praciahvaje epaciravać publiku ŭ sacsietkach. Hetym razam palityk, jaki litaralna dniami pieražyŭ publičny razryŭ z žonkaj paśla 30 hadoŭ sumiesnaha žyćcia, vykłaŭ videa, dzie z apietytam jeść vuličny fastfud prosta na piarednim siadzieńni aŭtobusa. Roliki ź piražkom i kukuruzaj imhnienna stali virusnymi, a ŭ kamientach sčapilisia prychilniki «narodnaha» lidara i jaho žorstkija krytyki.
Abodva videa źniatyja ŭ maksimalna niefarmalnaj abstanoŭcy. Nikoł Pašynian razam sa svaimi paplečnikami jedzie ŭ zvyčajnym aŭtobusie. Na pieršym videa, łakanična padpisanym «Pierapynak», kiraŭnik urada z asałodaj žuje vialiki smažany piražok. Na druhim videa, padpisanym jak «Śniadanak», u rukach premjera ŭžo apynuŭsia katach varanaj kukuruzy.
Nijakich pramoŭ, nijakich palityčnych łozunhaŭ — tolki palityk, jaki žuje na kamieru.
Značnaja častka kamientaryjaŭ pad videa tyčyłasia siamiejnaha statusu premjera: «Situacyja: Pašynian paśla razvodu», «Žonka vyhnała, davodzicca jeści na vulicy?», «Paśla razvodu charčujeciesia ŭ palach?», «Režym padarožnika paśla rastańnia».
17 lutaha Hanna Akapian, jakaja była spadarožnicaj premjera sa studenckich hadoŭ i naradziła jamu čaćviarych dziaciej, niečakana abviaściła ab zaviaršeńni ich hramadzianskaha šlubu. 25 lutaha jana aficyjna pakinuła ŭradavuju rezidencyju, namiaknuŭšy navat na mahčymaść kryminalnaj spravy suprać siabie.
Sam Nikoł Pašynian 27 lutaha publična paprasiŭ u jaje prabačeńnia ŭ svaim Telegram-kanale, pryznaŭšy, što «pryčyniŭ joj horyč» i, mahčyma, nie byŭ takoj ža nadziejnaj aporaj dla žonki, jakoj jana była dla jaho ŭsie hetyja 30 hadoŭ. Mienavita na fonie hetaj dramy videa ź piražkom nabyło ŭ vačach publiki asablivaje, źlohku kamičnaje i adnačasova samotnaje adcieńnie.
Kamientatary padzialilisia na dva radykalna supraćlehłyja łahiery.
Dla adnych Pašynian staŭ uzoram demakratyčnaha lidara. Ludzi zamiłoŭvajucca jaho prastatoj:
- «Samy adekvatny prezident na siońnia! Prosta kraš»
- «Pakul uvieś śviet vajuje i varjacieje, vaš miły premjer-ministr jeść piražok. Miłaška!»
- «Jak ža ja jaho abažaju, jaki jon prosty, Hospadzi».
Cikava, što šmat uchvalnych kamientaryjaŭ pakinuli karystalniki z susiednich krain, u pryvatnaści z Azierbajdžana, paraŭnoŭvajučy jaho z ułasnymi čynoŭnikami:
«Vyhladaje jak prosty čałaviek, mnie padabajecca. Našy b tak nie zmahli», «Jon kiraŭnik krainy, a pavodzić siabie jak dziadźka-kanduktar u aŭtobusie».
Adnak u značnaj častki armianskaj aŭdytoryi roliki vyklikali lutaść. Krytyki ličać takija pavodziny niedarečnymi dla kiraŭnika dziaržavy, asabliva na fonie straty Karabacha i napružanaj vajennaj situacyi ŭ rehijonie — šmat chto zhadaŭ eskałacyju i bambardziroŭki ŭ susiednim Iranie:
- «Ludzi, jakija tut pišuć dobryja kamientaryi, vy śpicie? Pračniciesia! Heta ŭzrovień bamžoŭ, jakija jaduć brudnymi rukami ŭ aŭtobusie, a nie tvar dziaržavy!»
- «Pobač vajna, susiedziaŭ bambiać, buduć biežancy. Što robicca ŭ Armienii? Jaduć piražki!»
- «Hetuju nacyju jašče chtości choča pieramahčy? Pad nosam usio haryć, a jany jaduć».
Častka pieradvybarčaj stratehii
Ekśpierty bačać za hetaj źniešniaj niepasrednaściu dakładny palityčny raźlik napiaredadni parłamienckich vybaraŭ u červieni 2026 hoda. Ułady sprabujuć źmianić paradak dnia i sfarmiravać vobraz blizkaha da naroda palityka, jaki «žyvie dalej» paśla ŭsich nacyjanalnych i asabistych trahiedyj.
Videa z fastfudam idealna kładucca ŭ hety novy pijar-šlach. Raniej Pašynian užo padarvaŭ sacsietki rolikami, dzie z sumnym tvaram słuchaŭ Ziemfiru i Džona Lenana, a naprykancy studzienia i zusim debiutavaŭ u jakaści barabanščyka na kancercie ŭłasnaha muzyčnaha hurta «Varčabend».
I navat kali videa z varanaj kukuruzaj abo piražkom vyklikaje ŭ kahości razdražnieńnie, jano ŭsio roŭna vykonvaje svaju funkcyju: Pašynian zastajecca ŭ centry ŭvahi moładzi i sacsietak.
Niekatoryja karystalniki ŭžo žartam robiać staŭki, što źjavicca ŭ instahramie premjera nastupnym razam: «Učora piražki, siońnia kukuruza. Nastupny etap — siemki ci chaš?».
-
Dzivosnaje viartańnie. Jak u Alpach adradzili źnikłych ptušak
-
«Ja dziakuju Bohu, što kraina, ź jakoj vy vajujecie, siońnia nie vorah Vienhryi». Orban adkazaŭ Viktaru Juščanku na jahony adkryty list
-
Tramp zaklikaŭ krainy, jakija paciarpieli ad zakryćcia Armuzskaha praliva, nakiravać tudy vajskovyja karabli
Ciapier čytajuć
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?18
Što aznačaje źjaŭleńnie vychadcaŭ ź Biełarusi ŭ rasijskim śpiecpadraździaleńni dla asabliva važnych apieracyj i tajnych zabojstvaŭ?
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci33
Za dva dni na vyratavalny ŭkoł Ksiušy z Mahilova sabrali rekordnyja $300 tysiač. Mama zdała jaje ŭ dzietdom, a čužyja ludzi bjucca za žyćcio dziciaci3
Vychadcy z «Alfa» KDB Biełarusi zajmajuć kiraŭničyja pasady ŭ novym rasijskim supiersakretnym śpiecpadraździaleńni, pryznačanym dla zabojstvaŭ za miažoju3333
Kamientary