U «razumnych» futbołkach «Najka» dziŭna pavodziać siabie plečy. Kampanija pryznała prablemu

Novaja kalekcyja ad Nike mieła stać viaršyniaj technałahičnaha prahresu ŭ spartyŭnym adzieńni. Raspracoŭščyki vykarystali sistemu Aero-FIT — vysokatechnałahičny mietad tkańnia, stvorany z dapamohaj kampjutarnaha madelavańnia i štučnaha intelektu.

Pa zadumcy «razumnyja» futbołki pavinny idealna advodzić vilhać i achałodžvać cieła, što krytyčna važna dla budučaha čempijanatu śvietu, matčy jakoha projduć va ŭmovach ekstremalnaj letniaj śpiakoty ŭ ZŠA, Mieksicy i Kanadzie.

Mahčymaść aprabavać inavacyju na praktycy źjaviłasia padčas sakavickaha mižnarodnaha pierapynku — tradycyjnaj paŭzy ŭ nacyjanalnych čempijanatach, kali hulcy pakidajuć kłuby i źjazdžajucca ŭ zbornyja. Adnak mienavita hetaja premjera abiarnułasia dla Nike kanfuzam, paviedamlaje The Guardian.

Uvahu hledačoŭ prykavała adna detal — plečavyja švy ŭzduvajucca. Kali na formie zbornaj ZŠA heta było ledź zaŭvažna, to na futbołcy Kilijana Mbape defiekt vyhladaŭ amal kamična. Bolš za ŭsio nie pašancavała ŭruhvajcam: praź dziŭnuju formu plačej hulcoŭ pačali paraŭnoŭvać sa Šrederam — hałoŭnym złodziejem z «Čarapašak-nindzia».

Pavialičyć

Padobnyja prablemy chutka pačali adznačać i zvyčajnyja ludzi. U internecie źjavilisia vodhuki ludziej, jakija nabyli novyja futbołki i sutyknulisia z tym ža defiektam. Niekatoryja śćviardžali, što zmahli krychu vypravić situacyju z dapamohaj adparvalnika abo prańnia pierad vykarystańniem.

Ale inšyja byli značna bolš kateharyčnyja. Adzin z kanadskich fanataŭ na Reddit napisaŭ, što kanstrukcyja plačej «zroblena tak, što tkanina ŭ lubym vypadku budzie źbiracca ŭ składki», asabliva kali ŭ čałavieka šyrokija plečy. Jon nazvaŭ dyzajn «tupym».

Dla ludziej, jakija zapłacili za takuju futbołku ad 100 da 200 dalaraŭ, heta małapryjemnaje adkryćcio. Tym bolš dla nacyjanalnych zbornych i samich futbalistaŭ, dla jakich važnyja nie tolki kamfort, ale i vyhlad na hałoŭnym futbolnym turniry śvietu.

U Nike na krytyku adreahavali. Kampanija pryznała, što prablema sapraŭdy isnuje, i paviedamiła, što vyvučaje mahčymyja šlachi jaje vyrašeńnia. Pavodle pradstaŭnika brenda, padčas apošnich mižnarodnych matčaŭ była zafiksavana «nievialikaja prablema», najbolš prykmietnaja ŭ zonie plečavoha šva. Pry hetym u Nike padkreślili, što na funkcyjanalnaść formy heta nie ŭpłyvaje, ale estetyka «nie adpaviadaje naležnamu ŭzroŭniu».

Ciapier kampanija viadzie pieramovy z futbolnymi fiederacyjami i partniorami pa vytvorčaści, kab vyznačyć nastupnyja kroki. Pakul niezrazumieła, ci budzie dyzajn formy niejkim čynam źmienieny i ci zmohuć pakupniki raźličvać na niejkuju kampiensacyju. Situacyju ŭskładniaje i toje, što da pačatku turniru zastałosia krychu bolš za dva miesiacy, a vialikuju kolkaść futbołak užo pradali.

• 0
• 0
• 4
• 3
• 0
• 0
• 0
• 0