Skandał u Lizie čempijonaŭ: matč «Bienfika» — «Reał» pierapynili na 10 chvilin z-za skarhi Vinisiusa na rasisckuju abrazu

Matč płej-of futbolnaj Lihi čempijonaŭ u aŭtorak pamiž madrydskim «Reałam» i lisabonskaj «Bienfikaj» (1:0) byŭ prypynieny na 10 chvilin paśla taho, jak adna z zorak «Reała», čarnaskury brazilec Vinisius Žunijor, paskardziŭsia sudździ na rasisckuju abrazu z boku hulca «Bienfiki», piša Bi-bi-si.

Incydent zdaryŭsia ŭ pačatku druhoha tajma, adrazu paśla taho jak Vinisius pryhožym udaram u «dziaviatku» zabiŭ adziny hoł u hetym matčy.

Matč prachodziŭ na stadyjonie «Bienfiki». Zabiŭšy hoł, Vinisius pabieh da vuhła pola i, paviarnuŭšysia tvaram da trybun, staŭ radasna adznačać hoł, pahojdvajučy ściohnami pierad vuhłavym fłažkom. Zatym, akružany tavaryšami pa kamandzie, jon pajšoŭ nazad na svaju pałovu pola.

Praź ličanyja siekundy Vinisius źviarnuŭsia da sudździ, francuza Fransua Letekśje, i zajaviŭ, što arhiencinski vinhier «Bienfiki», 20‑hadovy Džanłuka Prestyjani abraziŭ jaho.

Letekśje zhodna z antyrasisckim pratakołam FIFA tut ža spyniŭ matč. Paśla dziesiaci chvilin pieramoŭ pamiž kamandami i sudździami hulnia adnaviłasia.

Na videazapisach vidać, jak Prestyjani naciahvaje na rot kaŭnier futbołki i skroź jaho niešta kaža, hledziačy na Vinisiusa.

Toje, što jon pry hetym pramaŭlaŭ kankretnuju abrazu, zajaviŭ u intervju paśla matča i forvard «Reała» Kilijan Mbape. Pavodle jaho słoŭ, hetuju abrazu Prestyjani paŭtaryŭ piać razoŭ, i jaje čuli i jon sam, i inšyja hulcy.

«Ja vielmi pavažaju «Bienfiku» i jaje treniera [Žaze Maŭryńju], jon adzin z najlepšych u historyi, ale, na maju dumku, hety hulec bolš nie zasłuhoŭvaje taho, kab vystupać u Lizie čempijonaŭ. Nielha dapuskać, kab futbalist, jaki hulaje ŭ hałoŭnym spabornictvie Jeŭropy, voś tak pavodziŭ siabie», — skazaŭ Mbape.

«Pahladzim, što budzie dalej. Niachaj vyrašaje UEFA, jany zaŭsiody starajucca niešta zrabić. Ciapier pierad imi surjozny vypadak, i ja spadziajusia, što jany niešta zrobiać», — praciahnuŭ francuz.

Džanłuka Prestyjani pakul hety incydent nie kamientavaŭ.

Kamientary treniera «Bienfiki» Žaze Maŭryńju vielmi nie spadabalisia niekatorym futbolnym ahladalnikam i byłym i dziejnym hulcam. Jon uchilista skazaŭ, što pačuŭ dźvie roznyja viersii ad dvuch hałoŭnych udzielnikaŭ incydentu, a taksama papraknuŭ Vinisiusa ŭ tym, što jon zanadta pravakacyjna śviatkavaŭ svoj hoł.

Sam Maŭryńju byŭ vydaleny ŭ kancy matča za toje, što zanadta burna, z punktu hledžańnia sudździ, pratestavaŭ suprać rašeńnia apošniaha nie pakazvać tamu ž Vinisiusu druhuju žoŭtuju kartku za hruby foł padčas ataki «Bienfiki».

«Jany [Vinisius i Prestyjani] raskazali mnie roznyja viersii. Ale ja nie vieru ni ŭ tuju, ni ŭ inšuju. Ja chaču być niezaležnym», — skazaŭ Maŭryńju.

Na pytańnie, ci pravakavaŭ, na jaho dumku, Vinisius zaŭziataraŭ «Bienfiki», Maŭryńju adkazaŭ: «Tak. Dumaju, tak».

«Heta pavinien byŭ być šalony momant u hulni, uzrušalny hoł. Ale, na žal, jamu niedastatkova było zabić hety dzivosny hoł. Kali zabivaješ taki hoł, treba śviatkavać pavažliva, — skazaŭ Maŭryńju. — Ja skazaŭ [Vinisiusu]: kali zabivaješ taki hoł, to prosta adznač jaho i idzi nazad».

«Kali jon skazaŭ pra rasizm, ja jamu adkazaŭ, što najvialikšy hulec u historyi hetaha kłuba [Ejsiebia] byŭ čarnaskurym, — praciahnuŭ Maŭryńju. — Rasizm — heta apošniaje, u čym možna abvinavacić hety kłub».

«Niešta tut nie tak, tamu što heta adbyvajecca na kožnym stadyjonie — dzie hulaje Vinisius, niešta pastajanna adbyvajecca», — dadaŭ partuhalski trenier. 

Hetyja remarki Maŭryńju asudzili, u pryvatnaści, były hulec «Reała» i zbornaj Niderłandaŭ Kłarens Ziejedorf, były hulec zbornaj Anhlii Tea Uołkat, ciapierašni hulec «Reała» i zbornaj Anhlii Trent Aleksander-Arnold.

«Ja dumaju, jon jašče nie astyŭ ad emocyj. Dumaju, jon zrabiŭ vialikuju pamyłku, sprabujučy apraŭdać rasisckuju abrazu, — skazaŭ Ziejedorf na Amazon Prime. — Jon pa sutnaści kaža, što kali Vinisius ciabie pravakuje, to pavodzić siabie pa-rasiscku — heta okiej. Ja liču, što jon vielmi nie maje racyi.

• 0
• 0
• 1
• 1
• 0
• 0
• 0
• 0