Litoŭskija pamiežniki zatrymali na miažy ź Biełaruśsiu 30 nielehałaŭ, jakija vyłazili z padkopu na miažy

Na miažy ź Biełaruśsiu supracoŭniki Słužby achovy dziaržaŭnaj miažy zatrymali vialikuju hrupu nielehalnych mihrantaŭ. Siarod ich byŭ i arhanizatar niezakonnaha pierasiačeńnia miažy.

Taksama byli zatrymanyja troje zamiežnikaŭ, jakija pavinny byli pieravieźci nielehałaŭ u Polšču. Paźniej byli zatrymanyja i inšyja padazravanyja, paviedamlaje Słužba achovy dziaržaŭnaj miažy.

6 krasavika ŭ druhoj pałovie dnia sistema videanazirańnia ŭ Vilenskim rajonie zafiksavała niezvyčajny vypadak parušeńnia miažy. Kala vioski Baravikinie (ź biełaruskaha boku — zakryty pierachod Katłoŭka) z prakapanaha pad ziamloj tunela ciaham niekalkich chvilin miažu nielehalna pierasiekła hrupa z 30 čałaviek.

Pamiežniki paviedamili pra incydent kaleham, jakija znachodzilisia pablizu. U apieracyi ŭdzielničała vialikaja kolkaść supracoŭnikaŭ, słužbovyja sabaki, byŭ padniaty viertalot i vykarystany drony, taksama pryciahnuli palicyju.

U noč na aŭtorak i ŭdzień aŭtorka supracoŭniki Słužby achovy dziaržaŭnaj miažy zatrymali ŭ Vilenskim rajonie bolšuju častku nielehałaŭ, jakija raźbilisia na nievialikija hrupy. Byli zatrymanyja troje zamiežnikaŭ, jakija pavinny byli pieravieźci ich u Polšču.

Vyśvietliłasia, što aŭtamabilem Toyota Proace kiravaŭ 35‑hadovy hramadzianin Ukrainy, jaki pryznaŭsia, što pryjechaŭ pa nielehałaŭ. Taksama byli zatrymanyja jašče dvoje mužčyn — 41‑hadovy kiroŭca Opel Corsa (hramadzianin Hruzii) i 24‑hadovy hramadzianin Ukrainy za rulom VW Passat. Usie troje majuć dazvoł na žycharstva ŭ Polščy. Pamiž saboj jany nie znajomyja. Vyśvietliłasia, što ich dziejańni kaardynavali arhanizatary apieracyi, jakija davali ŭkazańni, maršruty i inšuju infarmacyju.

8 krasavika ranicaj palicyja zatrymała ŭ Vilni 37‑hadovaha hramadzianina Litvy, jaki na aŭtamabili VW Tiguan pieravoziŭ šaściarych nielehałaŭ (hramadzian Afhanistana). Da viečara sierady byli zatrymanyja 27 z 30 nielehałaŭ, jakija pierasiekli miažu praz padkop.

24 ź ich viarnuli ŭ Biełaruś, jašče dvoje z-za prablem sa zdaroŭjem byli dastaŭleny ŭ balnicu.

U Litvu nielehalna trapili hramadzianie Afhanistana, Iraka i Pakistana. Tolki častka ź ich pradjaviła dakumienty, jakija śviedčać asobu.

Pa fakcie niezakonnaha pierasiačeńnia miažy raspačata rasśledavańnie. 8 krasavika paśla abiedu byli zatrymanyja 44‑hadovy hramadzianin Azierbajdžana i 28‑hadovy hramadzianin Litvy, jakija padazrajucca nie tolki ŭ arhanizacyi niezakonnaha pierachodu miažy, ale i ŭ inšych padobnych złačynstvach. Zatrymanyja znachodziacca pad vartaj. Pošuki jašče traich nielehałaŭ praciahvajucca.

• 0
• 0
• 2
• 3
• 0
• 0
• 0
• 0