64‑hadovaha vice-čempijona pa aŭtasporcie kinuli ŭ kałoniju za palityku. Aryštavali paśla viartańnia z-za miažy
Juryj Očkas usio žyćcio pryśviaciŭ ekstrymu i moru: ad aŭtahonak i jachtynhu na Minskim mory da kruizaŭ pa Jeŭropie. Ale niadaŭna 64‑hadovaha kapitana asudzili pa kryminalnym artykule i adpravili za kraty.
Juryj Očkas naradziŭsia ŭ 1961 hodzie. U 1983‑m skončyŭ aŭtatraktarny fakultet BNTU.
U 1990‑ia hady jon byŭ vice-čempijonam Biełarusi pa aŭtašmatborji i doŭhi čas pracavaŭ trenieram. A paśla zachapiŭsia moram i pierajšoŭ u vindsiorfinh i jachtynh.
U 2013 hodzie Očkas nabyŭ u Polščy staruju jachtu, ułasnaručna adnaviŭ jaje i nazvaŭ «Fartunaj». Z taho času jon pačaŭ prapanoŭvać pasłuhi adpačynku na Minskim mory, namahajučysia stvaryć u Biełarusi jakasny i pryhožy servis na vadzie, choć i pryznavaŭ, što paŭnavartasnaha biznesu z hetaha ŭ našych šyrotach nie zrabić. Jahony brend nazyvaŭsia jachty.baj.
Juryj šmat padarožničaŭ. Jahonyja sacsietki strakaciać fotazdymkami z suśvietnych maryn i jacht-kłubaŭ: Hrecyja, Turcyja, Ispanija, Kanarskija astravy i Niderłandy. Praz sankcyi i składanaści z dakumientami časam davodziłasia chitryć — naprykład, rehistravać svaju łodku pad ściaham ekzatyčnaj krainy Pałau, kab mieć mahčymaść svabodna vychodzić u mora. Taksama jon vučyŭ jachtynhu ŭ Polščy.
Juryj prytrymlivajecca praŭkrainskich pohladaŭ. «Vieru, što ŭsio budzie Ukraina!», — pisaŭ jon u adnym z dopisaŭ u fejsbuku.
Apošni dopis Juryja ŭ sacsietkach datavany 30 žniŭnia 2025 hoda — tady jon apublikavaŭ zapis z Mazurskich azioraŭ u Polščy. Chutčej za ŭsio, jaho zatrymali nieŭzabavie paśla hetaha, kali jon viartaŭsia ŭ Biełaruś.
Jaho sudzili ŭ Minskim haradskim sudzie pavodle č.1 art. 130 KK (raspalvańnie varožaści). Chutčej za ŭsio, heta źviazana z praŭkrainskimi dopisami ŭ sacsietkach.
Juryju prysudzili kałoniju.
«Naša Niva» — bastyjon biełaruščyny
PADTRYMAĆCiapier čytajuć
Śvieckaje žyćcio Darji Šmanaj: dni naradžeńnia dziaciej Kirkorava i Comedy Club10
Kamientary