Dla palotu Robierta Fica da Pucina na 9 maja ruku dapamohi praciahnuła Čechija
Stali viadomyja padrabiaznaści budučaj pajezdki premjer-ministra Słavakii Robierta Fica ŭ Maskvu na 9 maja. Jahony pieralot moža zaniać ad 4 da 8 hadzin u zaležnaści ad abranaha maršrutu. Adnoj z klučavych krain tranzitu stanie Čechija, jakaja ŭžo dała dazvoł na pralot samalota, paviedamlaje RTVI.
Paviedamlajecca, što najbolš chutkim varyjantam ličycca paŭnočny maršrut. Jon prachodzić praz pavietranuju prastoru Čechii i Hiermanii, paśla čaho samalot pavinien vyjści da Bałtyjskaha mora, dalej pralacieć u bok Finskaha zaliva i tam uvajści ŭ pavietranuju prastoru Rasii. Pry nieabchodnaści samalot Fica moža zrabić pasadku dla dazapraŭki ŭ Kalininhradzie.
Paŭdniovy maršrut, praz terytoryi bałkanskich krain i Hruzii, zajmaŭ by ŭdvaja bolš času.
Raniej paviedamlałasia, što Łatvija, Litva, Polšča i Estonija nie dali dazvoł na pralot. Tamu razhladalisia inšyja varyjanty maršrutu.
Taksama abmiarkoŭvałasia mahčymaść pajezdki ŭ Maskvu pa ziamli — na aŭtamabili. Adnak takaja daroha mahła zaniać ad 18 da 21 hadziny ŭ zaležnaści ad nadvorja, situacyi na darohach i času prachodžańnia miežaŭ.
Sam Robiert Fica raniej zajaŭlaŭ, što maje namier 9 maja ŭskłaści kvietki da Mahiły nieviadomaha sałdata kala Kramloŭskaj ściany i sustrecca z Uładzimiram Pucinym. Pavodle jaho słoŭ, heta nibyta robicca dziela ŭšanavańnia čyrvonaarmiejcaŭ, jakija ŭdzielničali ŭ vyzvaleńni Słavakii.
Pry hetym jon adznačaŭ, što nie płanuje prysutničać na paradzie na Krasnaj płoščy.
Taksama čakajecca, što ŭ Maskvu 9 maja mohuć pryjechać i inšyja zamiežnyja kiraŭniki. U Kramli zajavili, što śpis haściej budzie ahučany paźniej.
Kamientary
eto nie tiech li, kotoryje čieriez 20 let na tankach prijechali ludiej daviť?