Palitźniavolenaha žurnalista Kiryłu Paźniaka vypisali sa špitala chutkaj dapamohi
Palitviaźniu Kiryłu Paźniaku stała lepš, jaho pieraviali z reanimacyjnaha adździaleńnia špitala chutkaj dapamohi ŭ miedycynskuju častku minskaha SIZA № 1, dzie lačeńnie praciahvajecca. Pra heta «Radyjo Svaboda» paviedamiła krynica, daśviedčanaja ŭ spravach palitviaźnia, jakaja prasiła nie nazyvać jaje imia z pryčyn biaśpieki.
Pavodle infarmacyi ad krynicy, list ad Kiryły Paźniaka z hetaj infarmacyjaj byŭ atrymany niekalki dzion tamu.
«Tak, jamu było vielmi drenna napiaredadni suda, paviedamiŭ u liście, što nie moh dychać, u špitali chutkaj dapamohi lažaŭ u reanimacyi. Ciapier jamu lepš, užo ŭ miedycynskaj častcy izalatara. Ale lačeńnie lohkich praciahvajuć», — paviedamiła krynica, spasłaŭšysia na list Kiryły Paźniaka.
Pavodle krynicy, žurnalista vinavaciać u «arhanizacyi ekstremisckaha farmiravańnia» i «dyskredytacyi Biełarusi». Sud nad Paźniakom pavinien byŭ pačacca 14 maja, ale byŭ adkładzieny i čas novaha pasiadžeńnia nie pryznačany, paviedamiła krynica.
Pra toje, što Kiryła Paźniak trapiŭ u špital ź pnieŭmanijaj paśla pieraniesienaha raniej karanavirusa 22 maja, paviedamiła jahonaja byłaja žonka Alena. Pavodle žančyny, heta adbyłosia miesiac tamu.
Kiryła Paźniak byŭ zatrymany 4 vieraśnia 2025 hoda. Tady KDB abvieściŭ «ekstremisckim farmavańniem» YouTube-kanał «Płatforma 375», a žurnalista nazvaŭ «arhanizataram» hetaha «farmavańnia».
U toj ža dzień, paviedamlali pravaabaroncy, zatrymali i 20‑hadovuju dačku Kiryły Paźniaka — Janinu Paźniak. Jana taksama źmieščanaja pad vartu, i joj vystaŭlena abvinavačańnie va ŭzajemadziejańni z «ekstremisckim farmavańniem».
U 2021—2022 hadach kanał pravioŭ niekalki debataŭ pamiž praŭładnymi prapahandystami i ich apanientami, što vymušana vyjechali z krainy. Apošni efir adbyŭsia 3 śniežnia 2022 hoda z udziełam Ryhora Azaronka (STV), Juryja Cieracha («SB. Biełaruś siehodnia») — u Minsku, a taksama Aleha Talerčyka (suzasnavalnik arhanizacyi byłych supracoŭnikaŭ siłavych struktur «Bajpoł») i viadučaha Dzianisa Dudzinskaha.
Kamientary