Палітзняволенага журналіста Кірылу Пазняка выпісалі са шпіталя хуткай дапамогі
Палітвязню Кірылу Пазняку стала лепш, яго перавялі з рэанімацыйнага аддзялення шпіталя хуткай дапамогі ў медыцынскую частку мінскага СІЗА № 1, дзе лячэнне працягваецца. Пра гэта «Радыё Свабода» паведаміла крыніца, дасведчаная ў справах палітвязня, якая прасіла не называць яе імя з прычын бяспекі.
Паводле інфармацыі ад крыніцы, ліст ад Кірылы Пазняка з гэтай інфармацыяй быў атрыманы некалькі дзён таму.
«Так, яму было вельмі дрэнна напярэдадні суда, паведаміў у лісце, што не мог дыхаць, у шпіталі хуткай дапамогі ляжаў у рэанімацыі. Цяпер яму лепш, ужо ў медыцынскай частцы ізалятара. Але лячэнне лёгкіх працягваюць», — паведаміла крыніца, спаслаўшыся на ліст Кірылы Пазняка.
Паводле крыніцы, журналіста вінавацяць у «арганізацыі экстрэмісцкага фарміравання» і «дыскрэдытацыі Беларусі». Суд над Пазняком павінен быў пачацца 14 мая, але быў адкладзены і час новага пасяджэння не прызначаны, паведаміла крыніца.
Пра тое, што Кірыла Пазняк трапіў у шпіталь з пнеўманіяй пасля перанесенага раней каранавіруса 22 мая, паведаміла ягоная былая жонка Алена. Паводле жанчыны, гэта адбылося месяц таму.
Кірыла Пазняк быў затрыманы 4 верасня 2025 года. Тады КДБ абвесціў «экстрэмісцкім фармаваннем» YouTube-канал «Платформа 375», а журналіста назваў «арганізатарам» гэтага «фармавання».
У той жа дзень, паведамлялі праваабаронцы, затрымалі і 20‑гадовую дачку Кірылы Пазняка — Яніну Пазняк. Яна таксама змешчаная пад варту, і ёй выстаўлена абвінавачанне ва ўзаемадзеянні з «экстрэмісцкім фармаваннем».
У 2021—2022 гадах канал правёў некалькі дэбатаў паміж праўладнымі прапагандыстамі і іх апанентамі, што вымушана выехалі з краіны. Апошні эфір адбыўся 3 снежня 2022 года з удзелам Рыгора Азаронка (СТВ), Юрыя Цераха («СБ. Беларусь сегодня») — у Мінску, а таксама Алега Талерчыка (сузаснавальнік арганізацыі былых супрацоўнікаў сілавых структур «Байпол») і вядучага Дзяніса Дудзінскага.
Каментары