Statkievič: Dla Biełarusi moža stvarycca takaja situacyja, što ŭsie dziaržavy vakoł nas buduć mieć jadziernuju zbroju
Palityk i eks-palitviazień u svaim telehram-kanale prakamientavaŭ Pieciarburhski ekanamičny forum i pytańni prymianieńnia jadziernaj zbroi, jakoje abmiarkoŭvałasia na im. Svoj artykuł jon nazvaŭ «Plaski z bombami, abo Biesaŭščyna».
«Dniami ŭ Sankt-Pieciarburhu adbyŭsia ekanamičny forum, u jakim uziali ŭdzieł pradstaŭniki rasijskich kiroŭnych i ekanamičnych elit. U niekatorych z dakładaŭ, zroblenych na forumie, prahučali, pa sutnaści, zakliki da prymianieńnia Maskvoj jadziernaj zbroi.
Kali takija zakliki hučać na samym pradstaŭničym dziaržaŭnym mierapryjemstvie Rasii dy ŭ aficyjnych dakładach na im, to heta vyrazny sihnał śvietu pra hatoŭnaść rasijskich uładaŭ pieravieści svoj kanflikt z Zachadam u jadzierny farmat. Navat kali heta tolki sproba zapałochvańnia, to jana ŭžo demanstruje realnaść takoha raźvićcia padziej. Na što raźličvajuć sapraŭdnyja inicyjatary hetych «plasak ź jadziernymi bombami»? Napałochać Zachad? Ale ci spynić heta jaho ad padtrymki Ukrainy? Chutčej naadvarot. Ubačyŭšy vidavočnuju nieadekvatnaść kiraŭnictva jadziernaj dziaržavy tam, pa-pieršaje, uzmocniać dapamohu ŭkraincam u spadziavańni, što jany spyniać nieadekvataŭ jašče na podstupach da krain NATA.
Pa-druhoje, realnaja jadziernaja pahroza ad Maskvy prymusić Zachad rychtavać taksama jadzierny adkaz, kab zrabić canu jadziernaj ahresii suprać NATA nieprymalnaj dla ahresara. I voś užo Francyja zaklučaje damovy z susiednimi z Rasijaj krainami NATA pra raźmiaščeńnie na ich terytoryi ŭ pahražalny pieryjad francuzskaj jadziernaj zbroi.
Voś užo ZŠA viaduć pieramovy ź Litvoj nakont raźmiaščeńnia na jaje terytoryi amierykanskaj jadziernaj zbroi. Liču, što ciapier nad mahčymaściu stvareńnia takoj zbroi nie moža nie dumać kiraŭnictva Ukrainy, bo inakš jadzierny šantaž stanie pastajannaj častkaj ukrainska-rasijskich adnosin.
Dla Biełarusi moža stvarycca takaja situacyja, što ŭsie dziaržavy vakoł nas buduć mieć jadziernuju zbroju. Takuju ž, jak i taja, što ŭžo raźmieščanaja na našaj ziamli.
Tolki našy susiedzi buduć u kryzisnych situacyjach sami prymać rašeńnie na prymianieńnie hetaj zbroi, a Biełaruś zrobiać mišeńniu dla zvarotnych jadziernych udaraŭ Maskvy, navat nie papiaredziŭšy nas pra heta.
Hałoŭnaje pytańnie, jakoje ŭźnikaje — a jaki ž sens bačać u Kramli ŭ hetym uzajemnym jadziernym samaźniščeńni? Što, ukraincy pierastanuć nienavidzieć Rasiju za ŭsio zroblenaje im, dy, abtresvajučy radyjoaktyŭny popieł, pabiahuć u «Sojuznoje hosudarstvo», užo zasypanaje takim ža popiełam? Ci hetyja zabojstvy i pakuty miljonaŭ buduć dziela niekalki sotniaŭ kvadratnych kiłamietraŭ radyjoaktyŭnaj ziamli, zachop jakoj dazvolić abjavić siabie pieramožcami i «padniać rejtynh»?
Najbolš uraziła mianie toje, što hetyja nialudskija płany z trybuny sanktpieciarburhskaha foruma ahučvali piersanažy, jakija sami siabie nazyvajuć «pravasłaŭnymi».
«Pravasłaŭnymi» kim? Kali pravasłaŭnymi chryścijanami, to da viery, jakuju nios ludziam Chrystos, ich płany majuć takoje ž dačynieńnie, jak piekła da raju. Ja liču, što z punktu hledžańnia kaštoŭnaściaŭ pravasłaŭnaha, jak i luboha inšaha chryścijanstva, hetyja vykanaŭcy «plasak ź jadziernymi bombami» prosta ŭpali ŭ biesaŭščynu. Chaciełasia b pačuć na hety kont mierkavańnie kiraŭnictva Maskoŭskaha patryjarchatu. Mo, heta jakraz toj vypadak, kali varta ŭspomnić pra anafiemu?», — napisaŭ Mikałaj Statkievič.
Kamientary