ZŠA i Iran padpisali papiaredniaje pahadnieńnie ab miry

Iran i ZŠA padpisali papiaredniaje mirnaje pahadnieńnie, paćvierdzili prezident ZŠA Donald Tramp i Ministerstva zamiežnych spraŭ Irana. Miemarandum ab uzajemarazumieńni terminam na 60 dzion praduhledžvaje spynieńnie vajennych dziejańniaŭ na ŭsich frantach, uklučajučy Livan, źniaćcie sankcyj z Tehierana i stvareńnie fondu adnaŭleńnia Irana, piša Bi-bi-si.

«Jano padpisanaje. Padpisanaje ŭ Viersali. Ja tolki što padpisaŭ jaho», — paćvierdziŭ Tramp paśla sustrečy z prezidentam Francyi Emanuelem Makronam u Viersalskim pałacy. Pry hetym Tramp čarhovy raz pryhraziŭ adnavić ataki, kali Iran nie vykanaje svaich abaviazacielstvaŭ.

Svoj podpis pad miemarandumam pastaviŭ i prezident Irana Masud Piezieškijan.

Vajna ź Iranam, raspačataja ZŠA i Izrailem 28 lutaha, zabrała žyćci tysiač ludziej, pieravažna ŭ Iranie i Livanie. U adkaz Tehieran atakavaŭ Izrail i sajuźnikaŭ ZŠA ŭ Piersidskim zalivie.

Kanflikt spravakavaŭ maštabny enierhietyčny kryzis praz faktyčnaje zakryćcio Iranam Armuzskaha praliva.

U sieradu pradstaŭniki administracyi ZŠA sabrali žurnalistaŭ padčas sustrečy krain «Vialikaj siamiorki» ŭ Evijanie i začytali im tekst miemaranduma z 14 punktaŭ.

Pahadnieńnie padaŭžaje režym spynieńnia ahniu, abvieščany ŭ krasaviku, jašče na 60 dzion, kab dazvolić bakam damovicca ab kančatkovym pieramirji.

I Tramp, i členy jaho kamandy padkreślivajuć, što pakul heta tolki miemarandum, a jaho pałažeńni buduć vykonvacca tolki ŭ tym vypadku, kali Iran «budzie dobra siabie pavodzić». Tramp u čarhovy raz nie vyklučyŭ novych bambardzirovak Irana, kali kančatkovaje pahadnieńnie nie budzie dasiahnuta na praciahu dvuchmiesiačnaha pieryjadu.

Miemarandum utrymlivaje nastupnyja asnoŭnyja punkty:

— spynieńnie bajavych dziejańniaŭ va ŭsim rehijonie. «Nieadkładnaje i kančatkovaje spynieńnie vajennych apieracyj na ŭsich frantach, uklučajučy Livan»;

— spynieńnie amierykanskaj marskoj błakady iranskich partoŭ na praciahu 30 dzion i zatym advod usich amierykanskich sił ad iranskich miežaŭ na praciahu 30 dzion paśla padpisańnia kančatkovaha mirnaha dahavora;

— akryćcio Armuzskaha praliva. Jon budzie adkryty dla biaspošlinnaha prachodu sudnaŭ na praciahu 60 dzion, paśla čaho Iran, jak paviedamiŭ pradstaŭnik administracyi ZŠA, «u supracoŭnictvie nie tolki z Amanam, ale i ź inšymi dziaržavami Zaliva raspracuje bolš šyrokaje i doŭhaterminovaje pahadnieńnie adnosna Armuzskaha praliva»;

— 300 miljardaŭ dalaraŭ na adnaŭleńnie i raźvićcio Irana. ZŠA abiacajuć razam sa svaimi partniorami ŭ rehijonie stvaryć fond «adnaŭleńnia i ekanamičnaha raźvićcia Isłamskaj Respubliki Iran» sumaj nie mienš za 300 miljardaŭ dalaraŭ;

— admiena ŭsich sankcyj suprać Tehierana. ZŠA abiacajuć «skasavać usie vidy sankcyj suprać Isłamskaj Respubliki Iran»; hrafik ich admieny płanujecca ŭzhadnić paźniej;

— adsutnaść jadziernaj zbroi ŭ Irana. ZŠA i Iran damaŭlajucca, što apošni nikoli nie budzie ni stvarać, ni nabyvać jadziernuju zbroju, a taksama buduć supracoŭničać u spravie likvidacyi iranskaha ŭzbahačanaha ŭranu.

Pradstaŭniki ZŠA, aznajomiŭšy žurnalistaŭ ź miemarandumam, jašče raz padkreślili, što jon ni da čaho nie abaviazvaje Złučanyja Štaty i što vykanańnie jaho punktaŭ budzie zaležać ad taho, jak paviadzie siabie Iran.

Akramia taho, adnosna fondu na 300 miljardaŭ dalaraŭ jany zajavili, što ZŠA nie biaruć na siabie abaviazacielstva ŭnosić u jaho srodki: jany tolki abiacajuć razam z partniorami ŭ rehijonie raspracavać płan adnaŭleńnia i raźvićcia Irana ahulnym abjomam nie mienš za 300 miljardaŭ dalaraŭ.

• 4
• 0
• 0
• 0
• 0
• 0
• 0
• 0