«Hety dzikun čuŭ tolki pra šympanze». Parahvajskaja sienatarka spravakavała rasiscki skandał z Mbape
Paraza zbornaj Parahvaja ad Francyi ŭ 1/8 finału čempijanatu śvietu — pryčym parahvajcy tam hulali davoli hruba — pierarasła ŭ bujny skandał. Pryčynaj stali vykazvańni sienatarki Nacyjanalnaha kanhresa Parahvaja Sieleste Amarylji, jakaja napała na zorku francuzskaj zbornaj Kilijana Mbape.
Paśla finalnaha śvistka Mbape admoviŭsia pacisnuć ruku parahvajskamu bramniku Arłanda Chilu, za što toj kinuŭ francuzu miač u śpinu. Hety epizod vyklikaŭ sapraŭdnuju lutaść u parahvajskaj palityčnaj elity.
Sienatarka Amarylja apublikavała ŭ svaich sacyjalnych sietkach paviedamleńni, u jakich nie prosta raskrytykavała pavodziny futbalista, a pierajšła na rasisckija charaktarystyki.
Charaktaryzujučy Mbape, jana napisała:
«Hety dzikun navat pisać nie navučyŭsia. Zamiest matčynaha małaka jon smaktaŭ kakosy, a samymi adukavanymi istotami, pra jakich jon čuŭ, byli šympanze. Ty pavinien byŭ pakazać jamu siaredni palec, Arłanda Chil. Ja rablu heta ŭ Sienacie, i ničoha nie adbyvajecca!»
Palityk nazvała spartsmiena «kałanizavanym kamieruncam, jaki prykidvajecca francuzam, złapamiatnym, nuvaryšam, hanarlivym i ahidnym».
Bolš za toje, sienatarka adkryta papraknuła hulcoŭ svajoj zbornaj u tym, što jany nie pakarali francuzskaha forvarda za hanarystaść: «Adzinaje, za što mnohija z nas paprakajuć «Albirochu», — heta za toje, što jany nie dali jamu poŭchu paśla zakančeńnia matča. I pry hetym ja nie fanatka», — napisała Amarylja.
Hetyja vykazvańni vyklikali chvalu abureńnia ŭ internecie.
Francuzski napadnik Kilijan Mbape adreahavaŭ na słovy sienatarki.
«Spadarynia Sielesta Amarylja, vy podłaja žančyna, niavartaja svajoj pasady. Vy nie pradstaŭlajecie Parahvaj, krainu, jakaja vypramieńvała zapał i honar na praciahu ŭsiaho turniru.
Z-za vašaj nieabdumanaści i vidavočnaha rasizmu ŭvieś śviet užo zabyŭsia pra šlach i histaryčnyja namahańni, jakija vašy hulcy prademanstravali na hetym čempijanacie śvietu, sastupiŭšy miesca abmierkavańniu niekampietentnaj žančyny, jakaja stvaraje najhoršy imidž dla svajoj krainy», — napisaŭ Mbape.
Kamientary
Hiendarnaść pierad ŭsim.