U Minsku ciapier budujucca šeść novych handlovych centraŭ. Što za jany?
U Minsku pracujuć dziasiatki handlova-zabaŭlalnych centraŭ, a ŭ chutkim časie da ich dałučycca jak minimum šeść novych. Vydańnie «Anłajnier» prajechałasia pa budoŭlach i pravieryła hatoŭnaść abjektaŭ. Adnyja voś-voś adčyniać dźviery, a inšym jašče budavacca i budavacca.
Šmatfunkcyjanalny kompleks Sigma na Niamizie
Adkryćcio: 2027 hod.
Šmatfunkcyjanalny kompleks mudrahielistaj formy budujecca na vulicy Niamizie, 44. Z kožnym dniom jon usio bližej da zaviaršeńnia i ŭsio bolš ździŭlaje svaimi fasadnymi rašeńniami. Raniej na miescy hetaj šklanoj pabudovy była pustka, adnak raźmiaščeńnie ŭ centry niby namiakała — ziamla musić vykarystoŭvacca bolš praduktyŭna. Učastak vystavili na aukcyjon u 2018 hodzie.
Zabudoŭščyk «Sihmapolus» nie asabliva raspaŭsiudžvajecca pra toje, čym mienavita novy abjekt paciešyć minčan, tak što zastajecca tolki zadavalniacca infarmacyjaj, jakaja praślizhvaje ŭ sieciva.
Naprykład, hałoŭny architektar prajekta raskazvaŭ nastupnaje: budynak aryhinalny, z prymianieńniem ekskluziŭnych technałohij, rahi fasada abramlajuć radyusnyja vitražy, jość unikalnyja detali nakštałt štučnaha ručaja, jaki praciakaje ŭzdoŭž fasada kompleksu. Jašče adna asablivaść prajekta — ekspłuatavany dach, na jakim stvorać zialonuju zonu. Taksama viadoma, što praduktovaja krama, jakaja adkryjecca na pieršym paviersie, budzie naležać da sietki Prostore.
«Ahulnaja płošča kompleksu — 70 000 kvadratnych mietraŭ, — raskazali «Anłajnieru» ŭ kampanii «Sihmapolus». — Try ŭzroŭni zojmie handlovy centr, parkinh raźmieścicca na troch pavierchach. U dvuchpaviarchovaj prybudovie adčynicca fitnes-centr i miedycynski centr. Na hety momant praciahvajecca ŭparadkavańnie terytoryi, budaŭniki prystupili da ŭnutranaha azdableńnia.
Adkryćcio kompleksu zapłanavana na siaredzinu 2027 hoda, ale ŭsio budzie zaležać ad umoŭ nadvorja. Kali zima budzie surovaj, jak u minułym hodzie, budoŭlu pryjdziecca prypynić. Śpis arandataraŭ my pakul nie hatovyja raskryvać, ale adznačym, što prajekt dakładna vykliča cikavaść na minskim rynku».
Handlovy centr na płoščy Bahuševiča (na miescy fabryki «Sukno»)
Adkryćcio: 2028 hod.
Niepadalok ad Sigma pačali budavać jašče adzin handlovy centr. Jon raźmieścicca na skryžavańni praśpiekta Dziaržynskaha i vulicy Kłary Cetkin — na terytoryi źniesienaj raniej fabryki «Sukno». Darečy, nie zabyvajemsia, što niedaloka adsiul źnieśli jašče i zakinutaje aharodninaschovišča, prazvanaje ŭ narodzie «Lambda», — na jaho miescy taksama płanujecca pabudavać handlovy abjekt. Atrymlivajecca, koła na płoščy Franciška Bahuševiča ŭ budučyni stanie litaralna punktam pryciahnieńnia.
Budoŭla na vulicy Kłary Cetkin kipić, ad minułych vytvorčych karpusoŭ nie zastałosia i śledu. Jany žyvuć chiba što tolki ŭ pamiaci minčukoŭ.
Budynki z čyrvonaj cehły, jakija naležali pradzilnaj fabrycy «Sukno», stajali tut ažno z 1947 hoda. U naš čas jany doŭha byli paŭzakinutymi, akružanymi vysokim płotam, i nie ŭpisvalisia ŭ sučasny haradski piejzaž. Častku pamiaškańniaŭ źnieśli dziela mietro, astatnija vystavili na aukcyjon. U 2023 hodzie ich vykupiła kampanija «Maciaryk-Inviest».
Što tut adkryjecca? Handlova-administracyjny kompleks, jaki ŭklučaje 12‑paviarchovy ofisny błok, dvuchpaviarchovy handlovy centr, arendnyja płoščy i šmatuzroŭnievuju haraž-stajanku. Abiacana i sioje-toje cikavaje — hipiermarkiet tavaraŭ dla doma. Narmatyŭny termin budaŭnictva abjekta — 46 miesiacaŭ, heta značyć adkryjecca jon prykładna ŭ 2028 hodzie. I heta pakul usia najaŭnaja infarmacyja: u handlovaha abjekta niama sajta, a źviazacca z zabudoŭščykam niaprosta.
Šmatfunkcyjanalny kompleks na Hrušaŭcy
Adkryćcio: nieviadoma.
Za apošnija dziesiacihodździ mikrarajon Hrušaŭka prosta na vačach minčukoŭ pieražyŭ vialikija mietamarfozy. Doŭhi čas zapoŭnieny barakami i pryvatnym siektaram, jon pieratvaryŭsia ŭ zapatrabavanuju łakacyju z sučasnymi šmatpaviarchoŭkami. Ale čaho tut realna nie chapaje, dyk heta handlovaha centra, u jaki paciahnucca šmatlikija žychary novabudoŭlaŭ.
Cikava, što horad pra hetuju patrebu viedaŭ daŭno — jašče ŭ 2018 hodzie było vyrašana vystavić na aŭkcyjon učastak na skryžavańni praśpiektaŭ Dziaržynskaha i Žukava pad budaŭnictva MFC. I tolki niadaŭna terytoryju abharadzili, abviaściŭšy, što handlovamu centru być. Čamu ŭsio tak zaciahnułasia? Nieabchodna było adsialić siadziby, jakija znachodzilisia na hetym učastku.
Zabudoŭščykam abjekta pad pracoŭnaj nazvaj «Šmatfunkcyjanalny administracyjna-dziełavy kompleks z ubudavana-prybudavanymi pamiaškańniami hramadskaha pryznačeńnia i parkinham» stanie kampanija «HrandChaŭzInžynirynh», jakaja paśpiachova ŭźviała i realizavała kompleks «Kvartał na Hrušaŭcy» — dychtoŭnyja karyčnieva-biełyja manalitnyja šmatpaviarchoviki prosta kala stancyi mietro «Hrušaŭka». Praŭda, kankretyki pa budoŭli pakul niama. Voś što paviedamili ŭ adździele prodažaŭ:
«Na siońniašni dzień dakładnaj infarmacyi pra pačatak budaŭnictva niama. Mahčyma, u chutkim časie vyjdziem na placoŭku. Prajekt prachodzić finalnyja ŭzhadnieńni».
Handlova-zabaŭlalny kompleks Novamall u Ściapiancy
Adkryćcio: 2028 hod.
Za apošnija hady Ściapianka papoŭniłasia niemałoj kolkaściu novabudoŭlaŭ, i ich budaŭnictva praciahvajecca. Farmirujucca adrazu niekalki kvartałaŭ z damami dla čarhavikoŭ. Ale atrymlivajecca tak, što žyllo dadajecca, a infrastruktura — nie. U niadaŭnim repartažy miascovyja skardzilisia na niastaču sadkoŭ, škoł i praduktovych kram. Dyk voś, adna z prablem chutka dakładna vyrašycca — u Ściapiancy zadumali pabudavać nievialiki, ale stylny handlovy centr pad nazvaj Novamall.
Raźmieścicca jon na skryžavańni vulic Karvata i Suviazistaŭ, prosta kala pomnika samalotu Su-7BM. Pakul na hetym miescy krasujecca zialonaja zona, ale chutka placoŭku abharodziać, bo pačatak budaŭničych rabot zapłanavany na kastryčnik 2026 hoda. Adkryjecca handlovy centr niachutka — viasnoj 2028 hoda. Ale niahledziačy na heta, zabudoŭščyk — hrupa kampanij «TENKinviest» — užo napoŭnicu rekłamuje svoj prajekt i šukaje arandataraŭ.
«Novamall — heta handlovy kompleks rajonnaha ŭzroŭniu, — raskazali ŭ kampanii. — Jaho ahulnaja płošča — 5200 kvadratnych mietraŭ. Handlovy centr uklučyć u siabie dva ŭzroŭni z handlovaj halerejaj, dziciačy zabaŭlalny centr, kaviarni, restarany i parkinh na 190 mašyna-miescaŭ».
Niadaŭna staŭ viadomy praduktovy apieratar — «Susiedzi». Krama raźmieścicca na pieršym paviersie i zojmie płošču ŭ 1400 kvadratnych mietraŭ. Ciapier viaducca pieramovy z brendami «Optyka WDL», Varka, Conte, Respekt, «Miehatop», Burger King i inšymi. Karaciej kažučy, usio heta dakładna vielmi patrebna navasiołam.
Handlovy centr Mega Park u Kamiennaj Horcy
Adkryćcio: 2027 hod.
Mega Park u Kamiennaj Horcy — prajekt vielmi ambicyjny. Adna nazva čaho vartaja! A voś budaŭnictva idzie nie vielmi hładka (jak ža biez hetaha). Čarhovaje ažyŭleńnie budoŭli adbyłosia ŭ žniŭni, i treba spadziavacca, što sprava budzie daviedziena da kanca.
Pryhadajem historyju: Mega Park na Kazimiraŭskaj, 12 pačali budavać u 2012 hodzie i spačatku abiacali adkryć u 2017-m, a zatym — u 2020-m. Papiaredni inviestar pakinuŭ abjekt u napaŭhatovym stanie, i horadu pryjšłosia vystavić łot na tarhi. Novaja kampanija kupiła jaho ŭ 2024 hodzie. Pierad kamandaj stajała zadača acanić budynak, jaki prastajaŭ biez ruchu doŭhija hady, i pryniać uzvažanaje rašeńnie pra jaho los. Paralelna z techničnaj pracaj viałasia raspracoŭka architekturnaj kancepcyi i aktyŭnyja pieramovy z arandatarami. I voś, niadaŭna raboty adnavilisia.
Arandatary prajaŭlajuć cikavaść da prajekta — kažuć, 68% płoščaŭ užo zaniata. Jakarnym arandataram stanie hipiermarkiet «Susiedzi» płoščaj 4500 kvadratnych mietraŭ. Siarod inšych viadomych brendaŭ — univiermah «CUD», kramy Koton i Gloria Jeans, kinaprastora mooon. U cełym adkryjucca apieratary, jakich my pryzvyčailisia bačyć u inšych kompleksach.
«Adkryćcio handlovaha centra Mega Park płanujecca ŭ 2027 hodzie», — adznačyli ŭ kampanii «Mieha-Aktyŭ».
Handlovy centr «Praśpiekt» na Prytyckaha
Adkryćcio: 2027 hod.
U zachodniaj častcy Minska raście jašče adzin handlovy centr — «Praśpiekt». Jon budujecca na skryžavańni vulicy Prytyckaha i Dambroŭskaj pad kiraŭnictvam kampanii «TENKinviest». Škilet budynka ŭžo amal hatovy, ale ŭsio roŭna rabot na budaŭničaj placoŭcy napieradzie jašče niamała. Ci paśpiejuć adkryć novy abjekt u abiacanym 2027 hodzie? Budzie vidać.
«Praśpiekt» pazicyjanujecca jak handlovy kompleks rajonnaha ŭzroŭniu. Jaho ahulnaja płošča — 26 000 kvadratnych mietraŭ. Buduć dva pavierchi z handlovaj halerejaj, a taksama ofisnyja pamiaškańni i 500 mašyna-miescaŭ. Naviedvalnikam abiacajuć kramy z adzieńniem, kaviarni i inšyja nieabchodnyja rečy nakštałt abmieńnikaŭ i aptek.
«Budaŭnictva idzie zhodna z zaćvierdžanym hrafikam, — adznačyli ŭ kampanii. — U HC užo paćvierdžanyja jakarnyja arandatary: praduktovy apieratar «Santa», fudkort, dziciačy zabaŭlalny centr i viadučyja fešn-brendy».
Ciapier čytajuć
«Na takuju ch**niu paviałasia». Rasijanka pryjechała ź Sibiry ŭ Biełaruś i ciapier z maciukami raskazvaje, jak tut składana žyć21
Kamientary